Kem Udél Hlalak Tehe Selumun 13 - Udél Dwata: Gna Kesfasad ne Lomi Kesfasad

¹ Yóm logi hulung hedem hnungolen yóm hlau maen du, okóm yóm tau sedekà là kóen hmungol bólów.

² Sal gel guta tau yóm kehyu ofol lemwót bè kehyu yóm kun udél, okóm yóm tau là gsalig du són moen semgalu yóm khugusen.

³ Nabungen klowilen yóm tau eles hendemen kudélen ne yóm tau tódô óyóen bemkó yóm udél sidek hensideken knóen.

⁴ Laen kô tul kgutahen du yóm nóyóen yóm tau lemfu, okóm yóm tau mefesek gotu gutahen yóm gónón gsengel nawahen.

⁵ Tey kenbéen yóm tulón kéng yóm tau tedeng kmoen, okóm yóm tau gel mò sidek yóm kun udél hol tahu gónó myak.

⁶ Yóm kemlung yóm tau laen dù belenen duhen yóm ktedengen, okóm yóm sidek gel nmò yóm tau gemsalà yó se mit du meglà.

⁷ Wen se tau hlingu tau mdengen okóm laen kô gónón ma ne wen se tau hlingu tau élél okóm tey wen kendengenen.

⁸ Lemwót bè kendengenen gónón gemsok knóen yóm tau ke wen tau gmaga du, okóm yóm tau élél laen kô gmaga du.

⁹ Yóm tau tedeng kmoen lómón ke layag mtataw knóngen, okóm yóm tau gel mò sidek lómón ke solok móyón mlef.

¹⁰ Yóm kehegmón tau gónón gel mbut yóm kesbólów, okóm yóm tau hulung hedem gel móyô htolok.

¹¹ Tey mahil se kgotuhen yóm kendengen là gnayam du, okóm yóm kendengen gnayam balù ket na udi kaem mból.

¹² Lebà nawahen yóm tau ke golun yóm sen-galu nawahen, okóm sok dohò yóm hendeenen tey hyu nawahen.

¹³ Hensidek le knô le yó kem tau gel semdekà yó kem hlau, okóm yó kem tau lolò le yó kem hlau wen ofol le.

¹⁴ Lenowilen kem dumu tau yóm kun tolok yóm tau hulung hedem, anì gkogol le yó kem nmò mit kul e lem hatay.

¹⁵ Yóm khulung tau temnef gónón gmuta yóm kadat tau du, okóm yóm tau là gsalig du yóm kun lan mit du meglà.

¹⁶ Sal na le eles hendem kdê nmò le yó kem tau hulung milô, okóm yó kem tau book mom hegfan le yóm kbook le.

¹⁷ Hnayamen kem dumu tau ke dókem mit tulón yóm tau gel mò sidek, okóm yóm tau gsalig ke dókem mit tulón, heneken nawa tau.

¹⁸ Baling élél ne henyaken knóen yóm tau là kenmónen yóm kehlau le du, okóm yóm tau kenmónen yóm kbólów le du, megdóyón.

¹⁹ Tey hligal yóm tau bè kdohò kgutahen du yóm hendeenen, okóm yóm tau book tey kehegféten bè yóm nmò sidek.

²⁰ Baling hulung hedem se kun yóm tau tendo gel slomong yó kem tau hulung hedem, okóm yóm tau gel dnumuhen yó kem tau book hensideken knóen.

²¹ Són moen gel wen hlayam le yó kem tau gemsalà, okóm yó kem tau tedeng kmò le, kehyu klowil yóm kul ofol.

²² Yóm tau hyu kmoen gel tnebelen umun yó kem téméen, okóm yóm kul kendengen yó kem tau gemsalà, nô bè yó kem tau tedeng kmò le.

²³ Tey hyu huluhen yóm tonok yóm tau élél hanà lomi kebà du, okóm lemwót bè yóm là ktedeng nmò kem dumu tau fen heklanas du.

²⁴ Là kóen bong nawahem du yóm ngaem ke olom beyen móló mfes sok sidek nmoen, okóm ke kenbong nawahem yóm ngaem tendo tnedengem anì gulit.

²⁵ Sal gel gsengel kkenen yóm tau tedeng kmoen, okóm yóm tau gel mò sidek són moen bitil.