Kem Udél Hlalak Tehe Selumun 21 - Udél Dwata: Gna Kesfasad ne Lomi Kesfasad

¹ Dwata se fen malak du yóm kun kmò kógów kehedem yóm tau hol geta, balù kihu gónó Dwata e bemklil du lómón kebeklilen yóm lel él.

² Ofo tau hemdem du ke hono tedeng yóm kun kmò, okóm Dwata hemdeng du yóm nô lem but blututen.

³ Tey hyu nawa Dwata du yóm tedeng ne yóm là kkihu senta yóm gel dsù ebéléen.

⁴ Bè yóm kehtonen salù ne keheklabaken gónón galak yóm tau gel mò sidek ne yó se mit du gemsalà.

⁵ Yóm tau mefesek ke tilob katulen du yóm nmoen yó se mit du gónón wen klowilen, okóm yóm tau henkosohen yóm kendengenen baling élél.

⁶ Yóm kendengen guta tau mlan bè ktulónen kéng tódô kmanas lómón keklanasen bulók kulón ne ni se gónón gholot e lem hatay.

⁷ Lemwót bè yóm alì ksidek nmò le yó kem tau gel mò sidek gónó le golu elem hatay, abay se kenbê le mò yóm tedeng.

⁸ Yóm kun kmò klan yóm tau gemsalà là kóen btol, okóm yóm tau laen dù belen kehedemen tedeng yóm kun nmò.

⁹ Mom hyu he ke nô te hatal yóm tau, senta ke setnù le tuha libunen yóm gel mit du sgés lem gónô.

¹⁰ Yóm tau gel mò sidek són nusolen yóm kmoen sidek ne laen kô koduhen kdumun.

¹¹ Sok megtafak yóm tau gel semdekà bè yó he gónón baling hulung hedem yóm tau là ngelem kehedemen. Ne ke hnauhem yóm tau hulung hedem mom temnù ketngónen.

¹² Dwata se yóm temngón du yóm kun gmónô yóm tau gel mò sidek ne bud du se heglà kul.

¹³ Yóm tau là kenmónen du kehkoduhen béléen yóm tau élél, là se wen kemmón du yóm kun kehkodu.

¹⁴ Yóm kimu lifut blay hebóhen lebut ne yóm kimu mò wa nawa lifut blay, hkóhen yóm sidek kebut.

¹⁵ Sok tedeng yóm kukum tey hligal yó kem tau tedeng kmò le, okóm yó kem tau gel mò sidek bud ni se tenkedu le.

¹⁶ Yóm tau senyaten yóm lan ebè yóm khulung hedem mahil knóen bè kul gónó nô yó kem matay.

¹⁷ Yóm tau alì beyen bè yó kem kun gónó hligal, baling élél ne yóm tau beyen bè yó kem ninum lemengel ne yó kem ken segkay, là kô wen kendengenen.

¹⁸ Yóm hlayam nmò yóm tau gel mò sidek bè yóm tau tedeng kmoen mom bud mulék etahen.

¹⁹ Mom hyu he ke nô bè benwu laen dù menwu du yóm tau senta ke setnù le tuha libunen yóm gel mit du sgés ne lembut du.

²⁰ Yóm tau hulung hedem tey mdengen kken le ne tey wen kimu mebtes nô bè gónô le, okóm yóm tau book tódô namaen hekawang yóm kun.

²¹ Yóm tau sen-galuhen yóm ktedengen ne kogot nawa tau béléen tonen se ktahà ktauhen ne kadat tau du.

²² Yóm tau hulung hedem gbeken muluk ebè yóm kul gónó nô yó kem tau alì hulung sfatay ne genbaen yóm kul gónó heklung alì genléd nawa.

²³ Yóm tau eles gel nabungen kudélen yó se hlayuk du bè yó kem gfà.

²⁴ Sedekà boluy du yóm tau heklabak ne hton salù ne yóm alì sidek keheklabaken bè ket nmoen.

²⁵ Yóm sen-galu nawa yóm tau lemfu yó se yóm hmatay du yakem móyô mò nmò se.

²⁶ Yóm tau lemfu són ófô yóm tendo nô bè nawahen, okóm yóm tau tedeng kmoen là kóen segafas keblayen.

²⁷ Tey kenlit Dwata yóm dsuen ebéléen yóm tau gel mò sidek, hol néen ke yó gónón tô demsù anì mkó tahen yóm salaen.

²⁸ Yóm tau gel tmifù kéng là kô gel hentahu le du, okóm yóm tau mudél mlan bè ktahuhen mekteng kungol le du.

²⁹ Yóm tau gel mò sidek olon hmingón hegfan du yóm ktedeng kmoen, okóm yóm tau tedeng kmoen gel hendemen yóm ktedeng kmoen ebè kem dumun.

³⁰ Là kóen lemyu senta Dwata yóm khulung tau hedem duhen yóm khulungen temnef ne khulungen hmau.

³¹ Baluen he ke deng eles hentifes yó kem kudà mò gel nit sfatay, okóm són Dwata gónón gel lemwót yóm kegmò.