Sifanaya 3 - Udél Dwata: Gna Kesfasad ne Lomi Kesfasad

Kkukum Dwata yó kem tau bè Jirusalim

¹ Yó udél Sifanaya, monen, “Angat tey sidek kegbaen yóm syudad Jirusalim. Hono kem tau là mimón ke Dwata yó kem tau nô lemen. Hono tau tendo gel mò sidek, balù kul kwen gel hen-gnok le.

² Laen dù udél hnungol le, balù udél Dwata. Là kô le móyô ke wen tô hemtedeng kul. Là smalig le bè Dwata ne là se kô le hloni ebéléen.

³ Yó kem genlal le, lómón kmò le yó kem liyun mngel mebel mò nsék le. Ne yó kem gel kmukum bélê le, lómón kmò le yó kem ógóf lóbô lem bnes alì sidek kbitilen ke deng kimel, yóm nséken balù udì ke wen tebelen du kól hlafus.

⁴ Yó kem tugod dwata le, tey keheklabak le, là tahuhen yóm gel tulón le. Yó kem tau gel blóng le ebè Dwata, mom nmò le yóm gónón gholu yóm kun Gónô Dwata ne nulé le yóm hlolò Dwata bè yó.

⁵ Okóm yóm Dwata, sana knóen bè yó lem syudad le, laen kô dù sidek nmoen. Tódô ket kdawen mò du yóm tedeng bè yó kem kun tau, okóm là kô dilô le du. Laen kô gónó le myak yó kem tau gel mò sidek.”

⁶ Yó udél Dwata, monen, “Deng gotu genlau yó kem dumu benwu hmilol. Gotu genbau yó kem syudad le dalang se yóm beng hmilol le, gomong yóm gónó le gel heklung deng gotu genbau. Balù sotu ke wen bud lemolò du yó kem lan le, laen kô dù bud tauhen yó kem syudad le, balù sotu ke wen dù tebel.

⁷ Yó hendemu, ‘Déke deng wen klikò le do ne ni yó kem dou tau, bè yóm kton le du nim deng nmou ni. Déke deng henmóyô le ne yóm gónów semtódô kul anì là dnohou du yóm ktafaku kul.’ Okóm là, deng mom lenwê le mò du yóm sidek.”

⁸ Duhen yó, yó bud udél Dwata, monen, “Yó gónóm mon kem dou tau, nangat ye yóm kdawu mdà bè gónô skukum naw e klamo yó kem tau mò sidek bè ket benwu. Yó deng atulu, angat gotu sentifunu lu yóm kdéen benwu talak tonok, anì sulék koku ebélê le yóm sidek kebutu kul. Yóm kebutu kul yó, hol lómón ke ofi angat sulék kenen yóm klamangen.”

Kkó Dwata bélê le yó kem gónó le gemsalà ne yóm kehefligalen kul

⁹ “Bè yóm kdaw yó, tenlesu yóm ksumóng tau anì baling mólós ne anì tódô kdê le tmaba bè yóm dou boluy ne ssotu nawa le lemolò dou.

¹⁰ Angat le mit basa ebéléu yó kem dou tau deng tehe sekla etu sentu yó kem él nô lem yóm benwu Ityupya.

¹¹ Bè yóm kdaw yó, laen dù gónó ye myak béléu, abay se deng nimón ye ou. Angat kóhu lem blóng ye yó kem tau alì heklabak. Bè yóm dou bulul, laen kô dù bud tau heklabak bè yó ne.

¹² Yó kem dù tau tebelu bè Jirusalim, hono kem tau hulung heglaan, kem tau alì smalig bè yóm dou boluy.

¹³ Yó kem dù tau Israél tebel yó, là kô le mò sidek bè kem dumu le, là kô le mò kéng ne là kô le smukat. Tey menek klowil le ne menek ktungô le ne laen kô dù bud tau hmikò kul.”

Yóm kdaw kehefligal Dwata yó kem tau Israél

¹⁴ Yó udél Sifanaya, monen, “Ó kem tau bè Sayun, hol ye semngal dé. Hol ye hligal mensag, kem tau Israél. Yó kem tau bè Jirusalim, hol ye hligal se kuy. Hol hewót ye lem but blutut ye yóm kehligal ye.

¹⁵ Deng nmò Dwata sónen ne yóm ktafaken kuy ne gotu lohen yó kem hohon ye. Tódô nô bélê ye ne Dwata yóm hol geta bè Israél ne laen kô bang bud knikò ye ne.”

¹⁶ Bè yóm kdaw yó, yó angat mon le ebè yó kem tau nô bè Jirusalim, “Bê ye abay bud hlikò, kem tau bè Sayun ne bê ye abay hlingay.

¹⁷ Yakà dengen nô bélê ye yóm sana kuy Dwata hol gónó mogot. Tey wen kfasangen lemwà kuy bè yó kem hohon ye. Tey angat kehligalen bélê ye. Lemwót bè kbong nawahen kuy, gotu kóhen bélê ye yóm dê knikò ye. Lemwót bè yóm tey kligalen bélê ye gónón tódô hewót semngal.

¹⁸ Yóm kligalen yó, hol lómón kligal yóm tau mung bè gónó mò ken bong.” Yó bud udél Dwata, monen, “Angat kóhu bélê ye yóm gónó ye glayam anì laen dù bud gónó ye myak.

¹⁹ Bè yóm kdaw yó, tey angat sidek ktafaku kul yó kem tau gel hemgnok kuy. Lenwau yó kem tugô bélê ye ne gotu bud sentifunu yó kem tauhu deng sekla. Kóhu bélê le yóm tehe kyak le, tlesu du yóm gónó le megdóyón. Angat tey kadat le kul bè klamang yóm benwu tehe gónó le myak.

²⁰ Bè yóm kdaw yó, angat sentifunu yu ne bud nitu yu semfulék ebè yóm sana kuy benwu. Htótólu yu bè klamang benwu talak tonok ne ya tey kdóyón le kuy bè yóm bud khuléku du ebélê ye yóm tey kehyu klowil ye. Angat hol kuy mata se mton du nim ni. Ou se Dwata nim mudél ni.”