Kem Udél Hlalak Tehe Selumun 3 - Udél Dwata: Gna Kesfasad ne Lomi Kesfasad

Hlau ebè yó kem logi lomi lemnok

¹ Ó Man, béem abay klifót yó kem toloku kóm, okóm hol hnóem bè nawahem yó kem hlolou kóm.

² Yakà bè ni du gónón lemwót tahà ktauhem ne yóm klowil gsengel nawam du.

³ Hol béem abay kó bè kmoem yóm kogot nawam bè Dwata. Eles tendo suem te henmuem ne lem hendemem.

⁴ Ke ni se nmoem, hligal Dwata ne gsengel nawan ebéléem, dalang se kem dumum tau.

⁵ Hol hewótem lem but blututem yóm ksaligem ke Dwata, béem abay genléd nawa yóm kóm khulung temnef.

⁶ Balù nô kihu nmoem nam na gel setngón ke Dwata ne du he malak kóm bè yóm lan tedeng.

⁷ Béem tô hendem deng tey bong ne dou khulung hedem. Yake hol knikoem Dwata ne béi bud mò sidek.

⁸ Ke ni se nmoem, ni se henged bulung hemyu klówóhem ne hkó desem.

⁹ Hol nadatem Dwata mlan bè keblayem du du yóm alì hyu bè kdê yó kem huluhem gefet.

¹⁰ Ke ni se nmoem, tódô hnok folem ne balù yó kem gónóm hemsù yóm gel mò ninum gotu lembés.

¹¹ Ó Man, béem hentólóng ke wen gónón semtódô kóm Dwata ne béem kensidek nawa se yóm ktedengen kóm.

¹² Yakà gel tnedeng Dwata du yóm kun kenbong nawa lómón yóm mà ke kenbong nawahen yóm ngaen logi sal gel tnedengen.

Hol mu yóm khulung hedem

¹³ Hyu nawan yóm tau deng baling hulung hedem ne tendo sen-galuhen yóm khulungen temnef.

¹⁴ Yakà bong ofolem du yóm khulung hedem senta yóm tembaga futì ne tahu blówón.

¹⁵ Yóm khulung hedem tey mebtes senta yó kem kimu legen mebtes ne balù kihu dumu nóyóem laen kô gemsenged du.

¹⁶ Yó bunguhen yóm khulung hedem htahaen ktauhem, benlayen u kendengen ne kegdóyón.

¹⁷ Yóm tau galak bè khulung hedem hligal ne laen knikoen.

¹⁸ Yó gónón tahà ktauhen yóm tau lanen mmu yóm khulung hedem ne tey hyu nawan yóm tau mgen du.

¹⁹ Dwata se deng mò du yóm tonok lemwót bè kun khulung hedem ne bud lemwót bè kun khulung temnef gónón gemmò yó kem longit.

²⁰ Bud lemwót bè kun ketngón gónón tendo hlel yó kem él ne yó kem lobun tendo hosok amù e talak tonok.

Hol henyu te kmò te ebè kem dumu te

²¹ Ó Man, hol suem bè nawam yóm khulungem hedem ne yóm khulungem mit du hyu yóm kmoem. Hol béem tnagaw nawa anì là lana le béléem.

²² Yakà lu du gónón lemwót hyu klowilem ne heklóón yóm kóm kmò.

²³ Gel sen-galak le u bè lanem mógów anì laen dù hemenem ne là kói glokob.

²⁴ Ne ke soki lemwót tungô laen dù knikoem ne tilob ktungóem.

²⁵ Béi hlikò bè yóm knikò mekto ksuten duhen yóm kgefet yóm keglà yó kem tau mò sidek.

²⁶ Abay se bè yóm tendo kegléd nawam ke Dwata gónón hyu knóem ne là kô nwiten kóm e lem yó kem gónón sidek.

²⁷ Béem sen-gafas yóm tóbóng ebè yóm tau bang gónó e bemlay du ke wen se nô béléem mò tóbóngem du.

²⁸ Béem song imò tmóbóng du e lem haya yóm dumum ke wen se gónóm heblà ni.

²⁹ Béi mò atul sidek bè yóm dumuhem sebét, yakà uu du yóm snaligen.

³⁰ Béem nit segled yóm dumum ke laen dù duónem du.

³¹ Béem hendémê kul kmò yó kem tau gel hmugus ne béen wen dnalangem du yóm kul kmò.

³² Yakà gel kenlit Dwata kul yó kem tau là tedeng kmò le, okóm sen-gbóten yó kem tau tedeng kmò le.

³³ Tnuled Dwata yó kem gmónô gel mò sidek, okóm fen nuyagen yó kem gmónô tedeng kmò le.

³⁴ Hnohonen lu yó kem tau gel heklabak, okóm gel knoduhen yó kem tau heglaan le knô le.

³⁵ Yó kem tau hulung hedem guta le kdóyón tau kul, okóm yó kem tau book mulék le myak.