Kem Udél Hlalak Tehe Selumun 17 - Udél Dwata: Gna Kesfasad ne Lomi Kesfasad

¹ Mom hyu he mken yóm ken deng kefel ke mung du yóm kenek nawa senta yóm mung bè yóm mò ken bong wen sbólów du.

² Lemwót bè yóm khulungen hedem yóm hesek, gónón mom baling kmulu béléen yó kem ngaen logi là gulit yóm amohen. Ne lemwót bè yóm khulungen hedem yó gónón gomong gumun bè kdê kendengen yóm amohen.

³ Bè ofi gónó tau tmilów du yóm tembaga futì ne yóm tahu blówón ne Dwata se fen tmilów du yóm nô lem but blutut tau.

⁴ Yóm tau gel mò sidek gel hnungolen yóm tau mudél sidek ne yóm tau gel tmulón kéng gel henklinguhen yóm udél hensideken kem dumu tau.

⁵ Yóm tau sendekaen yóm tau élél, tnondohen yóm Dwata deng tehe mò kul ne yóm tau hnigalen yóm glumfak sut bè dumun tau, là kô lugun Dwata du là tnafak.

⁶ Yó kem tuha salù le yó kem témê le ne yó kem ngà salù le yó kem tuha le.

⁷ Yóm kestulón alì hyu, là knóónen bè yóm tau là sikof kehedemen. Milud he là kehyuhen bè yóm tau hol geta yóm kestulón kéng.

⁸ Yóm tau bemlay yóm kimu mò wa nawa, hol lómón ke bulung wen ktueden bè ktonen du yóm tau bemlay du, abay se balù kihu tau gónón e bemlay du sal gel gutahen yóm nóyóen du.

⁹ Yóm tau tódô hnifóten yóm gemsalà béléen hnebelen yóm kesbong nawa, okóm yóm tau són moen bud mtóng du yóm gemsalà béléen senkóhen yóm keswè.

¹⁰ Yóm tau hulung temnef anien ke tek sulék mólów du sana kwen dnalangen senta yóm tau book baluen ke lematu dulék moug du.

¹¹ Yó kem tau gel mò sidek són matù ne hemsidek gel nmò le, okóm tey ktafak le kul yó kem tau yó.

¹² Mom hyu he gemslong yóm sotu kay ógóf alì sidek klóbóen boluyen bér, olo yóm gemslong tau book tolo lelen mò kbooken.

¹³ Ke bnalaem sidek yóm hyu là kóen mili bè gónóem yóm sidek.

¹⁴ Yóm kbut yóm kesbólów hol lómón ke gónón msut yóm busung él, yó gónóm mon eles nseng anì là lembéten.

¹⁵ Yóm tau bnoluyen tedeng yóm sidek ne yóm tau hensalaen yóm tau tedeng kmoen tódô senged yóm tey keklit Dwata kul.

¹⁶ Yóm tau book laen dù ofolen mamà filak bè yóm knagien yakem wen se óyóen dmalang.

¹⁷ Yóm tau swè, són mò le sbong nawa ne hol lómón kestóbóng le ke wen hlayam sut bélê le lómón ke sesotu sut le.

¹⁸ Yóm tau fmasad mayad utóng dumu tau là kóen hulung hedem ne wen senblay le mò gónón tahu.

¹⁹ Yóm tau móyô mò salà nóyóen yóm kesbólów ne yóm tau heklabak nebelen keglà.

²⁰ Yóm tau sigol kehedemen là kóen hyu klowilen ne yóm tau seblékê kestulónen sal wen glumfaken.

²¹ Yóm logi book tey sidek keblat nawa maen du ne yóm tau là sikof kehedemen là hefligalen ke maen.

²² Yóm kligal nawa tau henyuhen klówóhen, okóm yóm keblat nawa tau mit du lunog.

²³ Yóm tau gel mò sidek gel henmóyóen yóm kimu lifut blay le du anì nfihen yóm là tedengen.

²⁴ Yóm tau hulung temnef tendo snoluhen yóm khulung hedem, okóm yóm tau book lusà du gónón e solu.

²⁵ Yóm logi book tey sidek klangag nawa maen du ne tey sidek se kegsel yéen du.

²⁶ Yóm tau tedeng kmoen là kóen hyu hemsalà du ne salà se ke bnoug lu yó kem tau geta bè ktedeng kmò le.

²⁷ Yóm tau temngón hulung mafas kudélen ne yóm tau là mahilen lembut wen khulungen temnef.

²⁸ Ke tódô yem yóm tau book sana kmon le du tau hulung hedem ne ke là mudélen tódô mon le hulung temnef.