Sulat Pol Ebè Yó Kem Tau Hemtahu Bè Rom 5 - Udél Dwata: Gna Kesfasad ne Lomi Kesfasad

Yóm lan tekuy mit sefyu ebè Dwata

¹ Duhen ni, deng baling tedeng ne kton Dwata tekuy mlan bè yóm kehtahu tekuy. Deng tekuy sefyu ke Dwata mlan bè Jisas Krays yóm gónó tekuy mogot.

² Lemwót bè yóm kehtahu tekuy béléen, deng wen ne lan Dwata tmóbóng tekuy. Tey kligal tekuy yóm angat kwen kut du yóm kun kehyu Dwata sok tekuy gefet bè longit. Yó se hendón nefet nawa tekuy nim kmoen ni.

³ Là kô són du yó gónó tekuy hligal bè yóm angat kwen guta tekuy, okóm hligal tekuy du snéen yó kem gónó tekuy glayam. Yó uléken yóm keglayam tekuy yó, duhen yóm kegbek tekuy hbala.

⁴ Ne yó bud uléken yóm kehbala tekuy yó, duhen yóm kehyu nawa Dwata ebélê tekuy. Ne ke hyu nawa Dwata bè yóm kmò tekuy, yó gónón temnù kgel nawa tekuy du yóm hyu hendón tekuy yó.

⁵ Angat dohò kguta tekuy du yóm hendón tekuy yó, abay se deng gotu gnóm tekuy ne yóm kbong nawa Dwata tekuy, hlanen bè yóm Tulusen deng basahen tekuy.

⁶ Yóm tolo knô tekuy lem salà, là kô gbek tekuy lemwà knô tekuy. Okóm bè yóm kehto yóm buteng Dwata du, fen tódô matay bélê tekuy Krays.

⁷ Bélê tekuy, balù sentnga ktedeng kmoen yóm sotu tau, tey mgel ke fen tekuy tô matay béléen mò leyu lówóhen. Là tngón tekuy du, déke wen se tau gembek mò du.

⁸ Okóm ke Dwata kun, deng hegfanen yóm tey kbong nawahen tekuy bè yóm tehe le khógówen ke Krays edini, mò fen matay bélê tekuy igò tekuy tolo gemsalà.

⁹ Ke deng fen hamà Jisas yóm kun litô anì baling tedeng kton Dwata tekuy, milud he yóm angat kehewaen tekuy gu lem yóm tafak Dwata bè yóm hol són kdaw.

¹⁰ Tey tehe kesfohon tekuy ke Dwata, okóm kun, niten tekuy sefyu hlanen bè yóm le katay yóm Ngaen. Duhen ni, bè yóm deng kesefyu tekuy ke Dwata, milud he bud któbóngen tekuy hlanen bè yóm deng bud kehlowilen ke Krays.

¹¹ Okóm là sónen du yó gónó tekuy hligal. Hligal tekuy bè yóm deng nmò Dwata hlanen bè yóm gónó tekuy mogot Jisas Krays, duhen yóm deng kesefyuhen tekuy ne Dwata.

Adam ne Krays

¹² Bè hol kbuten, lemwót bè kegsalà Adam gónón wen salà lem benwu. Lemwót bè kegsalaen gónón wen hatay. Ne yó gónón lemwót matay kdéen tau abay se gotu le gbót gemsalà.

¹³ Gu laanen là deng wen hlau hlolò Dwata kul, deng kem gegna ne yóm kegsalà tau. Okóm là deng snolò Dwata du bélê le he yóm kegsalà le yó, abay se là dengen wen hlau hloloen kul.

¹⁴ Okóm nbuten bè kun kdaw Adam ekni efet kól bè kun kdaw Musis, gotu le matay yóm kdéen tau lemwót bè yóm kegsalà le. Yóm tehe kun salà nmò Adam, nuléhen yóm hlolò Dwata du. Baluen he ke là sengeden yóm kul salà nmò yó kem dumu tau, senged gotu katay le snéen. Bong ke Adam kun, lómón ke olung yóm tau hendón nangat le, duhen Krays, abay se sket wen guta tau bélê le.

¹⁵ Okóm là sengeden yóm guta tau bélê le. Yóm alì hyu guta tau lemwót bè yóm tódô basa Dwata, duhen Jisas Krays, okóm tólóng se guta le lemwót bè kun kegsalà Adam, duhen hatay.

¹⁶ Ne sotuhen, là senged nefeten yóm tóbóng Dwata ne yóm là kimón Adam. Yó nefeten yóm ke Adam, duhen yóm tafak Dwata laen kô dù tul sónen. Okóm yó nefet yóm kun tóbóng Dwata hlanen bè Jisas Krays, duhen yóm kehlifóten salà yó kem tau, balù yóm tey kdê salà nmò le.

¹⁷ Tahu se, lemwót bè yóm salà yóm sotu tau, yó gónón wen hatay. Okóm yóm kun nmò yóm sotu tau, duhen Jisas Krays, tódô kdéen tau gmuta yóm tey basa Dwata duhen yóm ktedeng kton Dwata kul. Blayen kul yóm klowil laen kô dù tul sónen, ne angat le gomong bè Krays mogot benwu.

¹⁸ Ne duhen yó, lemwót bè yóm sotu salà, yó gónón megtafak kdéen tau. Okóm bud lemwót bè yóm sotu nmò hyu, yó gónón mkó ta le yóm kegtafak le yó, ne bè yó se gónó le gmuta yóm klowil laen kô dù tul sónen.

¹⁹ Lemwót bè yóm là kimón Adam gónón baling gemsalà kdéen tau. Ne lemwót bè kimón Jisas, yó gónón tedeng kton Dwata kul.

²⁰ Bè yóm tehe kehsulat Dwata du ke Musis yóm hlauhen, yó muhen mò fen hdilô du bè kem tau yóm salà le. Balù tennga kbongen yóm salà kem tau, mom milud he kbongen yóm kun tóbóng Dwata.

²¹ Duhen yó, yóm kegsalà tekuy, nwiten tekuy elem hatay. Okóm yóm kun tóbóng Dwata, nwiten tekuy tedeng anì hlós tekuy ebè yóm klowil laen kô dù tul sónen, hlanen bè yóm gónó tekuy mogot Jisas Krays.