Kem Udél Hlalak Tehe Selumun 23 - Udél Dwata: Gna Kesfasad ne Lomi Kesfasad

¹ Ke seyóni mken bè yóm tau hol geta hol ten-gamahem mò kmoem.

² Ke gel bong iwolem mken hol nafasem nawam.

³ Béem hotu óyóem du yóm ken alì tilob kayen, déke olo tinggien kóm.

⁴ Béem són henlom nawa yóm kwen kendengenem, hfulungi hedem ne nafasem nawahem.

⁵ Yóm kendengenem tey mahil gotu, là kô sudofem du sana là bud tonem du.

⁶ Béi mken bè yóm tau segfét, duhen ke hotuhem óyóem yóm ken alì tilob kayen béléem.

⁷ Yakà tendo hendemen du btesen anien ke monen, “Holi mken,” là kóen lemwót lem nawahen.

⁸ Angat lewólem yóm deng kenem sok tngónem yóm hendemen ne olon mom gamà yóm kehtilob udélem ebéléen bè yóm kenen.

⁹ Yóm tau book béem dog tolok du ne yóm hyu yakà mom sendekaen du yóm kóm khulung hedem.

¹⁰ Hol béem nili yóm sana blóng legen duhen ke nwahem yóm tonok yó kem ngà hikit.

¹¹ Yakà alien mfasang yóm Dwata mofin kul ne du mdà du bélê le yóm kul sentulón gbak ebéléem.

¹² Hol suem lem hendemem yó kem hlau ne hol hnungolem udél yó kem tau temngón.

¹³ Béi hengayà semtódô du yóm ngà. Yóm kfes du là kô hatayen du.

¹⁴ Bè yóm kfes du lenwaem yóm kun klowil lem hatay.

¹⁵ Ó Man, ke balingi hulung hedem teye hligal se do.

¹⁶ Tey kehyu nawahu ke gungolu béléem yó kem udél tedeng.

¹⁷ Béem hendémê kul kmò klowil yó kem tau gemsalà, okóm hol henlomem kmikò ke Dwata bè klawihem mowil.

¹⁸ Ke lómón ni kmoem du dohò ktonem kehyuhen ne yóm hyu nefet nawahem là kóen hotok.

¹⁹ Hol hnungolem, Man, ne hfulungi hedem ne hol suem lem hendemem yóm kmò kwitem ktauhem bè kehyuhen.

²⁰ Béi gmung bè yó kem tau tendo minum duhen yó kem tau bong kutón le.

²¹ Yakà tau lengel du ne tau bong iwolen mken yóm baling élél ne yóm tau són moen tungô lemwót bè kbong kkenen ne kinumen mulék kmangkang.

²² Hnungolem udél maem yóm mngà kóm ne ke deng tuha yéem béem nit gnê.

²³ Hol nwahem bè nawahem yóm tahu ne béem glus, senged se yóm khulung hedem ne ketngón ne khulung temnef.

²⁴ Tey kehligalen yóm mà yóm tau tedeng kmoen, dalang se yóm tau ke hulung hedem ngaen logi senged kehligalen.

²⁵ Hol henyuhem nawa kem tuhahem ne hefligalem yóm libun mngà kóm.

²⁶ Ó Man, hol hnungolem o ne hol tenngelem yó kem dou kmò klan mò loloem.

²⁷ Abay se yóm libun hdóyón lómón ke du yóm sol leyóng ne yóm libun mdà yehen tundug le u e lem hatay.

²⁸ Són mò le mangat kihu tau lómón kangat yóm tau mnagaw ne lu but gónó le là tmeneb yehen le yó kem logi.

²⁹ Tmau du de yóm wen gfaen? Tmau du de yóm langag? Tmau du de yóm sbólów? Tmau du de yóm tendo tmalaw? Tmau du de yóm wen lebeneden là tngónen du tódô du? Tmau du de yóm hulô matahen?

³⁰ Lu se yó kem tau tendo tmolun bè yóm ninum lemengel, yó kem tau tendo tmilów yó kem ninum deng sensbol.

³¹ Béi gbóy du yóm olo kun khulô yóm ninum lemengel ne yóm kessulé kodoken lem basù ne yóm ktilob hemlo du.

³² Yó uléken ke soki minum sidek kegnómem du kogolen lómón ke nékéten u yóm ulal alì malas.

³³ Ne dê sidek glebed bè ketngelem ne là kô gtódóem du kmò khógówem kehedemem ne kestulónem.

³⁴ Lómón kegnómem du ke hlilili ta kafal bè yóm kewók mohin ne lómón ke klólóhi htemfed eta bè yóm tébéd layal kafal.

³⁵ Ne monem, “Deng wen smuntuk do, okóm là desen béléu. Deng bnoug le o, okóm là gnómu du. Soke btik naw na bud mebel mò ninumu.” Ni se koni yóm monem ke ni yóm nmoem.