Kem Udél Hlalak Tehe Selumun 2 - Udél Dwata: Gna Kesfasad ne Lomi Kesfasad

Bê ye nmung yóm nawa hdóyón

¹ Ó Man, hol hnungolem yóm toloku kóm ne hol henlom nawam yó kem hlolou kóm.

² Hol henklinguhem ke tedu udél yóm khulung hedem ne hol suem lem hendemem yóm getnefem du.

³ Hol sen-galuhem yóm khulung milô ne yóm khulung temnef.

⁴ Hol hen-gelem mebel du yóm khulung hedem lómón yóm gel kebelem tembaga futì ne dumu kimu mebtes gebnos.

⁵ Ke ni se yóm kmoem du, yó he kegetnefem du yóm klikò ke Dwata ne ktonem du yóm kesetngón ke Dwata.

⁶ Yakà tek són du bemlay du yóm khulung hedem ne bud du se gónón lemwót yóm ketngón ne ketnef.

⁷ Ne du se bemlay khulungen mit ktauhen yóm tau tedeng kmoen ne bud du se kemlung du yóm tau laen dù belenen yóm kun kmò.

⁸ Gel kenlungen yóm kul lan yó kem tau tedeng kmò le ebè kem dumu le ne gel sen-gyoken yóm kul lan yó kem tau hteneb béléen.

⁹ Ominem yó he gemtnef du yóm tedeng ne yóm ktedeng kmoem ebè kem dumum ne yóm là keskihuhen ne tódô tngónem se yóm hyu.

¹⁰ Yakà balingen gnô lem nawam yóm khulung hedem ne hligali du yóm ketngónem.

¹¹ Yóm khulungem mit du hyu yóm kmoem ne yóm khulungem temnef yó se yóm kemlung kóm.

¹² Kenlung le u bè yóm tau gel mò sidek ne bè yó kem tau mò tulón seblékê

¹³ ne bè yó kem tau deng kembê du yóm ktedeng kmò anì hlós klolò le du yóm sidek.

¹⁴ Ne bud kenlung le u se bè yó kem tau mom hyu nawa le mò salà ne mom hnigal le yóm alì ksidek kmò le

¹⁵ ne bè yó kem tau laen kô ken-gel nawam bélê le ne là se tedeng kmò le.

¹⁶ Yóm khulung hedem kenlungen uu bè yóm libun hdóyón ne bè yóm libun mdà yehen tô hegbóy kóm bè tilob kudélen.

¹⁷ Ni se yóm libun là teneben bè yehenen ne mom nuléhen yóm tehe kun fasad ke Dwata bè kyehenen.

¹⁸ Ke mógówi ebè gónóen lómón ke yó yóm deng lewótem e lem hatay. Yóm kógówem yó, lómón ke deng gloloem ne yóm lan ebè yóm benwu yó kem deng matay.

¹⁹ Laen kô dù tau mógów ebéléen bud gulék ne là se buden gesfulék ebè yóm sana kun klowil.

²⁰ Okóm uu, lemwót bè yóm khulungem hedem hol loloem yóm kul kmò yó kem tau tedeng kmò le ne hol hentedengem yóm kóm kmò klowil.

²¹ Yakà tek són yó kem tau tedeng kmò le gmuta du yóm kehyu nawa Dwata ebélê le ne lemwót bè yóm klaen dù belenen yóm kul kmò gónón tahà ktau le lem nim benwu ni.

²² Okóm yó kem tau gel mò sidek là kóen tahà ktau le. Kó Dwata lu te tonok lómón ke kemdut kluon.