Kem Udél Hlalak Tehe Selumun 6 - Udél Dwata: Gna Kesfasad ne Lomi Kesfasad

Là kfasad fen mayad utóng dumu tau

¹ Ó Man, deng wen kô hmóyóem mayad utóng bè dumu tau? Ne deng fenmahem kô mò heblatem du?

² Dengi gholot kô bè yó kem udélem ne glolò le yóm hmóyóem kul?

³ Ke lómón yó nmoem, Man, dengi gnô lem hólólen ne yóm tau yó. Okóm ni dé kmoem du anì wen lanem lemwà knóem; holi géhél mógów ebéléen ne hol henkoduhem anì hewaen u.

⁴ Béi tlek kendel tungô duhen ke hegnô

⁵ ke là nam na lenwà knóem. Mkéli bè yóm onuk bnes gel hlayuk bè yóm alu nmò tau ne yóm uhu hemlóy yóm tau mlok.

Là kehduk

⁶ Ó tau lemfu, yake hol dnalangem kul kmò yó kem gulom ne holi hfulung hedem.

⁷ Balù yóm klaen dù malak kul

⁸ ewenem sana kwen ken eles sentifun le mò eles tgama le bè yóm kdawen élél ken.

⁹ Ó tau lemfu, mò kegenen de yóm ktungóem? Kilón de kebtikem?

¹⁰ Mom yó monen, naw skél hidong he, naw na hegnô likót

¹¹ okóm bè yóm igoem tungô tódô nuluken u yóm kélélem lómón kuluk yóm tau gel mnagaw.

¹² Són tendo mò tulón seblékê bè lanen mógów yóm tau gel mò sidek, yóm tau laen dù gónón e kól.

¹³ Hekniten matahen ne yóm kestulónen hlanen bè kekdol tihen ne tdoken yóm ksukaten kóm.

¹⁴ Laen kô dumu nô lem hendemen, són moen tendo matul mò sidek ne balù kihu lanen mógów són moen sembeweg kem tau.

¹⁵ Yó gónóm mon, wen glumfak mekto sut béléen ne laen kô bud gónón e mlo.

¹⁶ Wen nem kay nmò knutó nawa Dwata, o, hitu dé yóm alì kenliten. Ne ni sii lu:

¹⁷ Tanayen kehegmón. Glewuhen tmulón kéng ne getluhen yóm monok là duón.

¹⁸ Gfaten yóm tendo hemdem matul mò sidek. Glimuhen yóm tendo módód mò sidek.

¹⁹ Gnemen yóm tmifù kéng ne ghituhen yóm tau hesfatayen kem dumu tau.

Ketgama yóm là kesdà kem tau syehen

²⁰ Ó Man, hol hendemem yóm gel hlolò maem kóm ne hol kenmónem yóm gel tolok yéem.

²¹ Hol eles tendo hendemem yóm kul hlolò ne hol suem te henmuem

²² abay se yóm kul gel tolok malak yóm kóm klan, gel bnenteyen u ke kifu ne gel hnauhen u ke kemdaw.

²³ Yóm kul hlau lómón ke solok alì mtataw nóngen ne yóm kul kestódô kóm toloken kóm yóm klowil hyu.

²⁴ Ni kem hlau ni kenlungen uu bè yóm libun sidek nmoen duhen yóm libun mdà yehen tô hegbóy kóm bè tilob kudélen.

²⁵ Béi gbóy du yóm olo kun ktilob ne béem abay nmung se yóm kun tilob ketngel ebéléem.

²⁶ Yakà gbek tau smukéy du udì filak yóm libun hdóyón, okóm bè yóm ksamuken yóm tuha libun dumu tau gomong he yóm kun klowil.

²⁷ Laen dù tau semning ofi ke là mlób nesen.

²⁸ Laen dù tau mdà gu ta yó kem bala ofi ke là mlób hólól tihen.

²⁹ Lómón se ni laen dù tau smamuk tuha libun dumu tau, duhen ke mogot du ke là megtafaken.

³⁰ Balù yóm kkodu le du yóm tau mnagaw lemwót bè kbitilen,

³¹ okóm ke sok gekfô le ewenem sana kehebtad le du bè yóm knagawen baluen ke gotu yóm kdéen kimu lem gónóen.

³² Okóm yóm tau mò samuk bè tuha libun dumu tau lómón ke laen dù ledemen. Yóm tau mò du nim ni heglaen knóen.

³³ Tódô bnoug le ne laen bud madat du ne laen se tul kkóhen tahen yóm yaken.

³⁴ Yakà alien lemenget ne sidek kebuten yóm fun yehen ne sok meles laen kô koduhen du.

³⁵ Là kô henmóyóen du balù kihu kimu btad le béléen ne là gsengel nawan du balù nô kbong yóm basa le du.