Kem Udél Hlalak Tehe Selumun 9 - Udél Dwata: Gna Kesfasad ne Lomi Kesfasad

Kun tinok yóm khulung hedem

¹ Yóm khulung hedem lómón ke tau hemdà gónô ne hitu heheken du.

² Deng wen ken nmoen ne deng eles hensuen yóm bot tilob nómen yóm kul gel ninum ne deng eles hentifesen yóm gónó le mken.

³ Deng dóken yó kem libun tóbóng lówóhen mò na a fen tmaba bè yóm gónón mfatu bè benwu bong.

⁴ Yó hmonen kul, “Mógów ye e dini kem tau là ngelem kehedem,” ne senged se bud monen bè yó kem tau book.

⁵ “Géhél ye e dini na ye e ken yóm dou ken na ye e ninum yóm dou ninum deng wen bolen.

⁶ Kó ye yóm là kngelem kehedem ye anì tahà ktau ye ne lolò ye kmò klan yóm khulung temnef.” Ni se koni yó kem udél yóm khulung hedem.

⁷ Ke bnólówem yóm tau gel sedekà mom henwogen uu. Ne ke bnólówem yóm tau gel mò sidek mom hen-gnómen uu des.

⁸ Béem dog bnólów ne yóm tau sedekà, déke mom knutó nawahen uu. Ke bnólówem yóm tau hulung hedem mom kenbong nawan uu.

⁹ Ke hnauhem yóm tau hulung hedem mom temnù yóm khulungen hedem. Ke tolokem yóm tau tedeng kmoen mom bud temnù yóm kun dnalang.

¹⁰ Yóm klikò te ke Dwata hol but yóm khulung te hedem. Ne yóm ketngón te yóm Dwata laen dù belenen yó uléken yóm khulung te temnef.

¹¹ Yakà yóm khulung hedem du htahà ktauhem ne wen he suden yóm klowilem.

¹² Ke wen khulungem hedem ni se yóm kóm kehyu. Okóm ke mom kenbéem laen dù dumu glayam són sem uu.

Kun tinok yóm kbook

¹³ Yóm kbook lómón ke yóm libun mlos laen dù yaken ne laen dù mtukul gónón henek.

¹⁴ Sónmoen myón bè bak dól gónóen duhen ke bè yóm gónón mfatu bè benwu bong,

¹⁵ na a tmaba ebè yó kem tau mius mekteng kul kógów.

¹⁶ Yó monen mò kul, “Hol ye husek e dini yu kem tau là ngelem kehedemen ne yu kem tau book.” Ne yó bud udélen ebélê le, monen,

¹⁷ “Tey mnóm minum du yóm él hennagaw ne tey mnóm se yóm gel kenem bè gónón gebnos.” Ni se koni yó kem udélen mgoy yóm kbook.

¹⁸ Okóm yóm tau gbóy béléen là kô tngónen du yó kem tau tehe gna mógów ebéléen, yóm deng knô le bè benwu yó kem tau matay.