Nihimaya 4 - Udél Dwata: Gna Kesfasad ne Lomi Kesfasad

Tô kehseng le yóm nmò Nihimaya

¹ Timbow gungol Sanbalat, yóm deng kbut kehdà me yóm beng botu hmilol Jirusalim, ya tey sidek kebuten ne tey kehnéen kum

² lem blóng yó kem dumuhen ne lem blóng yó kem genlal bè yó kem sendalù lemwót bè Samarya. Yó udélen eta me, monen, “Tedum tô hendem nmò le ni kem Ju laen dù genbek ni? Mone tô hdà le kô yóm beng botu hmilol yóm syudad le? Yó kô hendem le mlan bè yóm gel kedsù le ebè Dwata tódô deng le sendaw yóm nmò le? Gbek le hemdà beng botu kô lemwót bè yó kem lusok botu deng lan ofi?”

³ Mdà bè yó se ke Tubiya klohoken yóm sotu tau Amunayt, ne yó udélen se kun, monen, “Yóm beng botu hdà le yó, hnénégem he ke là angaten gebà baluen ke olon bolos kmitay tahen.”

⁴ Bè yóm kungolu du yóm udél le yó botonge mni bè Dwata, monu, “Ó Dwata, hol hnungolem yóm tey kehnê le kum ni. Hol bud hulékem eta le yóm udél le yó ne yake wen megef kul se kul ebè yó kem tólóng benwu mayuk.

⁵ Hol béem abay bayà yóm sidek nmò le bélê me ni ne béem abay hnifót yó kem salà le, yakà alì henwog le mi bè yóm kmò me nmò.”

⁶ Ewenem yó, tódô kem henlel me mò yóm beng botu bud hdà me, ngangen efet sóól yóm kegetahen eta lemibut yóm syudad me lemwót bè yóm alì kkinì nawa le mò nmò yó kem tau.

⁷ Okóm tikóng bud gungol le Sanbalat ne Tubiya ne yó kem tau Arab ne kem tau Amunayt ne kem tau Asdod yóm kehlel me mò nmò, ne yóm deng ksikof me yóm tehe gónón gawang yóm beng botu yó, ya tey bud sidek kebut le kum.

⁸ Yó nmò le, sensatul le yóm kundug le ebè Jirusalim anì na le e senbeweg yó kem tau nô lemen.

⁹ Okóm yó bud nmò me, mni me bè yóm sana kum Dwata ne tódô senflós me kemdaw ne kifu mentey yóm syudad me.

¹⁰ Ominen wen udél le tmalaw yó kem tau Juda, mon le, “Deng laen dù bud kgis le ne yó kem tau mogut lusok botu. Lelen tey wen he dù luduk bè yó, là gbek me bud hemlel du yóm beng botu hdà me.”

¹¹ Yó bud udél le se kul yó kem hohon me, mon le, “Tódô kentut nundug tekuy lu, gotu hnatay tekuy lu anì là gfuhen yóm nmò le.”

¹² Okóm yó kem dumu me Ju menwu moni bélê le, tódô ket kiwól le mseb du kum yóm atul le eta me, mon le, “Sok nundug le tekuy kun tódô snibut le tekuy.”

¹³ Bè yóm kungolu du yóm yó, yó nmou sket benlayu lu tók ne buyus ne boho yó kem tau mò nmò, ominu mólól kul mlan bè ket tbong le ne suu lu bè ket gónón là deng sikof yóm beng botu bud hdà me mò mentey bè yó.

¹⁴ Timbow deng tonu yóm mò kmoen, yó gónów gotu sembung kul yó kem tau ne yó kem malak kul ne yó kem genlal bélê le, yó monu mò kul, “Hol bê ye abay hlikò bè yó kem hohon tekuy. Hentulón ye nawa yóm tey kegbek yóm sana kut Dwata yóm Dwata hol knóón knikò. Hotu ye gel ye mofin kul yó kem dumu ye bè yóm benwu tekuy ni, yó kem ngà ye ne yó kem yehen ye ne yó kem gónô ye.”

¹⁵ Tikóng gungol yó kem hohon me yóm deng ketngón me du yóm atul le eta me, tódô dilô le Dwata se fen hemseng du yóm atul le. Lemwót se kum, bud senfulék me yóm kmò me yóm beng botu yó.

¹⁶ Lenwóten bè yó ne, sóól bélê me fen mò nmò ne sóól se fen mentey. Eles le lemsek onit ne mogot klung yó kem tau mentey. Wen se bélê le mogot buyus ne wen se mogot boho. Ne yó kem tau genlal bè yó kem sendalù, fen le mdà bè kwang yó kem tau mò nmò,

¹⁷ tódô henlel le hemdà yóm beng botu. Balù yó kem tau mogut yó kem wen mu le du bè yóm beng, ogot le nwit doli sigel le ne ogot le suk dolin.

¹⁸ Tódô kdê yó kem tau mò nmò eles le lemumak tók. Wen tau mogot féw suu klohoku mò gónó me gbal ke wen hohon me sut.

¹⁹ Yó tulónu yó kem tau ne yó kem genlal le ne yó kem malak kul, monu, “Tey lamang yóm beng botu hdà tekuy ni ne deng tey slayuk ne gónó tekuy nô.

²⁰ Ke gungol ye yóm uni féw kendel ye stifun ebè yóm gónón muni. Dwata he fen mit sfatay bè yó kem hohon tekuy.”

²¹ Duhen yó, tódô ket kdaw lenwóten hlafus efet mnóng blotik kifu, sóól bélê me fen mò yóm beng botu ne sóól se fen mentey, eles le kmulóng buyus.

²² Bè yóm kdaw yó, yó tulónu yó kem tau gel nô bè yó kem dumu benwu hmilol Jirusalim, hol le nô bè Jirusalim ke kifu, mung kul yó kem tau tóbóng lówó le anì stóbóng me mentey kifu lómón yóm kestóbóng me mò nmò ke kemdaw.

²³ Ne tahu se. Bè yóm kdaw yó là kô kóhu du yóm nes leseku baluen ke kifu, dalang se yó kem dumuhu setwoli ne yó kem tau tóbóng lówóhu ne yó kem fen mentey gel mung do, là kô kó le du se kul yóm nes lesek le. Eles me kmulóng suk yóm kdê me, baluen ke olo me mógów ebè él. Là gomongen bè nili yóm tsaptér 5 kól bè 7. Yó tulónen yóm tey sidek klowil yó kem tau bè Juda lemwót bè yóm deng bud kulék le elem blóng le yó kem hilu libu dumu le Ju tehe negef le ebè Babilun ne botong le gkafus bè ken. Ne sotuhen, yóm tey kbong yóm bad hnihen bélê le yóm tau hol geta bélê le. Yó nmò le, sandà le tonok le bè yó kem dumu le wen gónó le ma. Ne yó bud gfà le bè yó kem tau gónó le smandà, alì bong kehngà le du yóm filak le efet là bud gsok le du yó kem tonok le. Ngangen efet geblay le ngà le bè yó kem tau gónó le smandà mò bayad le ngà yóm utóng le. Okóm bè yóm ketngón Nihimaya du nim ni, ya tey sidek kebuten kul, abay se yóm nmò le yó mom nmò le bè yó kem kul dumu Ju. Yó gónón gotu htaba kul yóm kdê le anì stulón le. Bè yóm kestulón le, gotu hfulék Nihimaya yó kem tau wen gónó le ma yóm tonok sandà le bélê le. Bud hfuléken kul snéen yó kem tehe hngà le du. Ne wen olu Nihimaya kul ke là nimón le du yóm monen mò kul yó. Yó oluhen kul, monen, “Dwata he hol hekfung du yóm kdê nfun ye ke là nimón ye du nim monu ni.” Tahu se, gotu nimón le Nihimaya yó kem tau gónó le smandà yó. Yó tulónen bè tsaptér 6, botong limu dulék le smulat ebè Nihimaya yó kem hohonen anì mung miting bélê le mò tô lan le hemsidek du. Okóm yó balà Nihimaya kul, monen, “Tey bong muhen yóm nmò me ni. Là kô getngónu du mung miting bélê ye.” Bè ket ksut yóm sulat le ebéléen, tey kni Nihimaya bè Dwata ne tódô senflós le mò nmò efet gotu deng yóm beng botu hmilol yóm syudad le. Tek limu folò lewu kdaw le kegen le hdà du yóm beng lamang hmilol Jirusalim. Tódô dilô yó kem hohon le yóm tey któbóng Dwata kul yó kem tau Israél bè yóm kmò le nmò. Yó tulónen bè tsaptér 7 yóm kmò ksó le yó kem tau tehe negef le ebè Babilun gna mulék ebè Jirusalim. Yóm ksó le kul yó, hlan le bè ket tbong le. Yóm kwen le, udì duen gónón là gefet bè 50,000. Bud lista le snéen yóm kilu yó kem tahu blówón ne blówón bukay tehe blay le mò klóón yóm Gónô Dwata bud hdà le bè Jirusalim.