Kem Udél Hlalak Tehe Selumun 7 - Udél Dwata: Gna Kesfasad ne Lomi Kesfasad

Kehlayuk bè yóm libun hdóyón

¹ Ó Man, hol nimónem yóm monu mò kóm ne hol eles hnóem lem hendemem yó kem dou hlolò.

² Hol nimónem yóm dou hlolò anì tahà ktauhem. Hol hentilobem mimón du abay se alì bong muhen yó kem toloku kóm.

³ Hol suem te henmuem ne suem lem hendemem yóm dou hlolò.

⁴ Yóm kehyu nawam ebè yóm hol dumum setwoli, yake lómón yó snéen yóm kehyu nawam ebè yóm khulung hedem ne lómón ke hol weem yóm khulung temnef.

⁵ Yakà kenlung le kóm bè libun mdà yehen tô hegbóy kóm bè tilob kudélen.

⁶ Bè yóm sotu kdaw, temngele e sentu beng yóm dou gónô.

⁷ Tódô tonu se yó kem là ngelem kehedem le duhen yó kem logi lomi lemnok ne wen sotu bélê le yóm laen dù ledemen.

⁸ Yó nmoen, mógów ebè gónón seblà nô yóm libun hdóyón. Ne yó tódô lanen miwes moni bè gónóen

⁹ bè yóm deng kkimelen ne efet bè yóm kesekleweten.

¹⁰ Ne yó tódô wen libun semlong du, tey kehegkesen ne eles hendemen yóm mò kmò kgoyen du.

¹¹ Nim libun ni du se yóm libun alì mlos ne kembel, là kóen menek bè gónóen.

¹² Yó nmoen, tódô keten bè yó kem gónón wen tauhen mangat.

¹³ Ne tonen se yóm logi yó koni. Tódô dlu lenkefen ne neleken ne là kóen myak temngel ebéléen. Monen mò du,

¹⁴ “Kemdaw eginu yóm kedsuu bè yóm fasadu ke Dwata ne deng wen ken nmou bè gónô.

¹⁵ Yó gónóhu mebel kóm ni, tey óyóu ston kóm. Hyu deng ni u.

¹⁶ Deng lenafinu ne yóm gónóhu tungô yó kem tey nes bnetek tilob lemwót bè Idyip.

¹⁷ Deng tódô gotu du ne yó kem alì tilob boohen, suu du yóm mér ne alus ne sinamon.

¹⁸ Mungi do ne, na te hol hotu óyô te suloy buteng. Na te knoyung kifu seflilil.

¹⁹ Là kóen mnô yehenu, tolo mógów mayuk.

²⁰ Deng eles hbongen filak nwiten, bà mom lewu fedyanen he tu kuléken.”

²¹ Tahu se, lemwót bè yóm alì khulungen hemtilob hlan du yóm udélen ebéléen gónón gbóy yóm logi ni.

²² Tódô henmungen se mung du lómón ke yóm safì nwit le ebè yóm gónó le tmétê du ne lómón ke yóm uhu mlan seblà yóm gónón e mdò hanak

²³ ne tódô mtool hosoen. Yóm logi ni, hol lómón ke yóm onuk mlan e seblà yóm gónón wen holot, là kô tngónen du ke yó hatayen.

²⁴ Yó gónóm mon, kem ngà logi, hol hnungol ye o ne hol kenmón ye yó kem monu mò kuy.

²⁵ Béem hegmung kehedemem ebè yóm libun lómón ni kmoen ne hol béem senebed yóm kun lan.

²⁶ Yakà dengen tey dê ne tau meglà lemwót béléen ne là kem bud gsóhem du ne tau matay lemwót béléen.

²⁷ Yóm kun gónô lómón ke lan ebè yóm gónó le nô yó kem tau matay ne ke mógówi e du matayi.