Sifanaya 1 - Udél Dwata: Gna Kesfasad ne Lomi Kesfasad

¹ Bè yóm tehe kogot Jusaya yóm ngà Amun yóm benwu Juda, wen udél Dwata ebè Sifanaya yóm ngà Kusi témê Gidalaya fù Amariya ne fù bukol yóm tehe Hisikaya.

Yóm kdaw kkukum Dwata yóm klamangen benwu

² Yó udél Dwata, monen, “Angat gotu himot genlau yóm kdéen nô talak tonok.

³ Angat gotu himot genlau kdéen tau ne kdéen ógóf. Tódô himot genlau snéen yóm kdéen onuk koyu dalang se yó kem utón él lem mohin. Ne gotu hlanahu lu yóm kdéen tau gel mò sidek. Himot genlau kdéen tau talak tonok, balù sotu ke wen hlowilu.”

Yóm kdaw kkukum Dwata yó kem tau bè Juda

⁴ “Angat tnafaku yó kem tau bè Juda dalang se yó kem tau bè Jirusalim. Nmou sónen yóm gel ktaba le ebè Baal bè yó. Ne yó kem tau gel blóng ebéléen, laen kô dù bud hemtulón kul nawa.

⁵ Angat bud nmou són le snéen yó kem tau gel tmaba ebè kdaw ne ebè blotik ne ebè bulón ditu ta ketef gónô le. Gel mon le Dwata kun yóm lolò le, okóm deng le mom bud gel tmaba ebè yóm dwata kéng boluyen Molék. Yó gónóm mon, angat gotu nmou són le.

⁶ Angat gotu nmou són le yó kem tau deng kmogol dou, là kô le bud hloni ebéléu ne là se kô le bud halak béléu.”

⁷ Bê ye abay mudél bè solu yóm Dwata hol dandónen geta, yakà móyónen kól ne yóm kdaw kkukum Dwata tau. Deng eles fan Dwata lu yó kem tauhen mò hfatayen ne deng eles tinoken yó kem hohon le mò gemlà kul.

⁸ Yó udél Dwata, monen, “Bè yóm kdaw yó, angat gotu tnafaku yó kem tau malak bè Juda, dalang se yó kem ngà tau hol geta genlal. Ne gotu homong tnafaku yóm kdéen tau gel lemolò yóm kul kmò kehtahu yó kem tau bè tólóng benwu.

⁹ Tahu se, angat tnafaku yóm kdéen tau deng lemolò du yóm kul gel lolò yó kem tau là deng temngón dou, kkólen bè yó kem tau gel mnagaw ne gel monok, gel hennok le yóm gónô amo le yóm gel hennagaw le.”

¹⁰ Yó bud udél Dwata, monen, “Bè yóm kdaw yó, angat wen tey lemangat gungol ye lemwót gu bè yóm Tikeb Utón Él bè Jirusalim. Tódô wen dmumu mkik gungol ye lemwót gu bè Misné, yóm lomi benwu lemnek glem lem Jirusalim ne wen tey uni gbà gungol ye lemwót gu bè yó kem bulul lemnek bè yó.

¹¹ Hol ye dmumu mkik se kuy yóm kdê ye nô lem fedyan, abay se gotu le matay yó kem tau gel hembalù lem blóng ye.

¹² Bè yóm kdaw yó, angat wen solok nwitu mò soloku bè yóm gónón alì kmifu bè Jirusalim, hnebelu yó kem tau alì hmingay du yóm kegsalà le. Yó gel hendem le, ‘Laen kô dù hyu nmò Dwata bélê me ne laen se dù sidek nmoen.’

¹³ Yóm kul kimu yó kem tau yó, angat gotu negef yó kem hohon le ne yó kem gónô le gotu genbà le. Ke hdà le gónô, là kô le gnô lemen. Ke hmulu le grép, là kô bud ginum le du tifasen.

¹⁴ Deng moni ne yóm hol kun kdaw Dwata, yóm kdaw alì knikò. Deng tey moni ne yóm kdaw yó, lelen alì meslò. Hnungol ye, balù yó kem sendalù alì lóbô, sana klangat le. Hol kdawen héét yóm kdaw yó.

¹⁵ Yó se yóm kdaw kehton Dwata du yóm alì ksidek kebuten, kdawen alì glayam tau, kdaw le meglà, laen kô dù bud gmò le, kdawen alì mget kkifuhen, kdawen alì mget klobunen,

¹⁶ kdaw ye mungol uni féw gemduf kem sendalù hohon ye. Tódô hnusek le yó kem syudad mgemel beng hilolen.

¹⁷ Lemwót bè yóm deng kegsalà le béléu yó kem dou tau, lómó kmou kul, lómón ke lu yóm tau butô, sónmoen migóf mebel lanen. Angat tódô dmanag lem kfung yóm litô le ne yóm lówó le tódô lagas te tonok.”

¹⁸ Bè yóm kdaw alì kebut Dwata kul yó, laen kô dù lanen lemwà kul yó kem blówón bukay le ne yó kem tahu blówón le. Yóm kebut Dwata kul yó hol lómón ke ofi, angat gotu kenen yóm klamang tonok. Angat kendel nmoen són le yóm kdéen tau talak tonok.