Kem Udél Hlalak Tehe Selumun 31 - Udél Dwata: Gna Kesfasad ne Lomi Kesfasad

Yó kem tehe udél Lemwél

¹ Ni se yó kem tehe udél tolok yéen ke Lemwél yóm tehe sotu tau hol geta.

² Yó monen, “U se yóm hol dou ngà balà Dwata yóm knihu béléen. Ni se yó kem hlauhu kóm.

³ Béem namà bè yó kem libun sidek nmò le yóm kgisem ne filakem yakà lu du gónón gel gbà klowil yó kem tau hol geta.

⁴ Hol hnungolem nim ni Lemwél, là kóen hyu kinum le yóm lemengel yó kem tau hol geta ne dalang se yó kem dumu tau mogot benwu ke hemdeen le minum.

⁵ Ke sok le minum déke klifót le yó kem udin ne là gmò le du yóm tedeng bè yó kem tau élél.

⁶ Yóm ninum lemengel hinum yóm tau móyón matay ne yóm tau alì sidek kegnómen du yóm ksidek klowilen.

⁷ Tódô bayaem yóm kinum le anì klifót le yóm alì kélél le ne yóm alì sidek kegnóm le du.

⁸ Uu mdà du bè yó kem tau là hulung le skuya bè udél yóm ktedengen dalang se bè yó kem tau laen dù tmóbóng kul.

⁹ Uu fen mdà du yóm kukum tedeng. Hol nmoem yóm tedeng bè yó kem tau élél ne bè yó kem tau laen dù gmò le.” Ni se koni yó kem udél tolok yéen ke Lemwél.

Yóm libun hyu kmoen

¹⁰ Mdangan gónó mton du yóm libun mò yehen hyu kmoen ne ke wen libun lómón yó kmoen tey hyu senta yóm kimu legen mebtes.

¹¹ Tey ksalig tuha logihen du ne laen dù gónón élél béléen.

¹² Yóm klawihen mowil yóm libun yó tey hyu kmoen ebè tuha logihen ne laen se gónón hemsidek du.

¹³ Gel nebelen yóm mò nmoen nes ne tey wen óyóen mò du.

¹⁴ Gel wen kem ken gel nwiten gu bè yó kem lanen mógów lómón se yó kem kafal tau mò udél swa gel lemulón ken gu bè yó kem dumu benwu mayuk.

¹⁵ Sal gel temkifu mò ken bè yó kem fes lówóhen ne tulónen yó kem libun heseken yóm hmoen kul.

¹⁶ Nan tenngel yóm tonok benlihen ne lemwót bè yóm filak ulék yó kem kun deng nmò, yóm huluhen du.

¹⁷ Tey móyô mò nmò, kemgis ne leged.

¹⁸ Tngónen yóm tey kbong muhen yóm nmoen mò gel hbaluen ne balù kifu sana kmoen du.

¹⁹ Gel tembong ne ominen mewel du mò nes le.

²⁰ Là kóen sgafas nawahen ebè yó kem tau élél ne gel benlayen yó kem tau là deng wen gónón ma.

²¹ Là kô tnafa nawahen du yóm bulónen tnaw abay se deng eles wen nes le mfól yó kem fes lówóhen.

²² Gel wen kumù nmoen ne yóm kun nes gel lesek tey hyu ne tey tilob beteken.

²³ Tey tótól yóm tuha logihen bè gónó skukum ne du se sotu logi gónó le galak bè kul benwu.

²⁴ Ne yóm libun yehenen ni koni gel mò nes ne hilet ne hbaluen bè yó kem tau gel mò udél swa.

²⁵ Nim libun ni wen kgisen ne tey kadat kem tau du ne laen kô tnafa nawahen e lem hulin kdaw.

²⁶ Bè yóm kudélen sal gel gdilô du yóm khulungen hedem ne sal gel hyu yóm hlauhen.

²⁷ Sal gel wen gónón lala ne tendo snoloen yóm wen muhen bè yó kem fes lówóhen.

²⁸ Nim libun ni sal gel hegfan yó kem ngaen yóm tey kehyu nawa le ebéléen senged se yóm tuha logihen tey kdóyónen du.

²⁹ Monen, “Tey dê libun hyu kmò le okóm uu yóm hol lemyu bè kdéen.” Ni se koni udél yóm tuha logihen.

³⁰ Yóm nawa olon hyu ta, gsukat du tau ne yóm ktilob libun, mahil lana, okóm megdóyón yóm libun kmikò ke Dwata.

³¹ Hol henblatem béléen yóm kdéen deng nmoen abay se tey knóón du ke nadat yóm kdéen tau.