Kem Udél Hlalak Tehe Selumun 20 - Udél Dwata: Gna Kesfasad ne Lomi Kesfasad

¹ Yóm kesedekà ne kehfulów tau lemwót bè yóm tifas ne kem ninum lóbô ne yóm tau lengel du là kóen hulung hedem.

² Yóm klikò tau du yóm alì sidek kebut yóm tau hol geta lómón yóm klikò tau du yóm ngel yóm mon le liyun. Yóm tau hebut yóm tau hol geta hfatayen knóen.

³ Megdóyón yóm tau là miten sbólów, okóm sok fes tau book sal gel mit sgés.

⁴ Yóm tau lemfu là kô tenblaen du yóm bantang kdaw kehyu dmadu. Yó gónóm mon bè yóm kdaw kuta tódô tô mebel okóm laen dù tonen.

⁵ Yóm kngelem yó kem atul nô lem hendem tau lómón yóm linu alì nelem, okóm yóm tau alì hulung temnef tngónen bè ketdeken du.

⁶ Tey dê tau smalù du yóm kul kogot nawa, okóm olon mtukul gónó mton du yóm tau gsalig.

⁷ Hyu nawa le kul yó kem kun ból yóm tau tedeng ne laen dù belenen yóm kun kmò.

⁸ Sok bangen kmukum yóm tau hol geta gotu dilóen yó kem tau gel mò sidek ne knukumen lu.

⁹ Laen kô dù tau gembek mon du, “Deng gotu hólósu ne lem but blututu ne laen dù salau.”

¹⁰ Tey kenlit Dwata yóm kihu nmò lemingko ne yó kem btes là tódóen.

¹¹ Balù yóm ngà sana kdilô du bè yó kem nmoen ke laen dù kéngen duhen ke tedeng kmoen.

¹² Dwata se fen bemlay du kut yóm klingu mò hungol ne yóm mata mò hton.

¹³ Béem henlom ktungóem déke balingi élél, btiki ne moi nmò ne là kói élél ken.

¹⁴ Yóm tau sal gel senlónen yóm hbalù lanen tô mkos btesen, okóm bè yóm deng kewóten tey ksaluen du yóm deng benlihen.

¹⁵ Yóm udél yóm tau temngón hol mkay senta yóm tahu blówón ne yó kem kimu mebtes.

¹⁶ Ke sok wen tau fmasad mayad utóng yóm tau là deng tngónen du yake nan hlun sandà kdê kimuhen dé yóm tau fmasad yó mò gónón tahu.

¹⁷ Yóm ken nwa mlan bè sukat tey mnóm bè yóm tau ma du, okóm kogolen bè yó mom wen gfaen du.

¹⁸ Baling yóm atul ke wen gónó halak ne na hol henyu semsatul du gna, ominen hyu mit sgida.

¹⁹ Yóm tau lemnek ksumóngen gel tulónen yóm lifut tulón du, yó gónóm mon béi segbót bè yóm tau tódô faen kudélen.

²⁰ Matay se kun yóm tau tnuleden kem tuhahen, lómón yóm solok mlef lem gónón mget kifu.

²¹ Yóm umun lenolok nwa laen dù kligalem du bè hulihen.

²² Béem abay mon, “Melese se dou.” Nam na hatan kun kmò du Dwata, du he tmóbóng kóm.

²³ Tey kenlit Dwata yó kem nmò lemingko ne yóm tmimbang lemugi, là kóen hyu.

²⁴ Deng eles natul Dwata yóm kun kmò kógów klowil yóm tau, okóm là kô tngón tau du yóm kun kógów klowil.

²⁵ Yóm tau tódô faen mò fasad bè Dwata angat gsel ne mom yó he tô kehkuónen mebel lanen hemdohò du deng kogolen.

²⁶ Yóm tau hol geta hulung hedem dilóen yó kem tau gel mò sidek ne bè yóm ktafaken kul laen kô bud kodu mung du.

²⁷ Bè Dwata gónón lemwót yóm kehedem tau ne tódô tngón tau se yóm hyu ne yóm là hyuhen ne laen dù gbuni bè Dwata.

²⁸ Yóm kogot nawa ne yóm kteneb yó se mit du hyu knóen yóm tau hol geta ne yóm kun ktedeng yóm hembegel du yóm kun kogot.

²⁹ Yóm gónó le megsalù yó kem lomi lemnok duhen yóm kul kgis ne yóm gónó le megdóyón yó kem logi deng tuha duhen yóm kubón le.

³⁰ Yóm lebened lemwót bè kestódô gónón mkó yóm nmò sidek ne bè yóm kboug gónón sfili yóm kehedem tau.