Kem Udél Hlalak Tehe Selumun 26 - Udél Dwata: Gna Kesfasad ne Lomi Kesfasad

¹ Tey móngó bè yóm kdawen mnóng ke hemdeeni du bulók kulón ne lómón se yó kóngó dmóyón du yóm tau book.

² Yóm tuled là kóen sut béléem ke laen dù duónen, hol lómón yóm onuk koyu olon móyóng hegluk.

Kem udél hlalak gbak ebè kem tau book

³ Gel nfes ne knakang yóm kudà ne bnoug yóm tau book anì megtolok le.

⁴ Ke bnalaem yóm tau book béem ulit bè yóm kun kbook déke momi mkél béléen.

⁵ Bnalaem yóm tau book bè yóm udél gembólów du bè yóm kbooken anì dilóen yóm là khulungen hedem.

⁶ Yóm tau hemwit tinok bè yóm tau book lómón ke kenlengen tihen, olon mò gónón lebà nawahen.

⁷ Là kóen wen muhen bè yóm tau yó kem tihen kihod, senged se klaen dù mu yóm udél hlalak gu bè yóm tau book.

⁸ Senged ungel le yóm tau dmóyón yóm tau book, yóm tau mom bkesen bè tdadol yóm botu.

⁹ Yóm tau book mit du yóm udél hlalak, hol lómón ke yóm tau lengel mkem yóm koyu snual, hnayam le kem dumu le.

¹⁰ Yóm tau hmò nmò gfan yóm là khulungen hedem ke tódô kihu tau book duhen ke tau lengel hmoen nmò.

¹¹ Yóm bud gel kdilut ohu yóm lewólen, hol lómón se yó yóm tau book ke là kóhen du yóm kbooken.

¹² Mom hyu he yóm tau book senta yóm tau bè kun kehedem du deng tey hulung hedem ne kun.

Kem udél hlalak gbak ebè kem tau lemfu

¹³ Mon yóm tau lemfu, “Wen liyun bè lan ne senged se bè yó kem dumu lan.” Mò dawahen là mò nmò.

¹⁴ Lómón yóm tendo kilóy yóm sasà beng bè bak tikeb laen dù gónón e mógów lómón se ni yóm tau lemfu tendo khilóyen ta gónón tungô.

¹⁵ Yóm tau lemfu olon mnok te huyówen ne lemwót bè kduken là dog gsungiten du kenen.

¹⁶ Bè kun kehedem du yóm tau lemfu bong yóm kun khulung hedem senta yóm hitu kem tau hulung le malà udél.

Kem udél hlalak gbak ebè yó kem tau lemnek ksumóng le

¹⁷ Yóm tau tódô gbót bè yóm kesbólów laen dù kun du wen gfaen lómón kwen gfaen yóm tau kemfô ohu ke nogoten bè klinguhen.

¹⁸ Yóm tau nungel tendo sembiling suk gónó matay

¹⁹ hol lómón ksideken yóm tau snukaten kdumun ominen mon du olohu hmowon du.

²⁰ Matay yóm ofi ke laen dù snuken lómón se yó yóm keteflok yóm kesbólów ke laen dù tau lemnek ksumóngen.

²¹ Yóm using mò hbala hekyóngón yóm ofi ne yóm snuk hdilóf du ne lómón se ni kehbólen kesbólów yóm tau gel mit segled.

²² Yóm udél yóm tau lemnek sumóngen lómón ke ken alì mnóm tey le beyen mungol du yó kem tau.

²³ Yóm tau olon hmingón hemtilob kestulónen blaem sidek kehedemen mkél bè yóm lebwón tonok olon btulaen tilob du là kóen hyu yóm lemen.

²⁴ Yóm tau olon hningón hemyu ta kestulónen igoen mutó nawahen gu lem, bnosen ksukaten.

²⁵ Anien ke hentiloben kudélen yóm tau yó béem hentahu yakà dengen hnok lem but blututen yóm utó nawahen.

²⁶ Baluen ke gebnos yóm utó nawahen senged bud kegfanen bè kmoen snéen yóm sidek nmoen.

²⁷ Yóm tau mokol sol mò gónón hebtang kdumun mom du bud btang e lemen ne yóm tau hemluy botu ebè kdumun mom du yóm bud gónón e mluy.

²⁸ Yóm tau mò kéng mom knutó nawahen yóm tau gembunù du yóm kéngen ne yóm tau olon smalù là tahuhen olon hemsidek kdumun.