Rut 4 - Udél Dwata: Gna Kesfasad ne Lomi Kesfasad

Kyehen Buas ke Rut

¹ Lemwót ke Buas kun, mógów ebè yóm gónó le gel stifun bè bak tikeb yóm benwu yó ne bè yó gónón myón. Ominen mton yóm tau tehe monen hol moni bè Ilimélék, yóm tau tehe tulónen ke Rut ne tnabahen, monen, “Ó Wè, mógówi edini kun nam e myón.” Tahu se, mógów ebéléen, ne myón.

² Omin Buas tmaba sfolò bè yó kem tau mogot kukum bè yó ne hyónen lu bè yó se kul. Bè yóm deng gotu kyón le,

³ omin Buas mudél ebè yóm dumuhen yó koni, monen mò du, “Bè yóm deng kkól Numi gu bè Muab, tô hbaluen yóm tonok tehe yehenen Ilimélék, yóm kut dumu.

⁴ Ne hyu béléu ke tngónem nim ni. Ke móyói bemli du, tulónem do bè yóm igò le hmungol ni kem tuha myón bè ni nii. Okóm ke là móyói, tódô monem. Wen hol kwalisem bemli du se kóm lemwót bè yóm hol kesloni ye tum deng matay. Okóm ke là móyói, tódô o ne bemli du.” Ne mudél yóm tau yó koni, monen, “Yó ne yó. Ou ne bemli du.”

⁵ Ne yó bud balà Buas du, monen, “Ke tahuhi móyô bemli du yóm tonok Numi tu, là hyuhen ke là homongem ke Rut yóm libun bolu lemwót bè Muab, anì wen dung lówó tum tau deng matay ne anì wen ngaen béléem mò tles bud mfun yóm tonok le.”

⁶ Okóm mom yó bud udél yóm tau yó koni, monen, “Ke lómón yó kmoen, blayu kóm ne yóm dou kwalis tô bemli yóm tonok yó. Tódô uu kut ne bemli du. Baluen ke ou bemli du, là kô gfun le du yó kem dou ngà. Hyu nawaw là kem bemli du ne.”

⁷ Yó sana kul gel adat yó kem tau bè yóm kdaw yó, ke wen bélê le seblay tonok, lemwót yóm tlumfà yóm tau bemlay tonok homong oguhen yóm tau gónón e bemlay du yóm tonoken mò gónón tahu yóm deng keblayen du du.

⁸ Duhen yó, yóm igoen mon du mò ke Buas yóm tau yó koni, “Tódô uu kut ne bemli du,” henmungen se ma yóm tlumfaen ne oguhen ke Buas.

⁹ Ne omin Buas mudél ebè yó kem tuha nô bè yó ne ebè yó kem dumu tau nô bè yó, monen, “Yu mò gemtanud du yóm keblihu du bè Numi yóm tonok tehe yehenen Ilimélék ne yó kem lewu ngaen Kilyun ne Malun.

¹⁰ Ne sotun, ou ne myehen ke Rut yóm libun bolu tehe yehen Malun, libun lemwót bè Muab. Ke wen ngà me, du se tles mfun yóm tonok tehe tebel Malun anì là lanahen bè kun fes lówó yóm tonoken yó. Ne là lanahen yóm kun sfu lem blóng yó kem kun tau ne bè yóm kun benwu. Yu deng gemtanud du nim kemdaw ni.”

¹¹ Ne mon yó kem tuha ne kem dumu tau hmungol du, “El, mi se deng gemtanud du. Dwata he hol hból lówóhen yóm libun yehenem lómón yóm tehe kehbólen lówó le Rakél ne Liya yó kem libun alì wen ngà Jakub bélê le. Balingi kwasa he lem blóng yó kem kóm kwen kem tau semfu bè Ifrat ne balingi tótól he bè ni bè Bitlihim.

¹² Yó kem ngà angat blay Dwata kóm sut gu bè nim libun hanà lomi ni, hol le mkél bè yó he kem kun kwen tehe fes lówó Pérés yóm ngà Juda lewu le Tamar.”

Yó kem kun sfu Buas

¹³ Duhen yó, nwit Buas Rut ebè gónóen mò yehenen. Mlan bè yóm któbóng Dwata ke Rut, ominen mlutut ne mngà logi.

¹⁴ Ne yó mon le mò ke Numi yó kem libun bè yóm benwu yó, “Hol dóyón tekuy Dwata bè nim béhem deng blayen kóm kemdaw ni mò angat semgyok kóm. Hol angat tótól bè yó kem tau bè Israél he nim ngà logi ni.

¹⁵ Tey kbong nawahen kóm yóm towuhem. Anien he ke deng tehe hitu ngaem logi, botong kéng he yóm kul nawa kóm senta yóm kun nawa kóm nim towuhem ni. Ne ni, wen béhem béléen mò bemlay kóm lomi klowil ne mò semgyok kóm bè yóm deng ktuhahem.”

¹⁶ Omin Numi ma du yóm ngà ne sniwihen ne tey kesgifaen du.

¹⁷ Ne yó fen mò boluyen yóm ngà yó, yó kem libun dumu le sebét. Yó boluy le du Ubid. Ne yó gel tulón le bè yó kem dumu tau, mon le, “Deng wen ngà Numi logi.” Tikóng deng myehen Ubid ne mngà, duhen Jisi yóm mà Dabid.

^18-22 Ni se kmò kesektolen lenwóten bè Pérés kól bè Dabid: Yóm Pérés, mà Hisron. Yóm Hisron, mà Ram. Yóm Ram, mà Aminadab. Yóm Aminadab, mà Nasun. Yóm Nasun, mà Salmun. Yóm Salmun, mà Buas. Yóm Buas, mà Ubid. Yóm Ubid, mà Jisi. Ne yóm Jisi, mà Dabid.