Kem Udél Hlalak Tehe Selumun 18 - Udél Dwata: Gna Kesfasad ne Lomi Kesfasad

¹ Yóm tau là hulungen swè olohen hemdem yóm kun knô ne gel hnebelen lanen sembólów kdê yó kem nmò tedeng.

² Yóm tau book laen dù kligalen du kun yóm khulung temnef, okóm són hnigal tulónen yóm kun kehedem.

³ Sok wen yóm nmò sidek bud bè yó se gónón wen sedekà sok laen bud sadat mung du se yóm kesefyak.

⁴ Yó kem udél yóm tau hulung hedem gónó le lemwót hulung hedem yó kem dumu tau, yóm kngelem yóm kun udél lómón ke mohin ne yóm kehyuhen lómón ke él mlel.

⁵ Yóm tau gel mò sidek là kóen hyu mfi du duhen ke bnekel yóm ktedengen ebè yóm tau laen dù salaen.

⁶ Yóm kun kudél yóm tau book gónón lemwót yóm kesbólów ne bud bè kudélen gónón boug.

⁷ Yó gónón meglà yóm tau book lemwót bè kudélen ne bud bè kudélen gónón gholot.

⁸ Yóm udél yóm tau lemnek ksumóngen lómón ke ken alì mnóm, tey le beyen mungol du yó kem tau.

⁹ Yóm tau là teneben mò du yóm kun nmò hol lómón ksideken yóm kul kmò yó kem tau gemlà.

¹⁰ Yóm Dwata mò gónó le heklung ne gónó le e mlo yó kem tau tedeng kmoen ne gónón hyu knóen.

¹¹ Yóm tau mdengen bè kun kehedem du, yóm kendengenen yó yóm mò henged klungen, hol lómón ke henged beng geta hmilol du.

¹² Laen kô dù tau madat du yóm tau ke là nan na heglaan du knóen ne yóm tau heklabak meglà.

¹³ Yóm tau là nan na hmungol ne kendel gel semlok yó se kmò yóm tau book ne henyaken kun knô.

¹⁴ Yóm tau gbeken hembala yóm desen, yó se yóm tau tolo móyô mowil, okóm ke là buden móyô laen kô dù kmoem du.

¹⁵ Yóm tau hulung milô gutahen ketngónen ne yóm tau hulung hedem són moen hemklingu yóm ketngón.

¹⁶ Yóm basa hennasen lan yóm tau bemlay ne niten bè solu yó kem tau bong boluy le.

¹⁷ Yóm tau gna kmamo lómón ke tahu yóm kun tulón ke là wen tau dumun sembekas yóm ktahuhen.

¹⁸ Yóm keskuya, yó hemdeng du yóm kmò le atù ne bud senged se yó kem tau sbantak.

¹⁹ Ke wen gónó le sgulé yó kem tau swè tey mgel semfyu kul senta yóm mled sotu benwu bong ne senged se yó kem tau sbólów tey mgel semfyu kul.

²⁰ Gel gsengel nawahen du yóm tau lemwót bè ulék kun udél ne bud gsengel se nawahen du bungu yóm kun kudél.

²¹ Wen se udél tau gónó mowil ne wen se udél gónó matay ne bud gutahen se bungu yóm udélen.

²² Yóm tau mton yehen tonen yóm hyu béléen ne gutahen yóm kehyu nawa Dwata ebéléen.

²³ Yóm tau élél sal gel mudél hkodu, okóm yóm tau wen kendengenen mom heskong ke malà.

²⁴ Wen se tau olon beyen mon du, Wè, okóm wen he yóm swè mget senta kesetwoli.