Sulat Pol Ebè Yó Kem Tau Hemtahu Bè Rom 4 - Udél Dwata: Gna Kesfasad ne Lomi Kesfasad

Bè kehtahu Abraham gónón tedeng kton Dwata du

¹ Yake hol hendem tekuy yóm tehe Abraham ekni, yóm tehe fù tekuy kem Ju. Tedu but gónón tedeng kton Dwata du?

² Ke lemwót bè yóm kmoen du yóm hyu, wen gónón hton salù. Okóm là gbeken du hton salù bè solu Dwata.

³ Wen monen bè sulat Dwata gbak ebè Abraham, yó monen, “Tódô hentahu Abraham yóm fasad Dwata du, ne yó se gónón baling tedeng kton Dwata du.”

⁴ Ke wen tau mò nmò bè dumu tau, sal gel wen sukéyen. Ne yóm sukéyen yó, là kô nam e mon du basa le du, kaem bayad litegen.

⁵ Okóm tólóng kun yóm tau hemtahu bè Dwata. Tódô hentahuhen yóm kegbek Dwata hmifót salà yó kem tau gemsalà. Lemwót bè yóm kehtahuhen, yó gónón tedeng kton Dwata du yóm tau yó. Là lemwóten bè yóm gel nmoen.

⁶ Ni se yóm tehe tulón Dabid ekni. Tulónen yóm tey kehyu nawa yóm tau là snaligen du yóm kun nmò mò gónón tedeng kton Dwata du, okóm tódô snaligen yóm deng nmò Dwata béléen.

⁷ Ni se yóm tehe udél Dabid, monen, “Tey kehyu nawan yóm tau ke deng hnifót Dwata béléen yóm salaen, ne ke deng tódô kóhen tahen.

⁸ Tey kehyu nawan yóm tau ke là bud snolò Dwata du béléen ne yó kem salaen.”

⁹ Bè yóm kehyu nawa tulón Dabid yó, són ebè yó kem Ju deng tnulì kô gónón e gbak yóm udél yó? Là kô yó du. Bud gbak ebè yó kem tau là tnulì le snéen. Yó gónó tekuy temngón du nim ni, lemwót bè yóm Sulat Dwata deng tulónu kuy yó koni, yóm monen, “Tódô hentahu Abraham yóm fasad Dwata du, ne yó gónón baling tedeng kton Dwata du.”

¹⁰ Kilón de kmò Dwata du bè Abraham nim ni? Yó kmoen du, là deng blayen du he yóm hlau bè kehtulì yó. Deng sana tedeng ne kton Dwata ke Abraham.

¹¹ Deng gegna ne yóm kehtahu Abraham ke Dwata ominen yó he htulì. Hmò Dwata du yóm yó mò ilô yóm deng ktedeng ktonen du lemwót bè yóm deng kehtahu Abraham béléen. Ne duhen yó, lemwót bè yóm kehtahu Abraham ke Dwata, yó gónóhen baling mà kdéen tau hemtahu bè Dwata, baluen he ke là Ju le, ne baluen he ke là tnulì le. Tódô lemwót bè kehtahu le gónón tedeng kton Dwata kul.

¹² Ne senged se yó kem Ju deng hemtahu bè Dwata, yó kem tau deng tnulì, Abraham se mà le. Là lemwóten bè yóm klolò le yóm kehtulì Abraham, okóm lemwót bè yóm kdalang le yóm kehtahuhen gu laanen là deng htulì.

Kguta kem tau hemtahu du yóm fasad Dwata

¹³ Tehe yu ekni, wen fasad Dwata ke Abraham ne bè yó kem semfu gu béléen. Yó fasaden kul, lu angat mogot yóm klamangen benwu. Là kóen mlan bè klolò Abraham du yóm hlau Musis gónó Dwata hlan du béléen yóm fasad yó. Okóm mlan bè yóm kehtahuhen ke Dwata. Són yó se gónón tedeng kton Dwata du, són bè yóm kehtahuhen.

¹⁴ Ke són yó kem tau lemolò yó kem hlau Musis angat gmuta yóm fasad Dwata yó, ilóem laen kô dù muhen yóm kehtahu tekuy, dalang se yóm tehe fasad Dwata tekuy.

¹⁵ Lemwót bè yóm kwen hlau gónón wen tafak gu bè Dwata abay se là glolò tau du. Ke laen dù hlau laen se dù tau gemsalà.

¹⁶ Yó gónóm mon, tek sotu gónó tekuy gmuta du yóm fasad Dwata tekuy, són bè kehtahu tekuy béléen. Yóm fasad Dwata yó, tódô basahen yóm kdéen tau semfu gu bè Abraham. Là són du yó kem tau gel lemolò yóm hlau Musis, okóm gotu gomong snéen yó kem tau hemtahu lómón yóm tehe kun kehtahu Abraham. Abay se yóm Abraham, hol mà kdéen tau hemtahu bè Dwata.

¹⁷ Deng hsulat Dwata yóm tehe udélen ebè Abraham ekni, yóm monen, “Deng nmou uu mà yó kem tey dê kay but tau bè klamangen benwu.” Ne tahu se yó. Bè kton Dwata yóm kdéen tau hemtahu béléen, deng le gotu menmà bè Abraham ne. Nim Dwata gónó Abraham hemtahu ni, balù yóm tau deng matay, gbeken bud hlowil du. Balù kihu dlimunen, gbeken.

¹⁸ Bè Abraham kun, balù yóm là keglileben du yóm kehlan Dwata du béléen yóm fasaden yó, tódô hentahuhen, ne henlelen hemdón du yóm kdohoen ebéléen. Yó gónóm mon, du se baling “mà yó kem tey dê kay but tau bè klamangen benwu.” Hol lómón yóm monen bè Sulat Dwata, yó monen, “Angat dê semfu gu béléem, hol lómó kwen le blotik bè longit.”Bè yóm kdaw kfasad Dwata ke Abraham yó, móyónen gefet bè lematu ne halay Abraham, ne tódô tngónen là buden mngà. Lelen atil he Sara, yóm tuha libunen. Ewenem là kóen monol yóm kehtahuhen du yóm fasad Dwata du bè yóm angat kwen ngaen.

¹⁹ Bè yóm kdaw kfasad Dwata ke Abraham yó, móyónen gefet bè lematu ne halay Abraham, ne tódô tngónen là buden mngà. Lelen atil he Sara, yóm tuha libunen. Ewenem là kóen monol yóm kehtahuhen du yóm fasad Dwata du bè yóm angat kwen ngaen.

²⁰ Tódô henlelen hemtahu du, ne là kóen megewu nawan du snéen. Sónmoen minut temnù yóm kehtahuhen, ne tódô senflósen dmóyón ke Dwata.

²¹ Tey ken-gel nawan yóm kegbek Dwata dmohò du yóm fasaden béléen.

²² Lemwót bè yóm kehtahuhen, “yó gónón tedeng kton Dwata du.”

²³ Bè yóm tehe kehsulat Dwata du yóm yó, là olon hemdem ke Abraham,

²⁴ okóm mò gónó tekuy dmalang se. Yó gónón tedeng kton Dwata tekuy ke deng tekuy hemtahu béléen. Du se fen deng hlowil ke Jisas gu lem hatay yóm gónó tekuy mogot.

²⁵ Deng fen tódô hamà Dwata Jisas mò matay bè salà tekuy, okóm deng bud hlowilen gu lem hatay. Yó se yóm deng nmò Dwata mò gónón tedeng ktonen tekuy.