Kem Udél Hlalak Tehe Selumun 14 - Udél Dwata: Gna Kesfasad ne Lomi Kesfasad

¹ Yóm libun hulung hedem tey tilob kwiten gu lem gónóen, okóm kun yóm libun book mom genbaen yóm kun gónô lemwót bè kbooken.

² Knikoen Dwata yóm tau tedeng kmoen, okóm là kun yóm tau sigol kehedemen mom sendekaen.

³ Yóm tau book bè kun kudél hegmón gónón lemwót boug, okóm kun yóm tau hulung hedem, bè kun kudél fen mit du hyu.

⁴ Là kóen meglem yóm fol sok laen dù ógóf mò nmò, okóm ke wen ógóf mò nmò, gengón se ken gefet.

⁵ Là kóen tmulón kéng yóm tau ke gel tahu yóm tifuen, okóm yóm tau gel tmifù kéng, sal kéng se yóm gel tulónen.

⁶ Yóm tau gel semdekà gel hnebelen yóm khulung hedem, okóm laen dù tonen, okóm kun yóm tau hulung temnef, mahil wen tngónen.

⁷ Holi hlayuk bè yóm tau book yakem wen se ketngón gwahem béléen.

⁸ Yóm khulung tau milô hetngón du du yóm kun kmò kekdol, okóm yóm tau book, gsukat bè ksalà kehedemen.

⁹ Yóm tau book mom hnowonen yóm salà, okóm kun yóm tau tedeng kmoen, gnómen yóm kehyu nawa Dwata ebéléen.

¹⁰ Tódô ket tau gemnóm du yóm kun ksidek nawa ne yóm kun kligal ne laen dù dumu tau gemnóm du.

¹¹ Yóm tau gel mò sidek meglà yóm kun kmuleng, okóm yóm tau tedeng kmoen mobung yóm kun kmuleng.

¹² Wen se atul lómón ke tedeng bè kehedem tau du okóm yó sónen hatay.

¹³ Ke blat nawahen yóm tau baluen ke kmuli, là kóen mkó béléen yóm keblat nawahen ne kogol yóm kkulihen bud senged se yóm keblat nawahen.

¹⁴ Yóm tau seblékê kehedemen gutahen bungu yó kem deng nmoen ne yóm tau hyu kmoen gutahen se bunguhen yóm kun gel nmò.

¹⁵ Yóm tau là ngelem kehedemen tódô hentahuhen kihu gungolen, okóm yóm tau hulung milô sal nan gel hendem kmò klanen.

¹⁶ Yóm tau hulung hedem eles mabung ne knogolen yóm sidek, okóm yóm tau book tey kosut nawahen ne tódô doen ktauhen.

¹⁷ Yóm tau sunget tey mahil kmoen ungel ne yóm tau hulung matul mò du yóm sidek knutó nawa kem dumun.

¹⁸ Yóm tau là ngelem kehedemen són moen temnù kungelen, okóm yóm tau hulung milô són moen gel temnù yóm ketngónen.

¹⁹ Yó kem tau gel mò sidek gel le hegdanà bè yó kem tau tedeng kmò le ne hkodu le bélê le snéen.

²⁰ Yóm tau élél balù kem dumun sebét gotu hmisik du, okóm yóm tau wen kendengenen tey dê ween.

²¹ Wen salaen yóm tau sendekaen yó kem dumun tau, okóm hligal yóm tau knoduhen yó kem tau élél.

²² Gemsalai du ke geli matul mò sidek, okóm ke geli matul mò yóm hyu, tonem yóm ksalig ne yóm kadat le kóm kem dumu tau.

²³ Yóm tau mò nmò sal gel wen gutahen, okóm yóm tau olon beyen stulón yó se mit du élél.

²⁴ Yóm kun kendengen yóm tau hulung hedem duhen yó se yóm ofolen, okóm yóm tau book olon tótól bè yóm kbooken.

²⁵ Yóm tau gel tmifù yóm tahu hegewaen kem dumu tau, okóm yóm tau gel tmifù kéng hfatayen kem dumu tau.

²⁶ Yóm tau kmikò ke Dwata wen gónón smalig ne hyu knóen, dalang se yó kem ngaen.

²⁷ Yóm klikò tau ke Dwata gónó le tendo lemowil anì gkogol le yó kem nmò mit kul e lem hatay.

²⁸ Yóm tau hol geta tendo mobung tauhen tey megdóyón, okóm ke tendo mtón tauhen laen kô gónón e kól.

²⁹ Yóm tau là mahilen lembut tey hulung temnef, okóm yóm tau sunget mahil gemsalà.

³⁰ Yóm tau menek kehedemen hyu klówóhen, okóm yóm klenget tau hengoken lem tiolen.

³¹ Yóm tau hen-gnoken yóm tau élél, tnondohen yóm Dwata deng tehe mò du, okóm yóm tau knoduhen yóm tau élél, megdóyón béléen Dwata.

³² Lemwót bè yóm sidek nmoen gónón meglà yóm tau gel mò sidek, okóm yóm tau tedeng kmoen wen gónón e mlo bè katayen.

³³ Yóm khulung hedem tódô henek lem but blutut yóm tau hulung temnef, okóm yóm tau book là kô tngónen du kun.

³⁴ Yóm htótól du yóm benwu bong duhen yóm ktedeng kmò kem tau nô du, okóm salà hemyak yó kem tauhen.

³⁵ Tey hligal yóm tau hol geta bè kehyu kmò yó kem tau smugung béléen, okóm tey sidek kebuten du yó kem tau mò yóm gónón myak.