Kem Udél Hlalak Tehe Selumun 4 - Udél Dwata: Gna Kesfasad ne Lomi Kesfasad

Hol kehlom du nawa yóm khulung hedem

¹ Ó kem ngà, hol hnungol ye yó kem tolok mà ye. Hol kenmón ye ne baling ye hulung temnef.

² Yakà teyen hyu se yóm dou tolok kuy. Yó gónóm mon du, hol sù ye lem hendem ye.

³ Bè yóm hanà kegenu ngà ekni tek són o ngà yê. Ne yóm tolo keglébédu bélê le

⁴ gel tolok mà do, monen, “Hol suem lem hendemem yó kem hlolou kóm ne hol nimónem anì tahà ktauhem.

⁵ Hol béem abay klifót ne béem abay knogol yó kem monu. Nwahem bè nawahem yóm khulung hedem ne khulung temnef.

⁶ Béem kó bè nawahem yóm khulung hedem; yó se yóm semgyok kóm. Hol hnóem du nawam ne yó se mentey kóm.

⁷ Yóm khulung hedem alì lemyu bè kdéen. Yó gónóm mon, hol hegna nwahem bè nawam yóm khulung hedem ne balù kihu dumu nwahem hol nam na hegna nwa yóm khulung temnef.

⁸ Henlomem nawa yóm khulung hedem ne hegkayen uu. Hol béem kó lem nawahem yóm khulung hedem, yakà megdóyóni du.

⁹ Ke hulungi hedem, ni se mit kóm knóón ne gónóm megdóyón.” Ni se koni yóm tehe tolok Mà do.

Bê ye nmung kmò yó kem tau mò sidek

¹⁰ Ó Man, hol hnungolem o ne suem lem hendemem yó kem monu anì tahà ktauhem.

¹¹ Deng gotu toloku kóm yóm lan ebè yóm khulung hedem ne deng nalaku u bè yóm lan ebè yóm ktedeng kmò.

¹² Bè yóm kmò kógów klowilem, yó kem tô hemseng kóm tódô kmanas ne bè yóm nmoem meslò laen kô gónóm glokob.

¹³ Hol negenem ne béem glus yó kem deng hlauhu kóm. Hol nabungem, yakà bè yó du gónón tahà ktauhem.

¹⁴ Béem lolò yóm kul lan yó kem tau mò sidek ne béem dnalang se yóm kul kmò.

¹⁵ Hol senyatem yóm kul lan yó ne béi abay mlan e du. Hol senyahem ne tódô henlósem yóm kóm klan.

¹⁶ Yakà là kô le gtungô ke là nan wen sidek nmò le, duhen ke là nan wen dumu tau nwit le mò sidek.

¹⁷ Yó kem sidek nmò le lómón ke henged ken le ne él ninum le.

¹⁸ Yóm kun kmò kógów klowil yóm tau tedeng kmoen lómón ke layag kdaw, són moen minut mtataw efet talak kemdaw.

¹⁹ Okóm yóm kul kmò kógów klowil yó kem tau gel mò sidek lómón ke són moen mget kkifuhen. Són mò le tlokob, okóm là kô ton le du yóm hetlokob kul.

Ketgamahem kóm kmò

²⁰ Ó Man, hol kenmónem yóm dou udél ne hol henklinguhem yóm toloku kóm.

²¹ Béem kó te henmuem ni kem ni ne hol suem lem hendemem.

²² Yakà yó du yóm gónón tahà ktau yóm tau gemtnef du ne gónón hyu klówóhen.

²³ Hol ten-gamahem bè kdéen yóm kmò kógów kehedemem, yakà bè kóm kehedem du gónón lemwót yóm kóm kmò.

²⁴ Hol béi abay mò tulón seblékê ne béi se mò kéng.

²⁵ Hentedengem kmò kógów klowilem lómón yóm tau là tlek kun mógów kudung wen kenyaken.

²⁶ Hol eles hendemem yóm kmò klanem ne balù kihu yóm nmoem sal hyu.

²⁷ Hol henktengem lemolò du yóm lan tedeng ne hol senyahem yó kem nmò sidek.