Sulat Pol Ebè Yó Kem Tau Hemtahu Bè Rom 9 - Udél Dwata: Gna Kesfasad ne Lomi Kesfasad

Yó kem tau deng nélék Dwata mò kun tau

¹ Wen sotu tulónu kuy, là moe kéng bélê ye abay se ou sotu tau nfun Krays tendo galak kehedemu bè yóm Tulus Dwata.

² Yó tulónu kuy ni, yóm là keskóhen yóm alì ksidek kegnómu du

³ bè yó kem dou dumu Ju, yó kem tau hol dou litô. Sidek kegnómu du abay se là kô le hemtahu bè Krays. Ke yó dum gmò, mom hyu dé ke ou fen tnafak Dwata mò tles lówó le, ne ke ou fen glayuk bè Krays anì lu yóm gewà gu lem tafak.

⁴ Lu se kem Ju deng néléken mò kem ngaen. Tehe tódô hegfan lem blóng le mlan bè yóm tey keDwatahen. Dê duléken mò fasad bélê le ne blayen bélê le yóm kun hlau hlanen bè Musis. Tey mtukul ktoloken du kul yóm kmò ktaba le ebéléen. Ne tey dê yóm fasaden kul.

⁵ Tey tótól yó kem tehe fù le. Bud bè kul lugod snéen gónón sut Krays bè yóm kbalingen tau. Hol knóón ke laen dù sónen yóm kdóyón tekuy ke Dwata, yóm fen mogot yóm klamangen.

⁶ Bè yóm tehe fasad Dwata kul yó, là monu du dé là dohoen. Okóm yó monu, là kdéen du tau semfu gu bè Israél ke hol kun tau Dwata.

⁷ Senged se ke tehe Abraham ekni, là kdéen du tau semfu gu béléen ke hol kun tau Dwata. Lómón yóm tehe mon Dwata mò ke Abraham, monen, “Hlanu bè yóm ngaem Isak yóm fasadu kóm bè kwen yó kem angat lugodem.”Yó lanen yóm mon Dwata yó, là mlanen bè yóm kun óyô mngà Abraham yóm ngà nélék Dwata, okóm hol mlan bè yóm ngà tehe fasad Dwata du.

⁸ Yó lanen yóm mon Dwata yó, là mlanen bè yóm kun óyô mngà Abraham yóm ngà nélék Dwata, okóm hol mlan bè yóm ngà tehe fasad Dwata du.

⁹ Ni se yóm tehe mon Dwata bè yóm fasaden ke Abraham, monen, “Halay hulin bude mógów edini ne angat mngà logi Sara, yóm tuha libunem.”

¹⁰ Yóm ngà Abraham yó, duhen yóm fù tekuy Isak. Yó yehen Isak, duhen Ribika yóm mngà héng, boluy le kul Jakub ne Iso.

^11-12 Okóm tek sotu nélék Dwata bélê le mò gónóhen hlan du yóm fasaden. Gu laan le là deng sut yó kem ngà Ribika yó, là deng wen kem tngónem nmò le hyu he duhen ke sidek, yó mon Dwata mò ke Ribika, monen, “Yóm twogu angat glaan bè yóm twoli.” Bè yóm nmò Dwata yó, yó se gónó tekuy temngón du là kóen lemwót bè yóm kehyu nmò yóm tau gónó Dwata mélék du, okóm tódô néléken yóm kun kóyô.

¹³ Lómón yóm sotu deng mon Dwata bè sulaten, monen, “Jakub yóm kenbong nawahu, fen kenbéu Iso.”

¹⁴ Mò kmon tekuy du nim nmò Dwata ni? Déke hendem tekuy là tedengen yóm kmò Dwata abay se fen mtukul néléken. Là kô yó du.

¹⁵ Ngem yóm deng mon Dwata mò ke Musis ekni, monen, “Tódô lemwót bè dou kóyô mélék du yóm tau knoduhu ne yóm tau kenbong nawahu.”Yó gónóm mon, là kóen lemwót bè kun kóyô yóm tau duhen ke bè kun nmò gónón lemwót yóm kkodu Dwata du. Okóm tódô lemwót bè yóm kun kóyô Dwata kmodu du.

¹⁶ Yó gónóm mon, là kóen lemwót bè kun kóyô yóm tau duhen ke bè kun nmò gónón lemwót yóm kkodu Dwata du. Okóm tódô lemwót bè yóm kun kóyô Dwata kmodu du.

¹⁷ Lómón yóm tehe kélék Dwata yóm sotu tau hol geta bè Idyip ekni. Tehe mon Dwata mò du, monen, “Lemwót béléu yóm kegetahem mogot benwu anì angat gfan béléem yóm dou kegbek, ne anì glalag bè klamangen benwu yóm dou boluy.”Ne duhen yó, bong knodu Dwata yó kem tau nóyô knoduhen, ne hgelen kulu yó kem tau nóyô hgelen kulu le.

¹⁸ Ne duhen yó, bong knodu Dwata yó kem tau nóyô knoduhen, ne hgelen kulu yó kem tau nóyô hgelen kulu le.

Wen se tau lenbut Dwata, ne wen se knoduhen

¹⁹ Déke wen malà du yóm monu yó koni, kô monen, “Ke yó se kmò Dwata du, moen ke dnuónen kem tau igò le là gembek kembê du yóm kun kóyô?”

²⁰ Ni se balau du yóm monem yó, “Tmau kóm de tô gembek smabà ke Dwata? Là gbek yóm kuleng tonok smabà yóm tau mifil du, ke monen ‘Moen ke lómón ni kifilem do?’ ”

²¹ Ngem yó dém tau gel mifil kuleng, kihu kun kóyô gónó e hembaling du yóm nifilen. Kun kóyô ke sentólóngen yóm nifilen. Wen se nifilen mò gel henyu ne mtukul kdikót du, ne wen se nifilen yóm senflós tendo wen mu du.

²² Senged se bè Dwata, ke kun kóyô htonen yóm tey kebuten ne yóm kegbeken bè yó kem tau gel mulé du, duhen ke nan bud hanay nawahen ebélê le, balù yóm deng kegtuled le.

²³ Yó gónón mò du nim ni mò gónón hegfan yóm tey alì kehyu kmoen ebélê tekuy kem tau deng knoduhen, kem tau deng eles néléken mò angat megdóyón béléen.

²⁴ Duhen tekuy se yó kem tau deng tnabahen. Là sónen du kem Ju tnabahen, okóm gomong le snéen kul yó kem tau là Ju le.

²⁵ Nim ni koni, deng tehe hsulat Dwata bè yóm sotu tehe tugoden boluyen Husiya, yó monen, “Angat le baling dou tau yó kem tehe là dou tau du. Angat le baling dou tau kenbong nawa yó kem tau tehe là wen nawahu ebélê le.”

²⁶ “Ne bè yóm benwu tehe gónóhu gel mon du, ‘Là dou tau du yó kem yó’ bud bè yó gónóhu mon du mò kul, ‘Yu se hol kun ngà Dwata, yóm Dwata laen dù tul katayen.’”

²⁷ Wen se kun udél tehe snulat Isaya ekni gbak ebè yó kem tau Israél, monen, “Balù yóm tey kwadag tau semfu bè yóm tehe Israél, lómó kwen le, lómón helek bè kilil mohin, ewenem là kô le hol wen gewà bè yóm angat ktafak Dwata kul.

²⁸ Abay se angat wen kdaw Dwata kendel smolò du yóm kegsalà tau bè klamangen benwu, ne gotu tnafaken lu.”

²⁹ Hol lómón yóm sotu tehe tulón Isaya ekni, yóm monen, “Bè yóm tehe ktafaken tekuy yóm Dwata laen dù là gbeken du, ke tehe là wen dù tebelen bè yó kem ból tekuy, deng tekuy mkél bè yóm tehe kegbaen yó kem syudad Sodom ne Gomora. Bà udì ke wen dù tebel bélê le.”

Kekbê kem tau Israél yóm lan nmò Dwata mò lan le gewà gu lem hatay

³⁰ Duhen yó, yó kem tau là Ju le, là kô ktes le du yóm ktedeng kton Dwata kul, okóm guta le lan le hemtahu bè Jisas.

³¹ Okóm yó kem tau Israél alì kemtes yóm ktedeng kton Dwata kul, tô hlan le bè yóm klolò le yóm hlau Musis. Okóm là, là kô guta le du yóm tô ktes le yó.

³² Yó gónón là tedeng kton Dwata kul abay se là hlan le du bè yóm kehtahu le. Deng mom tô hlan le bè yóm kul kegbek lemolò du yó kem hlau. Deng le mom glokob du yóm bnoluy Dwata “botu”

³³ yóm tehe tulónen bè sulaten, yóm monen, “Ngem deng wen botu suu lem blóng le bè syudad Sayun. Yó se yóm botu geslob yó kem tau, ne hlós le glokob du. Okóm yóm tau hemtahu béléen, là kô wen gónón gsel du.”