Kem Udél Hlalak Tehe Selumun 5 - Udél Dwata: Gna Kesfasad ne Lomi Kesfasad

Kekbê yóm ksamuk

¹ Ó Man, hol kenmónem yóm dou khulung hedem ne hol henklinguhem yóm dou khulung temnef

² anì hulungi mit du hyu yóm kmoem ne dilô bè kudélem yóm ketngónem.

³ Yakà wen libun mdà yehen gel gemé lemnek ne alì hulung mudél gónón gbóy tau.

⁴ Okóm nim kun nmò ni sidek uléken lómón ke mkeni alì héét ne lómón ke amà le kóm sudeng.

⁵ Yóm libun lómón ni kmoen loloen yóm lan e lem hatay ne nwiten u ebè benwu yó kem deng matay.

⁶ Mom là kô hendemen du yóm lan gónón mowil, là kóen temnù ne là se dilóen du ke tedu ulék yóm nmoen.

⁷ Ne ni kem ngà, hol hnungol ye o; hol bê ye abay knogol yóm monu ni.

⁸ Holi hlayuk béléen yóm libun lómón ni ne hol béi abay hloni ebè gónóen.

⁹ Déke gsindili béléen ne mom lana béléem kadat le kóm yó kem dumum tau ne dengi mom matay lem tdok yó kem tau laen dù kodu le.

¹⁰ Déke wen tau milo gotu ma yó kem kimuhem ne yóm lenitegem deng mom tólóng tau fen hdengen du.

¹¹ Tey keheslafem yóm móyón kehtohem ne hol lómón ke són tiol ne kulit tebel béléem.

¹² Mom yó he kmonem du, “Yake tehehe móyô hnau ne yake tehe nimónu yóm kul gel kbólów dou.

¹³ Là kô dog nimónu du yó kem tau gel tmolok do ne là se dog kenmónu kul.

¹⁴ Ne ni, deng tey sidek kyaku lem blóng kem dumuhu tau.” Yó se yóm udélen huli selen.

¹⁵ Hol tnenebem tuha libunem ne yake sónen du kenbong nawahem.

¹⁶ Ke wen ngaem gu laan laen kô ofolem kul.

¹⁷ Yake tódô lenok le tmóbóng kóm yó kem ngaem ne béen mom bè yó kem tau milo.

¹⁸ Yó gónóm mon, holi tódô hligal du yóm sana yehenem ne són béléen gónóm hegsengel nawahem.

¹⁹ Tilob se kun ne tey hyu kmoen. Yake són béléen gónóm hemyu nawahem ne gulesi bè yóm kun kbong nawa kóm.

²⁰ Ó Man, moen de ke tói gules bè yóm libun mdà yehenen ne moen du ke tô henlomem hemyu nawa bè tuha libun dumu tau?

²¹ Yakà gotu ton Dwata du yóm kdê nmò te ne tendo hendemen yóm kdê lan te.

²² Yóm tau gel mò sidek deng gfét lem salà ne. Yóm salaen henged fét mgen du.

²³ Matay lemwót bè là kgafasen nawan. Yóm alì kbooken mit du tlas.