Kem Udél Hlalak Tehe Selumun 16 - Udél Dwata: Gna Kesfasad ne Lomi Kesfasad

Yó kem udél hlalak gemduf kem tau hemtahu bè Dwata

¹ Lem hendem tau gónón lemwót yó kem atul, okóm Dwata yóm bemlay du kegbek hembaling du.

² Ofo tau hemdem du ke hono tedeng yóm kun kmò, okóm Dwata hemdeng du yóm nô lem but blututen.

³ Hogotem ke Dwata yó kem nmoem ne wen gónón e kól yó kem atulem.

⁴ Bè kdê deng nmò Dwata sal gel wen oluhen kul balù yó kem tau gel mò sidek deng oluhen kul yóm kdaw ktafak.

⁵ Tey keklit Dwata du yóm keheklabak tau. Ngem, là kô lugun Dwata du là tnafak yóm tau heklabak.

⁶ Mlan bè kogot nawa ne kteneb tau bè Dwata gónón hmifót salaen ne mlan bè klikò tau ke Dwata gónón gemkogol yó kem nmò sidek.

⁷ Yóm tau ke sok hefligalen Dwata bè kmoen balù yó kem hohonen bud senfyu Dwata lu.

⁸ Mom hyu he yóm tau udì gutahen ne tedeng bè Dwata senta yóm tau alì bong gutahen mlan bè là ktedengen.

⁹ Yóm tau, du fen matul hemdem mò du yóm kun kmò klan, okóm Dwata fen malak du bè yóm kmoen du.

¹⁰ Lemwót bè Dwata yóm kun kudél yóm tau hol geta ne laen kô salà du yóm kun kkukum.

¹¹ Tey móyô du Dwata yóm tau tmimbang ne bemtes là lemingkohen ne balù bè yóm kehbalù ke hono tedeng.

¹² Tey keklit yóm tau hol geta du yóm nmò sidek, yakà bè ktedengen du hembegel yóm kun kogot.

¹³ Tey kehligalen yóm tau hol geta bè yó kem tau là tmulónen kéng ne hyu nawan bè yóm tau gel tmulón yóm tahu.

¹⁴ Sok alì lembut yóm tau hol geta ayawen wen matay ne yóm tau hulung hedem eles nebelen lanen hebó yóm kebut yóm tau hol geta yó.

¹⁵ Sok lingas lem uyóhen yóm tau hol geta uka wóyón hlowilen u ne yóm kehyu nawahen ebéléem lómón se yó nem kehyu yóm kulón bè yó kem hulu.

¹⁶ Mom hyu he yóm kwahem yóm khulung hedem senta tahu blówón ne yóm kélékem yóm khulung temnef senta tembaga futì.

¹⁷ Knogolen yóm sidek yóm kun kmò klan yóm tau tedeng kmoen ne yóm tau ten-gamahen kmoen, henyuhen klowilen.

¹⁸ Yó nefet yóm tau hegmón duhen yóm keglà ne senged se yóm tau heklabak.

¹⁹ Mom hyu he yóm tau glaan ne élél senta yóm tau hegmón gbót mólól yó kem guta le mlan bè là ktedengen.

²⁰ Yóm tau kenmónen yóm udél Dwata, tey hyu klowilen ne yóm tau smalig béléen wen kligalen.

²¹ Gel mon le tau hulung milô yóm tau hulung hedem ne lemwót bè khulungen hemtilob kudélen gónón gbóy tau.

²² Yóm tau hulung hedem, lemwót bè yóm khulungen hedem gónón mowil, okóm yóm tau book, bè yóm kbooken gónón megtafak.

²³ Yóm tau hulung hedem tey ten-gamahen yóm kmò kudélen ne lemwót bè yóm khulungen mudél gónón gbóy tau.

²⁴ Yó kem udél hyu tey hyu klówóhem du, hol lómón kegnómem du lómón ke mkeni tneb.

²⁵ Wen se atul lómón tô tedeng bè kehedem tau du, okóm yó sónen hatay.

²⁶ Yóm alì nóyô tau yó se bemlay du óyô mò nmò ne yóm kbitilen gemduf du mò nmò.

²⁷ Yó kem tau laen dù gónó le e kól són mò le matul mò sidek ne yóm kudél le lómón ksideken yóm mluf bè ofi.

²⁸ Yóm tau seblékê kestulónen són moen mit sbólów ne yóm tau lemnek ksumóngen senklahen yó kem tau swè.

²⁹ Yó kem tau gel hmugus, n-goy le kem dumu le ne nwit le lu e lem yóm nmò là hyuhen.

³⁰ Tódô gfan bè uyó kem tau yóm katul le mò sidek ne tódô dilô bè kekdol sumóng le yóm deng kmò le sidek.

³¹ Tey megdóyón yóm tau ke gutahen kubónen lemwót bè ktedeng kmoen.

³² Mom hyu he yóm tau là mahilen lembut senta yóm tau hulung mit sfatay ne hyu he yóm tau hulung mafas nawa senta yóm tau mled benwu bong.

³³ Yóm tau sal gel mò atù anì tngónen yóm kóyô Dwata, okóm ke Dwata kun, eles tngónen yóm balaen kul.