Rut 2 - Udél Dwata: Gna Kesfasad ne Lomi Kesfasad

Koyok Rut bè dnadu Buas

¹ Bè yó bè Bitlihim, wen sotu tau boluyen Buas yóm dumu Ilimélék tehe yehen Numi. Nim Buas ni, tey wen kendengenen ne tótól.

² Sotu kdaw, mon Rut mò ke Numi, “Ke yó dum hyu béléem, Wê Libun, lelene tô moyok dé. Wen he yó tau móyô hoyok dou bè dnaduhen.” Mon Numi se mò du, “Duónen se, Yô, ke móyói.”

³ Tahu se, kewót Rut bè yó ne sut bè yó kem tau muta ne mung huli kul nan e moyok. Uma kóm ke Buas funen yóm nuta yó.

⁴ Là legenen bè yó, kulel se kun kkól Buas gu bè Bitlihim ne mudél ebè yó kem tau mò nmò béléen, monen mò kul, “Dwata he nô bélê ye.” Mon le se kul, “Dwata he hol tmóbóng kóm.”

⁵ Omin Buas smólók yóm tau gónón smalig du yóm nutahen, monen mò du, “Ngà libun du tu duu?”

⁶ Monen se mò ke Buas yóm tau yó, “Libun lemwót bè Muab mung ke Numi bè yóm kuléken.

⁷ Deng mbal béléu bè yóm khulihen yó kem tau muta anì nan e moyok. Deng nbuten hlafus ne moyok, hanà lomi hgolung bè slung koni.”

⁸ Omin Buas mógów ebè Rut ne monen mò du, “Ó Ngà, ni wen hlauhu kóm. Béi bud moyok eddoli ne. Tódói gel mung bè yó kem libun mò nmò béléu bè ni.

⁹ Tenngelem gónó le gel seblà muta anì hulihi kul. Denge mudél bè yó kem logi anì là kneyek le kóm. Ke meengi, tódói minum bè yóm lebwón deng hennok le él bè ni.”

¹⁰ Tódô mtud bukol bè soluhen Rut, yóm uyóhen botong gefet bè tonok ne monen mò ke Buas, “Kiholem hemdem do ne yóm tey kehyu nawam ebéléu, igou tólóng libun?”

¹¹ “Tahu se,” mon Buas, “okóm deng gotu gungolu yóm kdê deng nmoem bè tuónem libun kogol yóm deng katay yehenem. Glokem tódô tmebel ke maem ne yéem ne yóm kóm benwu, nam e tódô nô lem blóng yó kem tau tehe là deng kóm tngón du.

¹² Dwata he hol bemlay kóm ofol bè nim deng nmoem ni. Yó hem Dwata yó kem tau Israél, yóm Dwata gónóm deng hofin, hol bemlay kóm yóm ofol là deng sulék tonem du.”

¹³ Bud mon Rut mò du, “Tey kat kehyu kmoem ebéléu, Sér. Hol udél hemyu nawa yóm udélem ebéléu yó, igoen là kóe senged bè yó kem tau gel dókem. Olohu tau moyok néen dou.”

¹⁴ Timbow le mken kemdaw, omin Buas tmaba ke Rut, monen mò du, “Ó Ngà, géhéli ne mahi se kóm yóm mambang ne duem lem sóbów.” Tahu se, seyón mken bè yó kem tau muta Rut. Omin Buas mogu du ebéléen yóm knuhom. Tódô mken Rut efet bsow ne wen he dù lukas ken tebel béléen.

^15-16 Tikóng deng bud lemwót moyok Rut, yó mon Buas bè yó kem tau muta, “Tódô bayà hoyok ye bè tu kem tolo gónón wen halay masà ne bê ye abay mom bnólów. Ne ma ye bè yó kem logom ye ne tebel ye béléen mò tnù yóm noyoken.”

¹⁷ Ngang Rut mò du moyok efet deng kimel, ominen kmusu du. Botong gbut sakù usoken.

¹⁸ Ominen mit du mulék ebè gónô yóm noyoken ne toloken ke tuónen. Bud blayen ke Numi he yóm tehe dù lukas kenen.

¹⁹ Omin Numi smólók du, monen, “Gónóm moyok kemdaw ni du, Yô? Tey wen nitem ni! Dwata he hol tmóbóng du yóm tau alì masa kóm ni.” Tahu se, tulón Rut ke Numi yóm koyoken bè dnadu yóm sotu tau boluyen Buas.

²⁰ Yó mon Numi, “Tey, Dwata he hol tmóbóng ke Buas, yóm Dwata sal tendo gel dnohoen yóm fasaden yó kem tolo mowil, dalang se tu kem deng matay.” Ne bud wen tulónen ke Rut, monen, “Yóm tau yó, tey moni kdumu tekuy du ne là móngóhen ke du fen semgyok kut.”

²¹ Bud mon Rut, “Yóm alì hyu du, yó monen mò do, tódóe hlós moyok bè dnaduhen kun efet kdeng yóm nuta.”

²² “Tahu se, Yô,” mon Numi. “Mom hyu he ke bè yó gónóm henek moyok mung bè yó kem libun gel mò nmò béléen senta ke moyoki eddoli, déke mom kneyek le uu.”

²³ Duhen yó, tódô kem ngang Rut moyok bélê le efet kgotu yóm kdê nuta Buas. Ne tódô henek nô bè tuónen.