Rut 3 - Udél Dwata: Gna Kesfasad ne Lomi Kesfasad

Kebel Numi yehen Rut

¹ Sotu kdaw bè yó, yó mon Numi mò ke Rut, “Tey là hyuhen ke là mebele béléem tengebem, Yô, anì wen kóm fes lówó.

² Yóm Buas gónó le mò nmò yó kem libun gónóm gel mung hol kut dumu. Ni hnungolem. Kifu ni kedeng kkusuhen halayen.

³ Yó nmoem, nahem ne dyo ne lumangem bè lówóhem yóm gel hboo ne lesekem yóm nes alì tilobem. Ominem mógów etu bè gónó Buas kmusu. Bede béi tagad hegfan béléen gu laanen là deng mken.

⁴ Hol hnénégem gónón seblà hlilil ne ke deng tungô, yó he kógówem ebéléen ne tnukéhem tum kumù limun bè tihen, ominem hlilil bè yó klohok tihen ne limunem se kóm yóm kumuen yó. Ke deng btik, angat tulónen kóm he yóm angat nmoem.”

⁵ Omin Rut mon du, “Tódô lolou, Wê Libun, yóm deng hlauhem do.”

⁶ Ne tahu se, yóm kifu yó lemwót Rut ebè yóm gónó Buas kmusu, gotu loloen yóm deng hlau tuónen du.

⁷ Tikóng deng kken Buas, tey klaan nawan. Ominen lemwót tungô, hlilil klohok yóm sigang halayen. Omin Rut hganag mógów ebè yóm gónón masà, tnukéhen yóm limun bè tihen ne hlilil bè yó klohok tihen, limunen yóm kumù Buas.

⁸ Ne dmemen Buas bè yóm kifu yó, ominen beklil. Tódô tonen yóm libun hlilil klohok tihen, ya tey ketngahen.

⁹ “Tau kóm de?” Mon Rut se, “Ou, Sér, Rut. Lemwót bè yóm hol kesdumu ye tum tuónu libun, là móngóhen ke uu mò bud semgifà do. Yó gónóm mon, uu mò dung lówó yóm tehe yehenu deng matay.”

¹⁰ Omin Buas mon du, “Dwata he hol kmudung kóm. Bè nim nmoem ni, hol gónón gfan yóm kbong nawahem ke tuónem ne yó kem tehe fes lówóhen senta yóm tehe nmoem béléen. Là móngóhen béléem ke deng wen dumu logi là dengen tuha hnebelem mò yehenem, kihu ke wen kendengenen duhen ke là. Okóm là kem dog nmoem du.

¹¹ Duhen ni, Rut, béem htafa nawam, nmou yóm kdê kóyóem. Deng gotu tngón yó kem tau bè nim benwu ni yóm tey kgulit knawahem.

¹² Tahu se, monihe bè yóm tehe tuónem ne dou snolu yóm semgifà kóm. Okóm wen sotu tau alì moni sentahu bè yóm tehe tuónem yó.

¹³ Nam tódô nô bè ni sen nim kifu ni. Hlafus haya mógówe ebéléen naw e stulón du, hnénég ke móyô semgifà kóm. Ke móyô bong hyu. Là ke là, ou ne. Dwata mungol du nim monu ni yóm Dwata hlós mowil. Nam na bud hlilil bè ni efet mwas.”

¹⁴ Tahu se, tódô hlós hlilil bè yó Rut klohok ti Buas. Okóm tódô hlafus btik gu laanen là deng minal mwas anì laen dù tau mton du, abay se là móyô Buas ke wen tau temngón du yóm knóen bè yó.

¹⁵ Yó mon Buas mò du, “Lennalem bè ni kumuem.” Tahu se, lennalen. Botong sóól sakù halay kok Buas tahen, ominen tmóbóng mkay du eta kuluhen. Ne mulék ebè tuónen Rut.

¹⁶ Yóm kkólen bè gónô, snólók tuónen, “Na Yô, mò kmoen se?” Ne gotu tulón Rut du yóm kdê mon Buas mò du.

¹⁷ Ne bud mon Rut, “Bè yóm keblayen du do nim halay ni koni, monen mò do, ‘Béi tódô mulék hkawang ke laen dù nwitem bè tuónem.’ ”

¹⁸ Tikóng gungol Numi yóm yó, monen, “Nam hanay nawam, Yô, efet tngón te mò kmò Buas du. Là kóen na a hegnô kemdaw ni ke là nan tngón du sónen.”