Kem Udél Hlalak Tehe Selumun 28 - Udél Dwata: Gna Kesfasad ne Lomi Kesfasad

Kem udél hlalak gbak ebè kimón te kem hlau

¹ Tódô mlóy là wen kemtes du yóm tau gel mò sidek, okóm yóm tau tedeng kmoen lómón klóbóen liyun.

² Sok heguluk yó kem tau lem yóm benwu, són moen se stólóng tau stufì mogot du, okóm mbegel yóm benwu ke hulung le temnef ne temngón yóm tau mogot du.

³ Yóm tau élél ke bud hen-gnoken yóm dumun élél hol lómón ke yóm kulón hemsidek hulu.

⁴ Yó kem tau là nimón le du yóm hlau Dwata mom dóyón le yó kem tau gel mò sidek, okóm ke nimón le yóm hlau Dwata kenbê le yóm tau gel mò sidek.

⁵ Yó kem tau gel mò sidek là bud getnef le du yóm hol ktedengen, okóm kul yó kem tau gel mimón ke Dwata gotu getnef le yóm ktedengen.

⁶ Mom hyu he yóm tau élél laen dù kéngen senta yóm tau là tedeng kmoen anien ke wen kendengenen.

⁷ Yóm logi nimónen yó kem hlau Dwata du se yóm logi hulung hedem, okóm yóm logi dnumuhen yó kem tau gel mò sidek henyaken maen.

⁸ Yóm tau hgengónen kendengenen lemwót bè kkaf keswahen ne bè kongoen kem dumu tau, yóm kendengenen yó mom mógów ebè yóm tau gel masa yó kem tau élél.

⁹ Tey kenlit Dwata yóm tau kmogol yó kem hlauhen ne là kô hnungolen du yóm knihen.

¹⁰ Yóm tau snukaten yóm tau laen dù kéngen ebè yóm nmò sidek mom du bud tawan sukaten, okóm yóm tau laen dù belenen bong umunen.

Kem udél hlalak gbak ebè kem kendengen tau

¹¹ Yóm tau wen kendengenen bè kun kehedem du deng hulung hedem ne kun, okóm yóm tau élél hulung temnef yóm kmò tau ne dilóen yóm ktahuhen bè yóm tau wen kendengenen yó.

¹² Tey le hligal yó kem tau ke baling kmamal yó kem tau tedeng kmò le, okóm ke kmamal yó kem tau gel mò sidek là kô le hol gliwà yó kem tau knamal le.

¹³ Yóm tau limengen salaen laen kô tul kehyu klowilen, okóm yóm tau tódô benkasen bè Dwata yóm salaen ne knogolen, tódô hnifót Dwata.

¹⁴ Wen kligalen yóm tau gel nimónen Dwata, okóm yóm tau hgelen kuluhen bè Dwata wen glumfaken.

¹⁵ Yóm tau élél laen kô dù gmoen bè yóm tau hol geta gel mò sidek, tey sidek klóbóen hol lómón ke mngel yóm mon le liyun, ne yóm klóngónen sembitek yóm mon le bér.

¹⁶ Yóm tau hol geta là hulungen temnef laen dù koduhen, okóm yóm tau hol geta ke kenliten yóm tódô gel ma mlan bè là ktedengen htahaen ktauhen.

¹⁷ Yóm tau deng monok són moen metem efet katayen, béen wen tmóbóng du.

¹⁸ Yóm tau laen dù belenen tey hyu knóen, okóm yóm tau là tedeng kmoen mekto keglaen.

¹⁹ Yóm tau gel mò nmò bè tonok són moen gengón kenen, okóm yóm tau gel mmung yóm atul laen dù muhen, tódô gotu du gónón élél.

²⁰ Yóm tau laen dù belenen tódô seflós kuyag Dwata du, okóm yóm tau hensloen kwen kendengenen ne ke mlan bè là ktedengen, là kô tódô lugun Dwata du là tnafak.

²¹ Là kóen hyu yóm tau kmukum ke mtukul nfihen, okóm wen se tau mahil kmoen du yóm là tedengen baluen ke olon udì blay du.

²² Yóm tau seglom kóyóen ke géhél wen kendengenen ne là kô tngónen du ksuten béléen yóm kélélen.

²³ Yóm tau ke bnólówen kdumun, tonen kogolen se yóm tey kehyu nawahen ebéléen yóm tau yó senta yóm tau olon smalù là tahuhen.

²⁴ Yóm tau mnagaw bè kem tuhahen ne monen là kô salà du hol lómón ksideken yóm nmoen yó lómón ksidek yóm kul kmò yó kem tau gemlà.

²⁵ Yóm keseglom tau gónón lemwót kesbólów, okóm yóm tau smalig bè Dwata hyu klowilen.

²⁶ Book yóm tau tódô doen yóm kun kehedem, okóm yóm tau hulung hedem gewà bè yóm sidek.

²⁷ Yóm tau gel benlayen yóm tau élél là kóen mulék élél, okóm yóm tau là kenmónen yó kem tau élél tey dê tau mudél sidek etahen.

²⁸ Là kô le hol gliwà yó kem tau ke baling kmamal yó kem tau gel mò sidek, okóm sok là bud le kmamal yó he bud kul kogot benwu yó kem tau tedeng kmò le.