Kem Udél Hlalak Tehe Selumun 22 - Udél Dwata: Gna Kesfasad ne Lomi Kesfasad

¹ Mom hyu he yóm tau ke néléken yóm któtól bè kehyu kmò senta yóm kbong kendengenen ne mom hyu he ke tótól bè yóm kehyu nawa senta yóm kwen tembaga futien duhen tahu blówónen.

² Yóm tau élél ne yóm tau mdengen senged le bè yóm kmò Dwata kul.

³ Yóm tau hulung milô eles dilóen ne senyahen yóm sidek, okóm yóm tau là ngelem kehedemen mom mógów e du ne yó gónón glayam.

⁴ Yó ofol yóm tau heglaan ne kmikò ke Dwata duhen yóm kendengenen ne kegdóyónen ne ktahà ktauhen.

⁵ Yóm tau là btol kehedemen tey dê gónón btang ne gholot ne yóm tau eles mabung hlayuk bè yó kem sidek.

⁶ Eles hdalang yóm ngà yóm kmò kwiten du hyu yóm kun kmò ne sok deng malay knawahen là kô gkóhen du.

⁷ Yóm tau mdengen, knamalen yóm tau élél ne yóm tau mutóng hesek yóm tau hemdóm.

⁸ Yóm tau gel mulu yó kem nmò là tedengen, glumfaken bunguhen ne gesón se kehegnoken kem dumun.

⁹ Nuyag Dwata yóm tau bkas nawahen ebè kem dumun ne gel benlayen ken yó kem tau élél.

¹⁰ Anì tefnô yóm kesbólów, hdó yóm tau gel sedekà, dalang se yóm kesegled ne kudél hemsidek nawa.

¹¹ Yóm tau henlomen yóm klaen dù belen kehedemen ne yóm alì kehyu yó kem udélen, yó se gónón geswè bè yóm tau hol geta.

¹² Tendo gel olun Dwata yóm ktahuhen, okóm tnangkisen yó kem udél yóm tau mò kéng.

¹³ Yóm tau lemfu tódô kem mngak liyun hekawang, monen, “Mataye mni ke hewae.” Mò dawahen anì là moen nmò.

¹⁴ Yóm ksamuk lómón ke holot gónón bkó yóm tau lenbut Dwata.

¹⁵ Sana kmoen se yóm ngà sal gel wen là kguliten, okóm bè kfes du mkó du béléen.

¹⁶ Yóm tau lenugihen yóm tau élél anì temnù kendengenen, baling élél. Senged se kbalingen élél ke bemlay bè yóm tau mdengen.

Kem udél hlalak gbak ebè yóm dê kay nmò

¹⁷ Ni sii yó kem udél yóm tau hulung hedem, monen, “Hol henklinguhem se yóm dou udél ne hol suem lem hendemem yóm dou ketngón.”

¹⁸ Yakà teyen hyu nawahem du ke hol suem lem hendemem ne ke gbekem bud tmulón du bè kem dumum.

¹⁹ Kóyóu ke hol snaligem Dwata ne ni se yóm hetngónu kóm ni.

²⁰ Snulatu bélê ye yóm tlu folò kem udél hlalak. Ni kem udél hlalak bè kehlau ne ketngón ni

²¹ mò hetngón du kóm yóm ktahuhen anì gbekem bud tmulón du bè yóm tau mdók kóm, yóm tahu duhen.

²² Béem nongò yóm tau élél baluen ke gbekem mò du duhen ke nitem skukum igoen élél.

²³ Yakà Dwata du mdà du béléen yóm kun sentulón ne hensideken klowil yóm tau hemsidek yóm tau élél.

²⁴ Béi mit swè bè yóm tau sunget duhen slomong bè yóm tau alì sidek kebuten.

²⁵ Déke gdalangem yóm kun kmò ne yó gónóm gholot ne là bud gmoem du yóm hyu.

²⁶ Béem fnasad fen tô mayad utóng dumu tau.

²⁷ Sok là gbekem mayad du balù yó he kem gónóm tungô sana kwa le du.

²⁸ Hol béem abay kó yóm sana ilô bè blóng tonok tehe nmò yó kem gónó ye semfu.

²⁹ Tonem kô yóm tau alì gulit kmoen nmò? Knóón kmoen nmò bè yó kem tau hol geta, là bè yó kem tau hkawang du.