Sifanaya 2 - Udél Dwata: Gna Kesfasad ne Lomi Kesfasad

Kubug Sifanaya yó kem tau bè Juda anì hegsel le

¹ Yó udél Sifanaya ebè yó kem tau bè Juda, monen, “Géhél ye stifun kem tau laen dù yak, gotu ye stifun yóm kdê ye.

² Hegsel ye dé, yóm gu laan ye là deng holis bè lenos lómón kafa halay, yóm gu laanen là deng kmukum kuy Dwata, yóm gu laanen là deng sut bélê ye bè yóm alì ksidek kebuten kuy, yóm gu laanen là deng sut bélê ye bè yóm kdaw kehtonen yóm alì kebuten.

³ Hloni ye bè Dwata se kuy, kem tau hulung heglaan bè nim benwu ni, kem tau gel mò du yóm kun kóyô Dwata. Hol nmò ye yóm tedeng ne hol ye heglaan bè Dwata. Là tngón te du déke laen dù tódô kuy bè yóm kdaw kehton Dwata du yóm alì sidek kebuten tau.”

Kkukum Dwata yó kem tau hmilol yóm benwu Juda

⁴ “Yó kem syudad bè benwu Flistin yóm syudad Gasa, angat laen dù bud tauhen. Ne yóm syudad Askilun, angat tódô gbayà. Yóm syudad Asdod, angat là kóen kól gtungó kdaw, deng sana hdó Dwata yó kem tauhen, dalang se yóm syudad Ikrun gotu hdó Dwata yó kem tauhen.

⁵ Angat hatay ye kuy, kem tau Flistin nô bè kilil mohin bè benwu Kanan, yakà ebélê ye du snéen gónón e gbak nim kukum Dwata ni. Angat gotu genlà Dwata yu, balù sotu ke wen tebel bélê ye.

⁶ Yóm benwu ye bè kilil mohin, angat baling gónó le mótób kem ubiha ne mò gónó le nô yó kem tau gel semgyok kul ne mò gónó le hemsù kul ke kifu.

⁷ Bè yó angat gónó le hótób ógóf le yó kem dù tau mowil bè Juda. Ke sok kifu gel le tungô bè yó kem gónô gtebel laen dù tauhen bè Askilun. Abay se yóm sana kul Dwata hol gónó mogot, là kô nan e klifót kul ne bud hen-guléken klowil le.”

Kkukum Dwata yó kem tau Muab ne tau Amun

⁸ Yó bud udél yóm Dwata laen dù là gbeken du, yóm Dwata yó kem tau Israél, monen, “Deng gungolu yóm tendo kehnê kem tau Muab ne yó kem tau Amun yó kem dou tau ne deng tonu yóm kalu le mled yóm tonok le.

⁹ Yó gónóm mon, lemwót bè yóm là katayu, yó gónón dohò yóm udél deng monu, Angat genlau yó kem tau Muab ne yó kem tau Amun, lómón yóm tehe tódô sulék keglau yó kem tau bè yóm benwu Sodom ne Gmura. Yó angat kmou yóm kul tonok ni kem tau genlau ni, angat tódô tfeng tahen bnes semnual ne angat baling hono sol gónó le ma kahì, tonok laen dù bud muhen kól bè laen dù tul sónen. Yó kem dou tau dù tebel, angat wen megef yó kem kimu le ne gotu nwa le yó kem tonok le.”

¹⁰ Yó se balà yóm alì keheklabak yó kem tau Muab ne yó kem tau Amun, yakà deng hennê le yó kem kun tau yóm Dwata laen dù là gbeken du.

¹¹ Angat tey sidek kehlikò Dwata kul lemwót bè yóm sulék kegbaen yóm kdê dwata lennged le. Bè yóm kton le du yó kem tau bè klamangen benwu nim ni, angat són ebè Dwata gónó le e tmaba ne tódô ket kul ne sotu tmaba ebéléen bè yóm kul benwu.

Kkukum Dwata yó kem tau bè Ityupya ne bè Asirya

¹² Yó udél Dwata, monen, “Dalang se kuy, kem tau bè Ityupya, angat gotu hfatayu yu bè sudengu.”

¹³ Angat tnafak Dwata snéen Asirya yóm benwu fi bwak, deng eles tayalen eta le sigelen. Ne dalang se Ninibi yóm hol yê yó kem syudaden, angat henbaling Dwata benwu laen dù tauhen, heskélen bè yóm benwu là hyu menwu du.

¹⁴ Angat baling benwu gónó le nô yó kem ubiha ne kem safì ne kdéen kay ógóf lem bnes. Bè yó kem gónô deng gbà, angat gónó le lemóón yó kem kol ne tódô gungolem udél le gu tembó beng. Yóm koyu sidar alì tilob mò beng le, tódô hnas.

¹⁵ Yó se angat glumfak syudad Ninibi, yóm syudad alì heklabak mon du, “Bè kdéen syudad talak tonok, laen kô dù mkél dou bè yóm alì kfasangu.” Okóm ni, nam tenngel yóm tey ksidek kegbaen, baling benwu gónó le nô yó kem ógóf lem bnes. Kihu tau mlan bè yó gotu kemyà du ne tódô le gotu hising.