Kem Udél Hlalak Tehe Selumun 25 - Udél Dwata: Gna Kesfasad ne Lomi Kesfasad

Kem udél hlalak gbak ebè kem tau hol geta

¹ Ni bud wen kem udél hlalak tehe Selumun, yóm tehe nulit snulat yó kem tau smugung bè yóm tehe Hisikaya yóm tau hol geta bè benwu Juda. Ni sii lu yó kem udél hlalak yó.

² Lemwót bè yóm là gotu ketngón tau du yóm kdéen, gónón megdóyón Dwata ne bud le megdóyón se yó kem tau hol geta bè khulung le mebel yóm ktahuhen ne ktedeng kukum.

³ Yóm nô lem hendem yóm tau hol geta là kô glileb te du, lómón yóm là ketngón te du kegeta yóm longit ne knelem yóm mohin.

⁴ Ke kóhem bolen yóm tembaga futì, gbek yóm tau temwél hembaling du yóm kihu tilob nóyô nmoen.

⁵ Hdóhem klohok yóm tau hol geta yó kem tau gel mò sidek ne yóm kun kogot yóm tau hol geta yó baling mbegel bè ktedengen.

⁶ Ke mdai bè solu yóm tau hol geta béem salù knóem ne béi se hegbol lem blóng yó kem tau bong boluyen.

⁷ Mom hyu he ke nan wen mon du mò kóm, “Myóni klohok yó kem tau bong boluy le,” olo ke mon le mò kóm, “Yake mdóhi ne blayem yóm tau bong boluyen yóm gónóm myón.”

Kem udél hlalak gbak ebè dumu te sebét

⁸ Béem kendel hegefet ebè gónô skukum yóm deng tonem, déke muléki myak du ke wen hemkéng du béléem.

⁹ Ke wen gónóm là segtud yóm dumuhem tau tódô lifut sentulón ye ne bê ye bud hból.

¹⁰ Déke henyaken uu yóm tau hmungol du ne laen tul kkóhen tahem yóm yakem.

¹¹ Tey tilob mungol du yóm tau hulung temblà ne semgtón du yóm udélen.

¹² Yóm kbólów yóm tau deng hulung hedem tey bong muhen bè yóm tau mimón senta yóm tising blówón megélék.

¹³ Yóm tau gsalig henyuhen nawa yóm tau mdók du lómón kehyu kegnómen du lómón ke minum él tnaw bè kkinì kdaw.

¹⁴ Yóm tau fmasad bemlay laen tul kdohoen mkél bè yóm tmengeb ne lenos laen kulónen.

¹⁵ Yóm tau manay nawahen gwahen nawa yóm tau kmamal ne yóm udél ganag gbeken mgoy yóm tau mgel kuluhen.

¹⁶ Ke mtoni tneb tenblaem kkenem du déke lemwóli du.

¹⁷ Olò bnatulem klawahem bè gónô yóm dumum sebét, déke tmakas béléem ne mutó nawan kóm.

¹⁸ Yóm tau tmifù kéng hnayamen kdumun lómón ke hlayamen du bogul duhen ke sudeng ne duhen ke hanak.

¹⁹ Yóm ksidek smalig yóm tau là gsalig du bè yóm kwen hlayam lómón se yó yóm ksideken yóm ngihi temduk duhen ke yóm ti deng tugô.

²⁰ Yóm semngal bè yóm tau alì sidek keblat nawan lómón ke nlusen kgalen yóm tau tennaw duhen ke lenunolem kahì yóm halì.

Kem udél hlalak gbak ebè kem hohon te

²¹ Ke bitil yóm hohonem, henkenem ne ke meeng, hinumem.

²² Ke ni se nmoem ebè yóm hohonem tey sidek kyaken lemwót bè yóm kehyu kmoem ebéléen ne Dwata he bemlay kóm ofol lemwót bè yóm nmoen yó.

²³ Yóm kdohò yóm lenos nbol kulón lemwót fi gu bwak lómón se yó kdohò kebut tau du yóm tau lemnek ksumóngen.

²⁴ Mom hyu he ke nô bè gónón hnas yóm tau senta ke setnù le tuha libunen yóm tendo gel mit du sgés lem gónô.

Kem udél hlalak gbak ebè kut knô

²⁵ Yóm kehyu kegnóm tau du yóm kungolen yóm tulón hyu lemwót gu bè benwu mayuk lómón ke gemtob él tnaw yóm tau alì sidek kleengen.

²⁶ Yóm kegmung yóm tau tedeng kmoen bè yóm tau gel mò sidek, hol lómón yóm kokol duhen tbul él deng sidek.

²⁷ Là kóen hyu ke gedlug kkenem tneb, senged se là kehyu yóm kesgaluhem kegsalù kem tau kóm.

²⁸ Yóm tau là gbeken mafas nawan laen dù gmoen, lómón ke yóm benwu bong laen dù labat hilolen tódô mngal bè hohonen.