Kem Udél Hlalak Tehe Selumun 29 - Udél Dwata: Gna Kesfasad ne Lomi Kesfasad

Kem udél hlalak gbak ebè yóm kgel kulu tau

¹ Yóm tau là kenmónen du yóm kbólów du ne mom temnù kgel kuluhen wen glumfak mekto sut béléen ne là kô bud lowilen du.

² Hligal kem tau ke kem tau tedeng kmò le mogot benwu, okóm ke kem tau gel mò sidek yóm mogot benwu tey sidek kegnóm kem tau du.

³ Yóm tau alì sen-galuhen yóm khulung hedem, hefligalen maen, okóm yóm tau dnumuhen yóm libun hdóyón tódô namaen hkawang yóm kendengenen.

⁴ Yóm tau hol geta tedeng kogoten benwu baling mbegel yóm benwu nogoten, okóm ke són sen-galuhen kwa tau nawahen, hebaen yóm benwu nogoten.

⁵ Yóm tau là tahu ksaluen kdumuhen hensideken kun knô.

⁶ Yóm tau gel mò sidek mom gholot bè yóm kun salà, okóm yóm tau tedeng kmoen mom semngal ne hligal se kun.

⁷ Yóm tau tedeng kmoen són sen-galuhen yóm kguta kem tau élél du yóm kukum tedeng, okóm là kun yóm tau gel mò sidek là kô hendemen du yóm kukum tedeng.

⁸ Yó kem tau gel semdekà gbek le hebut yó kem tau bè sotu benwu, okóm yó kem tau hulung hedem gbek le hebó du yóm kebut le yó.

⁹ Laen dù gónón e kól yóm tau hulung hedem ke nwiten skukum yóm tau book abay se són moen mudél lembut ne hemnê kun yóm tau book.

¹⁰ Yó kem tau tendo módód hmatay tau, knutó nawa le yóm tau laen dù belenen, okóm yó kem tau tedeng kmò le, gel kenlung le yó kem tau laen dù belenen yó.

¹¹ Yóm tau book là kô gafasen du kebuten, okóm yóm tau hulung hedem gel nafasen nawan.

¹² Yóm tau mogot benwu ke nmungen yóm kéng gotu le baling mò kéng se kul yó kem tau smugung béléen.

¹³ Yóm tau élél ne yóm tau hemgnok kul senged le bè keblay Dwata kul mata mò hton le.

¹⁴ Yóm tau hol geta ke tedeng yóm kkukumen yó kem tau élél, nan tahà kogoten benwu.

¹⁵ Lemwót bè kfes du ne kbólów du mit du hulung hedem yóm ngà, okóm ke tódô lugun du kun kóyô henyaken yéen.

¹⁶ Ke yó kem tau gel mò sidek yóm mogot benwu, deng mom temnù kmò le sidek yó kem tau, okóm ton yó kem tau tedeng kmò le he yóm keglà le.

¹⁷ Sentódóem yóm ngaem logi anì temnù nawahem béléen ne tey wen he gónón hefligal kóm.

¹⁸ Yó kem tau là hmungol le udél Dwata tódô kihu knóyô nmò le, okóm hligal yóm tau gel mimón yóm udél Dwata.

¹⁹ Wen se hesek là kóen kóyów ke sentódóem ke olom mudél du baluen ke tngónen yóm monem là kô nmoen du.

²⁰ Mom hyu he yóm tau book senta yóm tau tódô faen mudél là nan hendem du.

²¹ Yóm tau ke tódô blayen bè yóm heseken yóm kun knóyô lemwót bè kegenen udì, wen kdawen tódô gfunen yóm kdê kendengen yóm tau yó lómón ke hol ngaen.

²² Són moen mit sbólów bè kem dumu tau yóm tau sunget ne yóm tau gel mahil lembut tey dê gónón gemsalà.

²³ Yóm keheklabak mit du genef yóm tau, okóm yóm tau heglaan gutahen kadat tau du.

²⁴ Yóm tau momung ne lemimeng yóm tau mnagaw igoen temngón du megtuled du, hensideken knóen.

²⁵ Yóm tau tnafa nawahen yóm kehedem dumu tau ebéléen henged holot gónón bekó, okóm yóm tau snaligen Dwata hyu knóen.

²⁶ Tey dê tau hemdeen yóm tey kehyu nawan ebélê le yóm tau mogot benwu, okóm tek són Dwata gónó tau gmuta yóm ktedengen.

²⁷ Yóm tau tedeng kmoen kenliten yóm tau gel mò sidek senged se yóm tau gel mò sidek bud kenliten yóm tau tedeng kmoen.