Nihimaya 8 - Udél Dwata: Gna Kesfasad ne Lomi Kesfasad

Kesfala Isra yóm Hlau Dwata bè yó kem tau

¹ Bè yóm ghituhen bulón, deng le gotu henek ne bè yó kem kul benwu yó kem tau Israél lomi mulék. Bè yóm tanay kdaw bè yóm bulón yó, gotu le stifun bè Jirusalim bè yóm plasa moni bè yóm bak tikeb boluy le du Bak Tikeb Él. Yó nmò le, hwa le ke Isra yóm bok gónóhen nô yó kem Hlau Dwata, yó kem hlau tehe blay Dwata yó kem tau Israél hlanen bè Musis. Nim Isra ni, tau gel blóng ebè Dwata ne megdidif ketngónen du yóm hlau Dwata.

² Tahu se, nwit Isra yóm bok yó ebè yóm deng gónó le stifun yó kem tau, kem logi ne kem libun ne yó kem ngà deng hulung hmungol du yóm hlau Dwata.

³ Bè yó bè plasa yóm Bak Tikeb Él gónó Isra semfala du bélê le yóm hlau yó. Tódô lenwóten hlafus kól gtungó semfala du bélê le. Ne tey le teneb hmungol du yóm kdéen tau.

⁴ Bè yóm kesfala Isra du yóm hlau Dwata yó, mdà ta yóm seel geta deng nmò le bè koyu mò gónón mdà. Wen kem tau mdà bè kwananen. Yó boluy le, Matitiya ne Sima ne Anaya ne Uriya ne Hilkaya ne Maasiya. Yó fen mdà bè iwóngen, Pidaya ne Misaél ne Malkidya ne Hasum ne Hasbadana ne Sikaraya ne Misulam.

⁵ Bè yóm igò Isra mdà bè yó bè gónón geta, gotu le temngel ebéléen yóm kdéen tau. Timbow lenungkaen yóm bok, tódô kdê le gotu hebkó mdà.

⁶ Yó mon Isra mò kul, “Hol dóyón tekuy yóm sana kut Dwata hol gónó mogot yóm Dwata hol dandónen geta.” Tódô kdéen tau gotu hdà le eta sigel le, mon le, “Tahu se. Tahu se.” Omin le gotu mtud bukol bè tonok hegfan le yóm keheglaan le bè Dwata. Yóm uyó le, botong gefet bè tonok.

⁷ Omin le gotu bud hebkó mdà ne wen kem sfu Libay tmulón du kul lanen yóm hlau yó. Yó boluy le Jéswa ne Bani ne Siribiya ne Jamin ne Akub ne Sabitay ne Hodiya ne Maasiya ne Kelita ne Asariya ne Jusabad ne Hanan ne Pélaya.

⁸ Senfala le bélê le yóm hlau Dwata ne hegtukul le bélê le yóm lanen.

⁹ Timbow gungol yó kem tau yóm tehe hlau Dwata kul tódô le gotu mkik. Okóm mudél ebélê le Nihimaya yóm gubérnor, anì là bud le mkik. Bud mudél ebélê le Isra yóm tau gel blóng ebè Dwata, yóm alì temngón du yó kem hlau Dwata, dalang se yó kem sfu Libay gel hemlan du bélê le yóm hlau Dwata, bud le mudél ebélê le se kul, mon le, “Yóm kdaw ni, kdaw deng hetfing tekuy ebè Dwata yóm sana kut Dwata hol gónó mogot. Hol bê tekuy abay bud mkik.

¹⁰ Ne ni, mulék ye ebè gónô ye ne hol ye hligal ne mò ye ken. Benlay ye yó kem tau là kóyówen yóm kul. Nim kdaw ni, kdaw hetfing tekuy ebè Dwata. Yó gónóm mon, hol bê ye abay heblat nawa abay se yóm kligal lemwót bè Dwata, yó se hol gónón lemwót yóm kgis tekuy.”

¹¹ Lemwót yó kem sfu Libay gotu le mógów lem blóng le, nifa le lu, mon le, “Hol bê ye abay bud mkik, yakà ni du yóm kdaw deng hetfing tekuy ebè Dwata.”

¹² Tahu se, gotu le mulék ebè gónô le yó kem tau. Hligal le mò ken ne wen blay le bè yó kem dumu le. Yó buten yóm kligal le, abay se deng gungol le yóm udél Dwata ne tngón le lanen yóm senfala le bélê le.

Kehligal le nô bè Slung

¹³ Timbow hayahen bè yó, lemwót yó kem gel malak bè ket tbong mung kul yó kem gel blóng ebè Dwata ne yó kem sfu Libay, gotu le mógów ebè Isra na le e hennagì yóm hlau Dwata.

¹⁴ Bè yóm kehnagì le du, tódô ton le bè yóm hlau Dwata yó, yóm hlau tehe hlan Dwata bè Musis yóm na le na knô bè slung yó kem tau Israél sok nmò le yóm kehligal bè yóm bulón yó.

¹⁵ Duhen yó, gotu heglalag le yó kem hlolò Dwata kul yó bè klamang Jirusalim ne bè yó kem dumu benwu hmilol gónó le nô yó kem tau Israél, mon le, “Mógów ye elem bulul na ye e ma yó kem hanga koyu ulib dalang se yó kem hanga koyu ulib tódô tmowok lem bnes mò slung ye ne yó kem hanga koyu mirtol ne kem doun blulan ne hanga yó kem dumu koyu mobung doun le mò nmò ye slung, hol lómón yóm deng hlolò Dwata tekuy bè yóm hlauhen.”

¹⁶ Tahu se, lemwót yó kem tau gotu le ma kem hanga koyu mò nmò le slung. Wen se mò du ta yó kem ketef le, ne wen se gu talak lósól le, dalang se talak lósól yóm Gónô Dwata. Ne yó kem dumu, nmò le bè plasa moni bè Bak Tikeb Él dalang se bè Bak Tikeb Ifraim.

¹⁷ Tódô kdê yó kem tau tehe negef deng bud mulék, gotu le mò slung ne nô le lemen. Ni he bud kmò le du yóm ni lenwóten bè yóm tehe kun kdaw Juswa yóm ngà Nun. Tódô kdê le gotu hligal mò du yóm yó.

¹⁸ Tódô lemwót bè yóm tanay kdaw kmò le du yóm kehligal le yó efet kól bè kdengen, tódô ket kdaw Isra tendo semfala du lem blóng le yóm Hlau Dwata. Hitu kdaw le kegen le mò du yóm kehligal le yó. Ne bè yóm gwoluhen kdaw bud le stifun mò sónen, tódô lolò le yóm monen lem yóm Hlau Dwata.