Rut 1 - Udél Dwata: Gna Kesfasad ne Lomi Kesfasad

Kili Ilimélék ne yó kem fes lówóhen ebè benwu Muab

^1-2 Tehe yu ekni, bè yóm kdaw là deng wen tau hol geta mogot bè Israél he, wen tey bitil bong bè yóm benwu yó. Wen sotu tau boluyen Ilimélék nô bè yó, semfu gu bè yóm tehe Ifrat. Nim Ilimélék ni, menwu bè Bitlihim yóm benwu snakuf Juda. Yó boluy yehenen, Numi. Ne wen lewu ngà le logi duhen le Malun ne Kilyun. Yó nmò le, mili le ebè yóm sotu benwu boluyen Muab na le e hlun menwu ditu, bà mon yóm tey bitil bong bè Bitlihim. Bè yóm deng knô le ditu

³ matay Ilimélék, tek són Numi tebel ne yó kem lewu ngaen logi.

⁴ Deng malù legen udì bè yó, myehen le bè yó kem libun Muab yó kem lewu ngà le logi yó. Yó boluy le yó kem libun yehen le Urpa ne Rut. Timbow deng sfolò halayen yóm kegen le nô bè yó

⁵ matay Malun ne Kilyun. Tek són Numi dù tebel laen dù yehenen ne laen dù ngaen logi.

Kulék Numi ne Rut ebè Bitlihim

⁶ Timbow legen udì bè yó, gungol Numi yóm tey bud któbóng Dwata yó kem tauhen, yóm tey kehbunguhen yó kem hulu le. Yó gónón htifes mulék ebè yóm kun benwu, mung du yó kem lewu towuhen.

⁷ Okóm bè yóm tolo knô le bè lan bè yóm kulék le ebè Juda,

⁸ yó mon Numi bè yó kem towuhen, “Yake mulék ye ne ebè yê ye. Tey gel kehyu nawa ye ebéléu ne ebè yó kem tehe yehen ye deng matay, hol lómón se yó ne yóm bud kehyu nawa Dwata ebélê ye se kuy.

⁹ Dwata he hol tmóbóng kuy mebel yóm angat bud yehen ye anì wen gónó ye henek nô.” Omin Numi sket melek kul, okóm deng le mom mkik yó kem towuhen,

¹⁰ mon le mò du, “Bê. Tódô me mung kóm ebè yó kem kóm dumu.”

¹¹ Ne yó bud mon Numi mò kul, “Là, kem Yô, mom hyu he ke tódô ye bud mulék. Moen du ke tô ye mung do? Ilóem ofo kuy kô ke bud wen ngau logi mò hyehenu kuy?

¹² Yake mulék ye ne, yakà denge tey tuha là buden hyu béléu myehen. Anien he ke tóe myehen kifu ni kedeng ne anien he ke wen bud ngau logi,

¹³ gbek ye kô mangat kul efet kbong le? Ke yó tô hendem ye, mom kuy gónó là gyehen bè dumu. Neet he, kem Yô. Deng knogolen o Dwata ne tey gkoduhu yu.”

¹⁴ Omin le bud skik. Omin Urpa lemkef melek ke tuónen ne lemwót mulék. Okóm yó dum ke Rut kun, là kô kóhen du yóm kekefen ke tuónen.

¹⁵ Yó mon Numi mò du, “Na Yô, tódô dnalangem dé yóm dumum seway, tódô mulék ebè tu kem kun dumu ne bè yóm kun dwata. Yake lemwóti ne slomongi du.”

¹⁶ Mom yó balà Rut du, monen, “Béem tô hulék ou, Wê Libun. Munge kóm. Balù nô gónóm e solu elese mung kóm. Balù nô gónóhem nô nóe bè yó se dou. Yó kem kóm tau baling dou tau. Ne yóm kóm Dwata bud yó se baling dou Dwata.

¹⁷ Bè yóm benwu angat gónóm matay bè yó se do gónó matay ne bè yó se gónó le lembeng do. Són hatay néen gembek semkó do béléem. Dwata he hol tmafak do ke wen dumu but gónóhu skó béléem.”

¹⁸ Bè yóm kton Numi du yóm hol kewóten lem but blutut Rut yóm kmungen du, yó gónón laen dù bud kmonen du.

¹⁹ Omin le yó tódô hlós lemwót efet le kól bè Bitlihim. Bè yóm kkól le bè yó, ya tey sidek ketnga yóm kdéen tau bè yóm benwu yó. Yó mon yó kem libun, “Numi kô mni?”

²⁰ Okóm mom yó balà Numi kul, monen, “Bê ye bud boluy do Numi ne. Yó tles boluy ye do Mara abay se deng tey kehféét Dwata klowilu.Bè yóm tehe kewótu gu dini, tey hyu klowil me. Okóm ni, tódô hulék Dwata o hkawang yóm Dwata alì gembek. Yó gónó ye là bud tmaba do Numi, yakà deng wen hegfà Dwata do yóm Dwata alì gembek ne deng tey sidek yóm hegnómen do.

²¹ Bè yóm tehe kewótu gu dini, tey hyu klowil me. Okóm ni, tódô hulék Dwata o hkawang yóm Dwata alì gembek. Yó gónó ye là bud tmaba do Numi, yakà deng wen hegfà Dwata do yóm Dwata alì gembek ne deng tey sidek yóm hegnómen do.”

²² Ni se kmoen yóm tehe kkól Numi gu bè Muab ne Rut, yóm towuhen. Yóm kkól le bè Bitlihim, tolo lel le mbut muta yó kem tau bè yó.