Kem Udél Hlalak Tehe Selumun 27 - Udél Dwata: Gna Kesfasad ne Lomi Kesfasad

Kem udél hlalak gbak ebè kmò yóm klowil te

¹ Béem salù yóm angat nmoem e lem haya, là kô tngónem du ke tedu angat kmoen.

² Yake dumu tau dé smalù kóm béen mom uu yake tau milo dé ne là uu du mon du.

³ Yóm botu ne helek tey blat okóm udì he keblat ni kem ni ke hsenged te bè yóm keblat yóm keglayam lemwót bè yóm tau book.

⁴ Yóm kebut tau tey sidek ne tey te glayam du okóm udì he nim ni ke hsenged te bè yóm keglayam te du yóm klenget tau.

⁵ Mom hyu he ke tódô benkasem yóm kbólówem yóm tau senta ke yó hendemen là bong nawahem du.

⁶ Mom hyu bè yóm tau ke ween semtódô du abay se gsaligen olo ke hohonen hmingón mit du swè abay se olohen smukat du.

⁷ Yóm tau ke deng gemtu balù yóm tneb sana kbéen du, okóm ke bitil balù yóm ken héét sana knómen béléen.

⁸ Yóm tau htabag hekawang mkél bè yóm onuk koyu tmagak sala hkawang.

⁹ Yóm gel hboo ne yóm hnolo tilob boohen hefligalen tau, okóm yóm hlayam fen sembeweg du yóm kenek nawahen.

¹⁰ Béem klifót yóm weem ne kun wè maem, déke wen glumfakem anien he ke là htóbóngi bè yóm dumum setwoli deng mayuk béléem, yakà wen yóm weem dumum sebét yó mahil któbóngen kóm.

¹¹ Ó Man, holi hfulung hedem ne hefligalem o anì wen se balau du kihu tau semlón do.

¹² Yóm tau hulung milô eles dilóen yóm sidek ne senyahen, okóm yóm tau là ngelem kehedemen mom mógów e du ne yó gónón glayam.

¹³ Ke sok wen tau fmasad mayad utóng yóm tau là deng tngónen du yake nan hlun sandà kdê kimuhen dé yóm tau fmasad yó mò gónón tahu.

¹⁴ Yóm tau hnafusen bemtik yóm ween dumun sebét ne mekto khódóhen du lómón tô tnuleden.

¹⁵ Tey hfulów yóm libun mit sgés bè tuha logihen, mkél bè kehfulów yóm él tendo temdak.

¹⁶ Là kô gbekem temfnô du yóm libun lómón yó kmoen, lómón se yóm là kegbek temflok yóm lenos ne là kegbek mkem yóm hnolo.

¹⁷ Yóm tau dmalang bè kem dumun lómón se yó nem suk benlét dumuhen suk.

¹⁸ Yóm tau tendo sen-gifaen yóm koyu boluyen fig kenen se bunguhen senged se yóm tau tendo sen-gifaen yóm gónón mogot, megdóyón se kun.

¹⁹ Lómó kton tau yóm kun halas olung lem él, bud lómón se yó kton tau du lem hendemen yóm kun kmò.

²⁰ Laen kô tul kengeben yóm benwu yó kem matay lómón se yó nem knóyô tau laen kô tul ktakasen du.

²¹ Bè ofi gónó tau tmilów du yóm tembaga futì ne yóm tahu blówón ne yó se kun tilów yóm tau yóm kdóyón dumu tau du.

²² Yóm tau book baluen ke ngangem moug du efet tô hatayen là kô gbekem mkó du béléen yóm kbooken.

²³ Hol hentilobem gel semgifà kul yó kem safiem ne hol kenmónem yó kem dumu ógófem.

²⁴ Yakà gelen hotok yóm kendengen tau ne balù yóm kogot benwu sana là keglakiten yó kem lugod tau.

²⁵ Nam gna himot yóm bnes deng hyu mtób du mò ken ógófem hlunem mangat yóm bud uléken.

²⁶ Ne nmoem mò nes ye yóm kul bul yó kem ubiha ne gemblihi du tonok yóm filak ulék yó kem tubid.

²⁷ Ne bè yóm gatas yó kem dù tubidem gónó ye ma mò bè kken ye ne gomong yó kem ngà libun mò nmò béléem.