Kem Udél Hlalak Tehe Selumun 11 - Udél Dwata: Gna Kesfasad ne Lomi Kesfasad

¹ Tey keklit Dwata du yóm tau lemingko, okóm tey kehligalen du yóm tau tedeng kun kmò.

² Sal gel mulék myak yóm tau heklabak, okóm yóm tau heglaanen knóen hulung hedem.

³ Tendo le galak bè yóm ktedengen yó kem tau tedeng kmò le, okóm yó kem tau là gsalig kul bè yóm kul keseblékê, yó se heglà kul.

⁴ Laen kô muhen bè tau yóm kendengenen bè yóm kdaw katayen, okóm yóm ktedeng kmoen htahaen ktauhen.

⁵ Lemwót bè yóm kun ktedeng yóm tau laen dù belenen mit du ebè kehyuhen, okóm yóm tau gel mò sidek lemwót bè yóm sidek gel nmoen mit du meglà.

⁶ Yóm kul ktedeng yó kem tau gsalig yó se hegewà kul gu lem yó kem sidek, okóm yó kem tau là gsalig kul, gholot le bè yóm sidek alì nusol nawa le.

⁷ Sok matay yóm tau gel mò sidek tódô lana yóm kun hendón ne laen kô gónón e baling yóm kendengen nefet nawan.

⁸ Yóm tau tedeng kmoen gewà gu lem yóm hlayam ne yóm tau gel mò sidek mom yó yóm meflayam.

⁹ Lemwót bè kun kudél gónó le meglà kem dumun yóm tau là madat ke Dwata, okóm lemwót bè ketngón yóm tau tedeng kmoen gónó le gewà.

¹⁰ Tey le hligal yó kem tau bè yóm benwu ke wen hyu sut bè yóm tau tedeng kmoen ne ke matay yóm tau gel mò sidek tey keklélé le du.

¹¹ Megkay yóm benwu bong lemwót bè kul kuyag du yó kem tau tedeng kmò le, okóm yóm kul udél yó kem tau gel mò sidek fen heglà du.

¹² Là kóen hulung hedem yóm tau sendekaen kem dumun, okóm yóm tau hulung temnef tódô yem.

¹³ Yóm tau gel semtebong sal bud gel tulónen yóm lifut tulón du, okóm yóm tau gsalig là kô bud gel sentebongen du.

¹⁴ Tódô klà le yó kem tau bè yóm benwu là wen tau mdengen malak kul, okóm ke dê tau matul bè kwit kul hyu, tey hyu knô le.

¹⁵ Yóm tau fmasad mayad yóm utóng yóm tau là deng hol dilóen du tey keglayamen du, okóm yóm tau bê mò du laen kô tnafa nawahen.

¹⁶ Gel gutahen kegdóyónen yóm libun hyu kmoen, okóm là kun yóm tau gel hmugus olon gmuta kendengenen.

¹⁷ Mulék hyu knóen yóm tau hyu kmoen bè kem dumun, okóm yóm tau sidek baluhen hensideken knóen.

¹⁸ Là kóen tahà kmuhen du yóm gutahen yóm tau gel mò sidek, okóm yóm tau gel mò yóm tedeng, gutahen yóm ofol laen tul sónen.

¹⁹ Tahà ktauhen yóm tau sal gel nmoen yóm ktedengen, okóm yóm tau són moen mò sidek hukolen ktauhen.

²⁰ Tey keklit Dwata kul yó kem tau seblékê kehedem le, okóm bè yó kem tau laen dù belenen yóm kehedem le, tey kligalen bélê le.

²¹ Ngem! Yó kem tau gel mò sidek là kô lugun Dwata kul là tnafak, okóm yó kem tau tedeng kmò le gewà.

²² Yóm kóngó yóm libun tilob ke là hulungen mit du hyu yóm kmoen, lómón kóngóhen ke lenahu tising blówón mebtes yóm ngólón sdô.

²³ Yóm kun hendeen yóm tau tedeng kmoen, hyu gónón e kól, okóm yóm tau gel mò sidek yóm kun hendón, mom tafak gónón e kól.

²⁴ Yóm tau là sgafasen mom temnù yóm gónón wen ne yóm tau ngalihen yóm tô mò blayen fen temnù kélélen.

²⁵ Hyu klowilen yóm tau bkas nawahen ne yóm tau ten-gelen kem dumun bud wen se temgel du.

²⁶ Tey ktuled kem tau du yóm tau gel hembalù ke tlek temginof halay, okóm meguyag se kun yóm tau tódô kendel hembalù halay.

²⁷ Tonen se kadat tau du yóm tau hol sen-galuhen yóm hyu, okóm yóm tau hnebelen yóm sidek, sut béléen se yóm sidek.

²⁸ Mulék gdanà yóm tau tódô doen yóm kun kendengen lómón yó kem doun koyu gel tbó, okóm yóm tau tedeng kmoen, tey hyu klowilen lómón ke yóm doun koyu alì lembud.

²⁹ Yóm tau heglayamen yóm kun fes lówó olon tódô mifu hólólen ne yóm tau book són moen ghesek bè yóm tau hulung hedem.

³⁰ Lemowil béléen kem dumu tau yóm tau tedeng kmoen ne yóm tau hulung hedem niten ebè Dwata kem dumun.

³¹ Ke guta le ulék yóm deng nmò le bè ni te tonok yó kem tau tedeng kmò le milud he kul yó du kem tau gel mò sidek ne kem tau gemsalà.