Kem Udél Hlalak Tehe Selumun 12 - Udél Dwata: Gna Kesfasad ne Lomi Kesfasad

¹ Yóm tau móyô hnau nóyóen yóm ketngón, okóm yóm tau kenbéen yóm kbólów du, book.

² Yóm tau hyu kmoen gwahen yóm kehyu nawa Dwata ebéléen, okóm yóm tau matul mò sidek tnuled Dwata.

³ Là kóen mdengen ktauhen yóm tau gel mò sidek, okóm yóm tau tedeng kmoen laen kô tul keskibolen yóm kun kehdolil.

⁴ Hegdóyónen ne hefligalen tuha logihen yóm libun hyu kmoen, okóm yóm libun henyaken tuha logihen lómón ke gel hengoken lem tiolen.

⁵ Yó kem atul yó kem tau tedeng kmò le hono tedeng, okóm yó kem tau gel mò sidek yóm kul udél hlalak hono sukat.

⁶ Lemwót bè yóm ktifù le kéng yó kem tau gel mò sidek gónó le gemhatay tau, okóm yóm kul udél yó kem tau tedeng kmò le fen lemwà kul.

⁷ Gotu le meglà ne là kô wen bud sfu le yó kem tau gel mò sidek, okóm yó kem tau tedeng kmò le laen kô sónen yóm kul sfu.

⁸ Gel megdóyón yóm tau bè yóm kun khulung hedem, okóm yóm tau là temnù kehedemen són mò le semdekà du.

⁹ Mom hyu he kun yóm tau glaan mowil bè kmoen nmò, senta yóm tau tô hlingu tau hol geta bede élél ken.

¹⁰ Yóm tau tedeng kmoen tilob kesegyoken yó kem ógófen, okóm yóm tau gel mò sidek sidek kógófen.

¹¹ Sal gel wen kenen yóm tau gel mò nmò bè tonok, okóm yóm tau gel nmungen yó kem atul laen dù muhen là hulungen hedem.

¹² Mom gebà yóm gónón tô heklung yóm tau gel mò sidek, okóm yóm tau tedeng kmoen laen kô tul keskibolen yóm kun kehdolil.

¹³ Gholot lemwót bè kun ksidek kudél yóm tau gel mò sidek, okóm yóm tau tedeng kmoen gewà gu lem hlayam.

¹⁴ Gsengel nawahen du yóm tau hyu ulék yóm kun gel udél ne sal gel gutahen yóm ulék geblà bè yóm kun gel nmò.

¹⁵ Yóm tau book bè kun kehedem du tedeng yóm kun kmò, okóm yóm tau hulung hedem gel hnungolen yóm kehlau le du.

¹⁶ Mahil dilô yóm kun kebut yóm tau book, okóm yóm tau hulung milô, tódô kem bayaen ke wen tô hemyak du hekawang.

¹⁷ Yóm tau gel mutóm yóm ktahuhen sal tahu ke wen tifuen, okóm yóm tau tmifù kéng smukat nmoen.

¹⁸ Yóm tau gel sidek kebkóhen tey gbeng lem dumu tau du, okóm yóm kun udél yóm tau hulung hedem, hemyu nawa.

¹⁹ Laen kô dù tul sónen yóm udél tahu, okóm yóm udél kéng tek likóten.

²⁰ Són ksukat nô lem hendem le yó kem tau gel matul mò sidek, okóm yó kem tau matul yóm hyu bè kem dumu le wen kligal le se kul.

²¹ Yóm tau tedeng kmoen laen kat sidek sut béléen, okóm yóm tau gel mò sidek tódô són moen meflayam.

²² Tey keklit Dwata du yóm tau tmulón kéng, okóm yóm tau gel tulónen yóm ktahuhen tey kligalen du.

²³ Yóm tau hulung milô là kô saluen du ketngónen, okóm yóm tau book mom gfan bè kudélen yóm kbooken.

²⁴ Du baling gónó galak yóm tau mefesek, okóm yóm tau lemfu olohen hgel mò yóm hmò kem dumu tau du.

²⁵ Gel blat nawa tau du yóm gel klóngón nawa, okóm yóm udél hyu lemwót bè kem dumun, fen gel hemyu nawahen.

²⁶ Yóm tau tedeng kmoen nalaken yóm dumun bè ktedengen, okóm yóm kun kmò yóm tau gel mò sidek, hetlasen kem dumu tau.

²⁷ Là kô gutahen du yóm nóyóen yóm tau lemfu, okóm yóm tau mefesek gutahen yóm kimu mebtes.

²⁸ Yóm lan tau ebè yóm ktahà ktauhen duhen yóm ktedeng kmò, okóm yóm ksigol kmò lan tau e lem hatay.