Sulat Pol Ebè Yó Kem Tau Hemtahu Bè Rom 11 - Udél Dwata: Gna Kesfasad ne Lomi Kesfasad

Kkodu Dwata yó kem tau Israél

¹ Wen snólóku, kenbê Dwata lu ne kô yó kem kun tau Israél? Là kô yó du. Anì sem ou ni duu tau Israél, semfu gu bè yóm tehe Abraham. Ne mfue bè yóm sotu ngà Israél boluyen Bindyamin.

² Là kô na a kenbê Dwata kul yó kem kun tau deng eles nélék lemwót bè kbuten. Deng hónô tngón ye ne yóm monen bè sulat Dwata bè yóm tehe keklamo Ilaydya kul bè Dwata yó kem tau Israél,

³ yó monen, “Ó Dwata, deng gotu bnonok le lu ne yó kem tugodem. Ngem yó kem gónô gónó me gel demsù ebéléem, deng gotu genbà le. Tek sotuhu dù tebel, okóm sónmò le bud mebel do snéen.”

⁴ Bnalà Dwata se, monen, “Deng wen hitu libu tau deng hetfingu mò dou tau. Là kô le tmaba ebè yóm dwata kéng boluyen Baal.”

⁵ Ne senged se nim kmoen ni. Wen se kem tau hemtahu, okóm là hol le wen. Deng tódô nélék Dwata lu lemwót bè yóm tey nawahen kul.

⁶ Tódô lemwót bè kun nawa Dwata gónón mélék kul, là kóen lemwót bè yóm kul gel nmò. Ke yó gónó Dwata mélék kul lemwót bè yóm gel nmò le, là kô gbek tekuy moluy du tóbóng yóm nmò Dwata yó.

⁷ Ne duhen yó, là kô dog ton kem tau Israél du yóm hnebel le. Són olo mton du, són yó kem là wenen deng nélék Dwata. Bong yó kem dumu tau, baling le kembel, abay se là hnungol le du yóm taba Dwata kul.

⁸ Hol lómón se yóm monen bè Sulat Dwata, yó monen, “Deng blay Dwata kul yóm knawa là hulung hedem. Igoen se wen mata le, là kô le mton. Igoen se wen klingu le, là kô le gmungol. Efet yóm kmoen ni, laen kô ili le.”

⁹ Ne wen se kun udél yóm tehe Dabid ekni gbak ebélê le, monen, “Yóm kendengen genléd nawa le yó, hol henbalingem holot gónó le bkó, mò gónó le tlokob. Hol tnafakem lu.

¹⁰ Hol hbutóem lu anì là bud le mton, ne hol senflósem heblat du yóm hbóem kul.”

¹¹ Duhen yó, wen bud snólóku, yóm ketlokob yó kem Ju gehlós le kô? Là, là kô le gehlós. Bede lemwót bè kegsalà le, yó gónó Dwata hton du bè kem tau là Ju le yóm lan le gewà gu lem hatay. Atul Dwata se nim ni anì mófô yó kem Ju.

¹² Bè yóm kegsalà yó kem Ju, tey któbóng Dwata yó kem dumu tau bè klamangen benwu. Bè yóm là kguta yó kem Ju du yóm tóbóng Dwata kul, yó gónó Dwata hol hemdengen tmóbóng kul yó kem tau là Ju le. Ke ni se kmò kehlan Dwata du, milud he kehyuhen bè yó kem tau là Ju le sok le deng gotu gomong hemtahu yó kem tau Ju.

Kegewà yó kem tau là Ju le

¹³ Ni se udélu ebélê ye yu kem tau là Ju ye. Ou se yóm deng nélék Dwata mò hógówen ebélê ye. Yó gónóm mon, hol hotuhu gelu se do mò du yóm hmoen dou.

¹⁴ Ke ton yó kem dou dumu Ju yóm nmò Dwata bélê ye, déke angat le mófô bélê ye, ne bè yó gónón wen bélê le gewà gu lem hatay.

¹⁵ Lemwót bè yóm kekbê Dwata kul, yó gónó le mit sefyu ebè Dwata yó kem tau là Ju le. Ke lómón yó, milud he yóm kehyuhen bélê ye sok le deng gotu bud semfulék ebè Dwata yó kem kun tau Ju. Hol lómó kegnóm tekuy du, lómón yóm tau deng mowil gu lem hatay.

¹⁶ Ke hlingónu du yó kem Ju, lómón ke mambang tnilós blay le ke Dwata. Ke Dwata funen yóm hol tanay tilósen, bud nfunen snéen yóm duen. Lumun tu se kfunen yó kem tau Ju, abay se kun funen yóm hol gónó le gu semfu duhen yóm tehe Abraham. Sotu gónó tekuy e hmingón kul yó kem Ju, lómón ke koyu nfun Dwata. Ke nfunen yóm hol buten, gomong nfunen snéen kem hangahen.

¹⁷ Okóm yóm koyu ulib nfun Dwata yó, deng wen hanga kenlengen du ne tugoden du bè yóm hanga koyu ulib tehe nwahen tmowok lem dlag. Yu kem tau là Ju le, hol lómón ke yu yóm koyu ulib lem dlag. Deng ye gomong lembud bè yóm koyu hyu nfun Dwata, duhen yó kem Ju.

¹⁸ Okóm bê ye abay hegmón bè yó kem tahu hangahen yóm koyu yó. Olo ye hanga lenbù htowok Dwata bè yó he yó dum kuy. Bê ye abay klifót, là kô yu du hlowil yóm but yóm koyu, kaem yóm buten hlowil kuy.

¹⁹ Déke mon ye, “Mi mò bud tles hangahen yóm koyu yó.”

²⁰ Tahu se yóm mon ye yó. Yó gónó Dwata mtok kul abay se lemwót bè là kehtahu le. Ne yó gónó ye tles tmowok bè yó se kuy, lan ye hemtahu. Okóm bê ye nit hegmón, eles ye temgama se kuy.

²¹ Ke là dog nali Dwata du yó kem tahu hangahen yóm koyu yó, duhen yó kem Ju, milud he yó du kem olo hanga lenbù htowoken du.

²² Bè yó gónó tekuy mton du yóm tey kkodu Dwata tau, ne yóm tey ktafaken kul. Tnafaken yó kem tau là hemtahuhen. Okóm tey knoduhen yu, syan ke là monolen yóm kehtahu ye. Okóm ke snonol ye, angat bud ntoken yu snéen kuy.

²³ Ke là henlós kem Ju du yóm kkogol le ke Dwata, botong gbek Dwata bud hlowil kul bè yóm tehe sana lówó le.

²⁴ Yu kem tau là Ju le, lómón ke hanga koyu ulib tmowok lem dlag nwa Dwata bud hlowilen bè lówó yóm koyu huluhen. Ke gbek Dwata lembù hlowil du bè yó yóm hanga tólóng koyu, sélét là gbek bud hlowilen du bè yó yó dum sana kun hanga.

Kkodu Dwata kdéen tau

²⁵ Bud wen tulónu kuy, kem dumuhu setwoli, bè yóm nmò Dwata tehe là glileb kem tau du anì là hegmón ye du yóm deng nmò Dwata bélê ye. Yóm kgel kulu yó kem tau Israél, là kóen hlós. Okóm ke deng le gotu hemtahu bè Dwata yó kem tau là Ju le, yó he angat kkóhen yóm kgel kulu le yó.

²⁶ Ne gotu le angat gewà gu lem hatay. Lómón yóm mon Dwata bè sulaten, monen, “Lemwót gu bè syudad Sayun yóm tau fen lemwà yó kem kun ból Jakub. Angat gotu kóhen bélê le yóm sidek gel nmò le.

²⁷ Bè yóm kkóhu du bélê le yóm salà le,” mon Dwata, “yó se deng gónón tahu edu yóm tehe fasadu kul.”

²⁸ Ni kmoen ni, tey wen kem tau Ju hmohon ke Dwata lan le kembê yóm Tulón Hyu lemwót gu béléen. Okóm yóm là kehtahu le yó, tey wen gónón hyu bélê ye kuy yu kem tau là Ju le. Okóm ke Dwata kun, sana kween kul lemwót bè yóm tehe kéléken yó kem tehe fù le.

²⁹ Yóm Dwata, sok wen tau néléken, ne sok wen tau tnóbóngen, deng duhen yó ne, là kô bud tenlesen du hendemen.

³⁰ Yu kem tau là Ju le, tehe là nimón ye ke Dwata se kuy. Okóm ni, deng knodu Dwata yu ne lan le là mimón du yó kem tau Ju.

³¹ Senged se yó kem Ju nim kmoen ni, là nimón le ke Dwata. Okóm angat wen lan Dwata kmodu kul se kul lómón yóm deng kkoduhen kuy.

³² Hol kóyô Dwata ke dilô kdéen tau yóm là kimón le du anì hol dilô le snéen yóm kkoduhen kul.

Kdóyón Pol ke Dwata

³³ Laen kô bang gónó tekuy e hmingón du yóm alì kehyuhen yóm Dwata. Tey nelem yóm ketngónen, ne tódô ket yóm kenhulungen. Laen kô dù tau gembek tmulón du yóm kun kehedem, ne laen se dù tau gembek gmileb du yóm kun kmò.

³⁴ Lómón se yóm monen bè Sulat Dwata, yóm monen, “Laen kô dù tau gemtukul du yóm hol kun kehedem Dwata. Laen se kô dù tau tô gembek hmau du.

³⁵ Ne laen kô dù tau bemlay ke Dwata ke mone bud bnayad Dwata béléen.”

³⁶ Abay se kdéen ton, gotu dlimun Dwata. Ke là wen du, laen kô dù mowil. Ne yóm kentihen deng dlimunen yó mò hol gónón megdóyón. Bê tekuy lensón yóm kdóyón tekuy du.