Sikaraya 10 - Udél Dwata: Gna Kesfasad ne Lomi Kesfasad

Yóm bud kehgulék Dwata klowil yó kem tauhen

¹ Bè yóm kdaw ye mò hulu, mni ye bè Dwata kulón. Dwata se mò du yó kem lobun mit kulón ne gel hkulónen ebè yó kem hulu ye.

² Abay se yó kem dwata kéng gel tnaba le bè gónô le, gel le tmulón kéng. Dalang se yó kem gel hemgawang, kéng yóm gel tulón le. Ne yóm lan kna gel tulón yó kem dumu tau, là tahuhen. Laen kô dù gónó le temgel nawa tau yóm kdê le. Yó gónóm mon, laen kô dù mdengen lan lolò le yó kem tau, mkél le bè yó kem ubiha tabag, laen dù tau mdengen semgyok kul ne malak kul.

³ Yó udél Dwata, monen, “Tey sidek kebutu kul yó kem tau semgyok yó kem ubihahu, angat tnafaku lu yó kem tau gel malak kul yó. Yakà dengen kól yóm Dwata laen dù là gbeken du nan e sen-gyok yó kem kun ubiha, duhen yó kem tau Juda. Angat tey kehekgisen kul, lómón yó kem kudà kemgis gel nwit le bè gida.

⁴ Bè Juda se gónón tembong yó kem tau mogot benwu, ne yó kem dumu tau gel malak, dalang se yó kem kmandér bè yó kem sendalù, kem tau mò malak yó kem dou tau.

⁵ Yó angat gónó le mkél yó kem tau bè Juda, lómón yó kem sendalù alì kemgis bè gida, gotu sninà ndà le yó kem hohon le, lómón mdà hitok. Lemwót bè yóm knô Dwata bélê le bè yóm kesfatay le, sal le gel gemmò bè yó kem hohon le, balù bè yó kem hohon le smakay kudà.

⁶ Yó kem tau Juda, angat ten-gelu lu, ne lenwau yó kem tau Israél. Lemwót bè yóm kkoduhu kul, bud hen-guléku klowil le, hol lómón ke tehe là kenbéu kul. Yakà ou du yóm sana kul Dwata hol gónó mogot, angat bnalau yó kem hni le.

⁷ Yó kem tau Israél, angat le baling kemgis, lómón kgis yó kem sendalù alì hulung sfatay. Tey kehligal le, lómón kehligal yó kem tau minum tifas grép. Angat ton yó kem ngà le yóm nmou bélê le ni, ne tey kehligal le se kul.

⁸ Ke bud tnabahu lu yó kem dou tau, gotu le bud semfulék ebéléu, yakà deng nsoku lu. Balù yóm là kwen le, angat tey kból le lómón yóm gnan.

⁹ Balù yóm deng gotu keseklahu kul bè yó kem tólóng benwu, okóm bè yó kem benwu mayuk deng gónó le nô yó, sana tolo kehedem le do bè yó. Tolo le mowil, mung kul kem ngà le ne gotu le slomong mulék ebè yóm sana kul benwu bè Israél.

¹⁰ Huléku lu gu ditu bè Idyip ne gu ditu bè Asirya, nwitu lu mulék ebè yóm kul benwu bè Gilyad ne bè Libanun. Angat tey kwen le ta yóm kul tonok, botong là kóyówen bélê le.

¹¹ Angat le mlan gu lem yó kem tey dê gónó le glayam, hol lómón ke wen mohin nifal le, okóm laen dù gfà le lemwót bè yóm któbóngu kul. Hensengu lewók yóm mohin nifal le yó, ne botong hektihu yóm tey él nelem boluyen Nayl. Yóm alì keheklabak yó kem tau Asirya, són ketngónem du ne yóm alì kfasang yó kem tau Idyip, deng gesón.

¹² Bud ten-gelu lu yó kem dou tau lemwót bè yóm ksalig le do ne ket nmò le sal hlan le bè dou boluy. Ou se Dwata yóm mudél ni.” Là gomongen bè nili yóm tsaptér 11. Yó eles htulón Dwata ke Sikaraya bè yóm tsaptér ni yóm angat keglaen yóm benwu Israél ne yó kem tau malak bè yó. Yó tulónen bè ni yóm kehmò Dwata du ke Sikaraya yóm nmò yóm tau hyu kesegyoken yó kem ubiha móyón hnatay le. Wen lewu tuged tau semgyok ubiha nô bè Sikaraya. Yó boluy yóm sotu, Nawa Dwata, hnigaden yóm kbong nawa Dwata yó kem tau Israél. Ne yóm sotu tuged boluyen Sesotu, hnigaden yóm kessotu yóm lewu kem benwu duhen Juda ne Israél. Okóm yó kem tau, deng mom kenbê le yóm tau hyu kesegyoken ubiha yó. Yóm nmò le yó, hnigaden yóm angat kekbê le ke Jisas Krays. Omin Dwata bud hmò du ke Sikaraya yóm kun nmò yóm tau alì sidek kesegyoken ubiha angat gdek lem blóng le elem hulin kdaw mò gemlà kul. Nim ni, là tagaden gotu dohò efet kól yóm tau bnoluy le Hohon Krays.