Kem Udél Hlalak Tehe Selumun 24 - Udél Dwata: Gna Kesfasad ne Lomi Kesfasad

Kem udél hlalak gbak ebè yóm dê kay kmò tau

¹ Béem hendémê yóm kul kmò klowil yó kem tau gel mò sidek ne béi se tô mit swè bélê le.

² Són tendo hendem le matul yóm sidek, tódô ket kebngat le sumóng le sal gel wen tau hensidek le.

³ Lemwót bè khulung tau hedem gónón mdà yóm gónô ne lemwót bè khulungen temnef gónón baling mbegel.

⁴ Ne lemwót bè ketngónen gónón tódô ket du kimu mebtes ne tilob.

⁵ Mom hyu he yóm tau hulung hedem senta yóm olon kemgis ne yóm temngón senta yóm kemnu.

⁶ Song hyu yóm mit sgida ke na hninggel semsatul du gna ne ke dê tau matul bè yóm kwit du yó gónó le gemmò.

⁷ Ngelem yó kem udél hulung hedem là getnef tau book du, là kô tngónen du ke tedu mò udélen ke myón bè kukum.

⁸ Yóm tau tendo gel matul mò sidek tótól du yóm nmoen.

⁹ Yóm tau book tódô ket natulen sal gónó gemsalà ne kenlit kem dumu tau yóm tau gel semdekà.

¹⁰ Ke tlek kóm lenmek bè yóm kwen glumfakem là kóen wen kgisem.

¹¹ Béi hengayà hewà du yóm tau golu etahen hekawang yóm hatay ne dalang se yóm tau són khatay du duen.

¹² Déke monem, laen kô dou hentngón du, okóm Dwata temngón du yóm nô lem but blututem ne du hemdeng du yóm kóm kmò. Tendo tnanuden u, ne benlayen u ofol geblà bè yóm deng nmoem.

¹³ Ó Man, mkeni tneb abay se tey hyu ne tey mnóm béléem yóm tneb.

¹⁴ Lómón se ni kehyuhen béléem yóm khulung hedem ke hol suem bè nawahem. Ke ni se nmoem, dohò tonem kehyuhen ne dohò kgutahem du yóm hendeenem.

¹⁵ Béi abay matul mò sidek bè gónô yóm tau tedeng kmoen lómón yóm kun kmò yóm tau gel mò sidek ne béem hensidek se yóm kun gónó nô.

¹⁶ Yóm tau tedeng kmoen baluen ke hilu duléken wen hemsidek du sal bud gel gebtik, okóm kul yó kem tau gel mò sidek glumfak hlayam le.

¹⁷ Ke wen gónón glayam yóm tau dumum sfohon béen timu óyóem du ne béem fen tô hnigal ke wen hemsidek du.

¹⁸ Yakà ton Dwata du yóm kmoem yó ne là kóen hligal du, déke mom kóhen kebuten du yóm hohonem yó.

¹⁹ Béem lenóngón yó kem tau gel mò sidek ne béem hendémê se yóm kul kmò.

²⁰ Yakem wen nefet nawan ne laen se hyu gutahen yóm tau mò sidek.

²¹ Ó Man, hol knikoem Dwata ne yóm tau hol geta béléem ne béi segbót bè yó kem tau hguluk bélê le.

²² Yakà mekto ksuten bè yó kem tau hguluk yóm glumfak gu bè Dwata ne yóm tau hol geta yó ne tmau du de eles tô temngón du yóm tey keglà lemwót bélê le yó?

²³ Yó kem tau hulung hedem mon du ni kem ni: Là kóen hyu yóm tau kmukum ke mtukul nfihen.

²⁴ Ne ke là hensalaen du yóm tau gel mò sidek, tnuled le kem dumun tau ne tey sidek kebut kdéen tau du.

²⁵ Okóm yó kem tau kmukum ke tnafak le yóm tau wen salaen hyu klowil le ne tey ksalù kem tau kul.

²⁶ Yóm balà laen kéngen ilô yóm tahu keswè.

²⁷ Béem tagad hendem kmoem gónô ne kyehenem ke là nam hol hbalay du kmoem hulu bè tonokem anì hol wen klowilem.

²⁸ Béem lenbù gbót tmifù yóm dumum ne béi se tódô lembù mò tulón etahen.

²⁹ Béem mon nmou béléen yóm deng nmoen béléu mò belesu du.

³⁰ Deng lanu lem numa yóm tau lemfu ne gu lem hulu yóm tau laen dù ledemen ni,

³¹ ne tonu tódô tfeng sual ne kluon ne gotu hugón yóm labat botu hilolen.

³² Yóm ktonu du nim ni tey kehedemu du ne tey wen hlauhen do.

³³ Yó hlauhen do nam na tungô likót ne nam na hegnô likót,

³⁴ okóm bè yóm igoem tungô tódô nuluken u yóm kélélem lómón kuluk yóm tau gel mnagaw.