Kem Udél Hlalak Tehe Selumun 15 - Udél Dwata: Gna Kesfasad ne Lomi Kesfasad

¹ Hebóhen kebut tau yóm balà ganag, okóm yóm udél des mom hebuten tau.

² Lemwót bè yóm kun kudél yóm tau hulung hedem gónón lemwót mahil dmalang du yóm ketngón, okóm yóm tau book laen kô muhen yóm kun udél legas.

³ Balù nô, gotu ton Dwata yóm kdéen, gotu tenngelen se ke sidek duhen hyu yóm nmò tau.

⁴ Yóm udél hemyu nawa tendo lenowilen tau, okóm yóm udél wen keseblékê nô du, henblaten nawa tau.

⁵ Yóm tau book hennéen hlau kem tuhahen, okóm yóm tau hulung milô kenmónen yóm kbólów le du.

⁶ Yóm tau tedeng kmoen tey wen kendengen lem gónóen, okóm yóm kun guta yóm tau gel mò sidek, tódô kmanas lemwót bè yó kem gfaen.

⁷ Hbólen yóm ketngón yóm kun kudél yóm tau hulung hedem, okóm fen là kun yóm tau book.

⁸ Tey keklit Dwata du yóm kedsuen ebéléen yóm tau gel mò sidek, okóm yóm kni yóm tau tedeng kmoen hnigalen.

⁹ Tey keklit Dwata du yóm kun kmò yóm tau gel mò sidek, okóm yóm tau hol sen-galuhen yóm ktedengen kenbong nawahen.

¹⁰ Yóm tau ke knogolen yóm nmò tedeng wen tey sidek tafaken ne yóm tau kenbéen yóm kbólów du hukolen ktauhen.

¹¹ Yóm kdéen nô bè yóm gónó le nô yó kem matay gotu gfan bè Dwata, ne milud he kegfanen béléen yóm nô lem but blutut tau.

¹² Yóm tau gel semdekà là kóen móyô bnólów ne là se kóen halak bè yóm tau hulung hedem.

¹³ Gfan ta se yóm kligalen yóm tau lingas nawahen, okóm yóm tau gbeng lemen dilô se kebang nawahen.

¹⁴ Yóm tau hulung temnef són moen semgalu ketngónen, okóm yóm tau book mom gsengel nawahen du yóm kbooken.

¹⁵ Yóm kul klowil yó kem tau élél senflósen mgel, okóm yó kem tau menek nawa le senflósen wen kligal le.

¹⁶ Mom hyu he yóm tau ke laen hol gónón ma ke wen klikoen ke Dwata, senta yóm tau alì bong kendengenen mit du glayam.

¹⁷ Mom hyu he yóm mutón lemnaw ke mung du yóm kesbong nawa, olo yóm mutón tahu utón ke wen sutó nawa mung du.

¹⁸ Yóm tau sunget són moen mit sbólów bè kem dumu tau, okóm yóm tau là mahilen lembut fen gel senfyuhen yó kem tau sbólów.

¹⁹ Yóm kun klowil yóm tau lemfu, lómón ke yóm lan tódô tfeng sual, okóm yóm kun klowil yóm tau tedeng kmoen, lómón ke yóm lan tódô mló.

²⁰ Yó kem ngà hulung hedem hefligal le mà le, okóm yó kem ngà book hennê le yê le.

²¹ Yóm tau là hulungen hedem hligal du se kun yóm kbooken, okóm yóm tau hulung temnef hentedengen kmoen.

²² Là kóen baling yóm natul ke laen dù tau hemyu matul du, okóm ke dê tau semsatul du baling hyu.

²³ Hyu nawan yóm tau ke knóón kbalaen udél sotu tau ne ke gmonen yóm udél segtón ebè yóm nmò.

²⁴ Yóm tau hulung hedem loloen yóm lan eta ebè yóm klowil laen dù sónen anì là gloloen du yóm lan e laan e lem hatay.

²⁵ Dwata se gemlà du yóm kul gmónô yó kem tau hegmón, okóm sen-gyoken yóm kun tonok yóm libun bolu.

²⁶ Tey keklit Dwata du yóm kul kehedem yó kem tau gel mò sidek, okóm hligal du udél yó kem tau laen dù belen kehedem le.

²⁷ Yóm tau seglom hnayamen kem fes lówóhen, okóm yóm tau kenbéen yóm filak mò wa nawahen htahaen ktauhen.

²⁸ Yóm tau tedeng kmoen nan gel hendem yóm mò kbalaen kem dumun, okóm yóm tau gel mò sidek tódô faen lemgas yó kem udél sidek.

²⁹ Hlayuk du Dwata yóm tau gel mò sidek, okóm yóm tau tedeng kmoen hnungolen knihen.

³⁰ Tey hligal yóm tau ke tonen klingas lem uyó yóm dumun ne hol néen ke wen tulón hyu sut tey hyu kegnómen du.

³¹ Ke hnungolem yóm kbólów le kóm mò gónón hyu klowilem, heneki lem blóng yó kem tau hulung hedem.

³² Ke là kenmónem du yóm kehlau le kóm olom hmayam kóm knô, okóm ke kenmónem yóm kbólów le kóm gutahem yóm khulungem temnef.

³³ Lemwót bè yóm klikò tau ke Dwata gónón megtolok bè yóm khulung hedem ne là kô guta tau du yóm kegdóyón ke là nan na gna heglaan du knóen.