Kem Udél Hlalak Tehe Selumun 19 - Udél Dwata: Gna Kesfasad ne Lomi Kesfasad

¹ Mom hyu he yóm tau élél laen dù kéngen senta yóm tau book ne gel mò kéng.

² Là kóen hyu ke tódô faem kmoem ke là deng eles tngónem du duhen ke alì hentlagadem ne dengi mom su.

³ Lemwót bè yóm kun kbook yóm tau gónón gbà klowilen, ewenem sana kehnuléken ke Dwata.

⁴ Yóm kbong kendengen yóm tau mit du dê dumun swè, okóm yóm tau élél mom hnayuk yóm dumuhen.

⁵ Yóm tau tmifù kéng là kô lugun du là tnafak ne yóm tau lemgas yóm kéng là kóen gewà lem tafak.

⁶ Yóm tau masa tey dê tau móyô mit du swè ne yóm tau gel bemlay tey dê tau swè du.

⁷ Yóm tau élél sal gel knutó nawa yóm kdê dumun setwoli milud he yó kem ween gotu le hlayuk béléen. Baluen ke són moen lemolò hkodu bélê le là kô tonen kul.

⁸ Yóm tau ma yóm khulung hedem henyuhen klowilen ne yóm tau hol msù du bè nawahen yóm khulung temnef, hyu klowilen.

⁹ Yóm tau tmifù kéng là kô lugun du là tnafak ne yóm tau lemgas yóm kéng hukolen klowilen.

¹⁰ Là kóen knóón bè yóm tau book ke genbóten klowil yóm tau wen kendengenen ne milud he kóngóhen bè yóm hesek ke du kmamal yó kem tau hol geta.

¹¹ Yóm khulung tau hedem bemlay du kanay nawa, ke gemsalà le béléen yó kem dumu tau tódô hnifóten, yó se gónón megdóyón.

¹² Yóm klikò tau du yóm alì ksidek kebut yóm tau hol geta hol lómón klikoen du yóm ngel yóm gel mon le liyun. Okóm yóm kun kehyu nawa ebéléen yóm tau hol geta lómón kehyuhen bè bnes yóm amù.

¹³ Yóm logi book nmoen glumfak maen ne yóm libun tendo niten sgés tuha logihen lómón yóm tdak él tendo hfulów muni.

¹⁴ Yóm gónô ne yó kem kendengenen yóm logi sal umun lemwót bè kem tuhahen, okóm yóm libun hulung milô mò yehenen, lemwót bè Dwata.

¹⁵ Yóm kefu tau mit du lemnga ne lemwót bè kduken mò nmò gónón glayam bitil.

¹⁶ Yóm tau mimón yó kem hlau Dwata htahaen ktauhen, okóm yóm tau là kenmónen yóm udél Dwata hukolen ktauhen.

¹⁷ Yóm tau knoduhen yó kem tau élél lómón ke hendómen Dwata ne Dwata he hulék du yóm deng blayen.

¹⁸ Eles tnedengem yóm ngaem gu laanen là deng gtufì hol béem tódô lugun du là sentódô, déke matay bè yóm sidek nmoen.

¹⁹ Yóm tau sunget yake tódô du mayad salaen abay se ke fen bnayadem béléen tenmónen mò du.

²⁰ Hnungolem yóm kehlau le kóm ne henmóyóem yóm kestódô le kóm anì hulungi hedem.

²¹ Tey dê yó kem atul nô lem hendem tau, okóm són yóm kun kóyô Dwata baling du.

²² Yóm keseglom tau yó se yóm hemyak du ne mom hyu he yóm élél senta yóm mò kéng.

²³ Yóm klikò tau ke Dwata gónón mowil ne hyu ktungóen ne laen dù hemenen.

²⁴ Yóm tau lemfu olon mnok te huyówen ne là dog gsungiten du kenen.

²⁵ Lemwót bè yóm ktafak le du yóm tau heklabak gónón baling hulung milô se kun yóm tau là dengen ngelem kehedemen. Ne ke bnólówem yóm tau hulung temnef temnù ketngónen.

²⁶ Yóm tau hensideken klowil maen ne hdóhen yéen yó se yóm logi hemyak ne hudél knô.

²⁷ Ó Man, ke béi hmungol hlau yó gónóm tlas bè yó kem udél mit kóm temngón.

²⁸ Yóm tau tmifù kéng sendekaen yóm tedeng ne alì nóyóen yóm sidek.

²⁹ Deng wen tafak eles mangat kul yó kem tau semdekà ne yó kem tau book eles wen se bogul tgama kul.