Kem Udél Hlalak Tehe Selumun 10 - Udél Dwata: Gna Kesfasad ne Lomi Kesfasad

Kmò yóm tedeng ne yóm là tedengen

¹ Ni kem ni bud kem udél hlalak tehe Selumun. Hegdóyónen maen yóm logi hulung hedem, okóm yóm logi book heblaten nawa yéen.

² Yóm kendengen là mlanen bè ktedengen laen kô uléken, okóm yóm ktedeng kmoem htahaen ktauhem.

³ Là kô henus Dwata kul yó kem tau tedeng kmò le, okóm yó kem tau gel mò sidek là kô hlusen du yóm kul alì nusol.

⁴ Gel baling élél yóm tau mduk, okóm yóm tau mefesek baling wen kendengenen.

⁵ Kesok deng gefet huluhen yóm tau hulung milô eles gel sentifunen yó kem tbasen, okóm yóm tau tlek kun tungô bè yóm igò muta henyaken knóen.

⁶ Gutahen yóm kehyu klowilen yóm tau tedeng kmoen, okóm yóm tau gel mò sidek yóm kun kudél gónón gebnos yóm alì ksidek nmoen.

⁷ Baluen ke deng matay yóm tau tedeng kmoen là kóen mkó kehtulón le du nawa kem tau, okóm yóm boluy yóm tau mò sidek tódô klifót le.

⁸ Kenmónen yó kem hlolò yóm tau hulung hedem, okóm yóm tau mò kestulón nungel heglaen knóen.

⁹ Laen kô hemenen yóm tau tedeng kehedemen, okóm yóm tau là tedeng kehedemen gekfô du yóm kmoen sidek.

¹⁰ Yóm tau nmungen yóm là tahun, hnayamen kem dumuhen, okóm yóm tau tódô bnólówen yóm sidek nmò kem dumun, senfyuhen kem dumun.

¹¹ Yóm kun kudél yóm tau tedeng kmoen, ten-gelen nawa kem dumun tau, okóm yóm kun kudél yóm tau gel mò sidek gónón gebnos yóm alì ksidek nmoen.

¹² Yóm utó nawa tau tendo gónón lemwót yóm kesbólów, okóm yóm tau kenbong nawan kem dumun tódô hnifóten yó kem salà le.

¹³ Ke mudél yó kem tau hulung temnef tódô dilô yóm khulung le hedem, okóm yóm tau book bogul se kun guta.

¹⁴ Yóm tau hulung hedem nan tógón yóm kwen muhen bemsut du yóm ketngónen, okóm yóm tau book tódô faen mudél ne là dog hendemen du yóm gfaen du.

¹⁵ Yóm kemlung du yóm tau mdengen duhen yóm kun kimu. Ne yóm hemsidek yóm tau élél duhen yóm kélélen.

¹⁶ Mowil le du yóm kul ofol miteg yó kem tau tedeng kmò le, okóm yó kem tau gel mò sidek, yóm kul ofol miteg tendo niten lu gemsalà.

¹⁷ Tahà ktauhen yóm tau kenmónen yóm kehlau le du, okóm yóm tau kenbéen yóm kehlau le du htabagen knóen.

¹⁸ Mò kéng yóm tau hnalaen yóm kutó nawahen ke dumun. Ne yóm tau hensideken boluy kem dumun, book.

¹⁹ Là gbeken du ke laen salà du yóm alì kwenen yóm udél, okóm yóm tau hulung hedem là katen mudél.

²⁰ Yóm kun udél yóm tau tedeng kmoen tey bong muhen lómón yóm tembaga futì alì megélék, okóm yóm tau gel mò sidek yóm kun kehedem laen kô gónón e kól.

²¹ Tey wen gónón gemtóbóng kem dumun yóm kun udél yóm tau tedeng kmoen, okóm yóm tau book là kóen tahà ktauhen lemwót bè là khulungen hedem.

²² Yóm uyag Dwata mdengeni du ne laen dù kenblat nawahem du.

²³ Mom hnigalen yóm kmoen sidek yóm tau book, okóm yóm tau hulung temnef bong kligalen bè yóm khulungen hedem.

²⁴ Sal gefet béléen yóm alì knikò yóm tau gel mò sidek, okóm yóm tau tedeng kmoen yóm kun hendeen tonen snéen.

²⁵ Sok wen glumfak gefet béléen yóm tau gel mò sidek hol lómón ke miwes klifus yóm tódô klanahen, okóm là kun yóm tau tedeng kmoen tódô kem sana yó ne kun laen kô sónen.

²⁶ Ngilów yóm tau bè yóm msom ne des matahen bè kebel lómón se ni yóm khulówem bè yóm tau lemfu.

²⁷ Htahaen ktau te yóm klikò te ke Dwata, okóm yó kem tau gel mò sidek hsukeg Dwata ktau le.

²⁸ Yóm nefet nawa yóm tau tedeng kmoen duhen yóm kligalen, okóm yóm tau gel mò sidek yóm kun hendeen laen kô tul kesuten béléen.

²⁹ Dwata mò gónó le e mlo yó kem tau tedeng kmò le, okóm yó kem tau gel mò sidek bud du se gónó le meglà.

³⁰ Là kô le gdó du yóm tonok yó kem tau tedeng kmò le, okóm yó kem tau gel mò sidek là kô le gnô du.

³¹ Yóm kudél yóm tau tedeng kmoen gónón gfan yóm khulungen hedem, okóm yóm tau mò tulón seblékê heglaen knóen.

³² Sok mudél yóm tau tedeng kmoen sal nan na hendem yóm knóón bè kem dumun, okóm yóm tau gel mò sidek sal gel seblékê kudélen.