Nihimaya 2 - Udél Dwata: Gna Kesfasad ne Lomi Kesfasad

Kógów Nihimaya ebè Jirusalim

¹ Timbow deng fat bulónen bè yó, bè yóm gewuhen folò halay kegenen mogot benwu Artasérksis, bè yóm sotu kdaw igoen mken yóm tau hol geta yó, kayu ebéléen yóm gel ninumen. Là kô deng hnikót tonen dou he ke lembang nawahu,

² yó gónón smólók dou, “Moen de ke lembang nawahem igoen laen dù desem? Lómón tô wen kenblat nawahem.” Yó mò do denge mom likò,bnalau se, monu, “Hol tahà he ktauhem. Moen se ke là lenbang nawahu du yóm syudad tehe gónó le lembeng yó kem tehe fuu, hanà tolo gebà ne yóm bak tikeben deng gotu mlób?”

³ bnalau se, monu, “Hol tahà he ktauhem. Moen se ke là lenbang nawahu du yóm syudad tehe gónó le lembeng yó kem tehe fuu, hanà tolo gebà ne yóm bak tikeben deng gotu mlób?”

⁴ Snólóken o yóm tau hol geta yó, “Tedu se tô kmò te du du?” Ominu tódô kendel mni bè yóm Dwata nô bè longit

⁵ ne monu bè yóm tau hol geta yó, “Ke yó dum hyu bè nawam ne ke yó dum móyói du yóm tô hnihu béléem, hógówem o ebè benwu Juda, bè yóm syudad tehe gónó le lembeng yó kem tehe fuu anì bud hdau yóm syudad yó.”

⁶ Ominen hemlus do yóm tau hol geta yó, uma kóm myón klohoken yóm libun boi yehenen, monen, “Kegenem ditu de? Ne kilón se tô bud kulékem du?” Ne na me sentulón yóm kdaw kewótu.

⁷ Ominu bud mon du mò du, “Ke yó dum hyu béléem, benlayem o sulat mò nwitu ebè yó kem gubérnor bè prubinsya fi desdef Él Yufratis anì hlan le o lem yó kem benwu nogot le bè yóm kógówu ebè Juda.

⁸ Ne bud benlayem se o sotu sulat mò nwitu ebè Asaf yóm geta bè yó kem tau gel mentey yó kem koyu nfunem bè yó, anì benlayen o koyu mò ngom yó kem bak tikeb yóm gónó le mentey moni klohok yóm Gónô Dwata ne bè yóm beng botu hmilol yóm syudad yó ne bè yóm gónô gónóhu angat nô.” Tahu se, gotu blay yóm tau hol geta dou yóm kdê hnihu yó lemwót bè yóm knóen béléu Dwata.

⁹ Wen kem sendalù genlal hmungen dou yóm tau hol geta yó ne wen se kem sendalù smakay kudà ne ominu lemwót ebè yóm prubinsya fi desdef Él Yufratis. Bè yóm kkólu bè yó, blayu bè yó kem gubérnor yóm sulat yóm tau hol geta ebélê le.

¹⁰ Okóm kul le Sanbalat yóm tau lemwót bè Bét Horon ne Tubiya yóm tau genlal bè prubinsya Amun, bè yóm kungol le du yóm kwen tau tmóbóng yó kem tau Israél, ya tey kekbê le du.

Eles khénég Nihimaya yóm beng botu deng gbà hmilol Jirusalim

¹¹ Tódóe hlós ebè Jirusalim bè yóm kógówu yó. Tlu kdawu bè yó

¹² ne laen kô dù tau tnulónu bè yóm hmò Dwata do bè Jirusalim. Tikóng sóól buteng btike ne hewae, wen hilu nwitu bè yó kem dumuhu mung do. Tek sotu kudà nwit me són yóm kudà asnu dou snakay.

¹³ Tolo kifu he yóm kewótu bè yó bè syudad, mlane fi desdef bè yóm bak tikeb bnoluy le Bak Tikeb Datal efet niusu Sfut Él Swaga fi leged efete kól bè Bak Tikeb Fól. Bè yóm igou mógów tendo henklol hnénégu yóm beng syudad deng gotu gebà ne yó kem bak tikeben deng gotu mlób.

¹⁴ Ominu hlós fi dmata kdaw yóm syudad, moole ebwak ebè yóm bak tikeb boluyen Bak Tikeb Sfut, efete kól bè Busung Tau Geta. Yóm kudà asnu snakayu botong tô là bud gbeken du mógów, bà mon yóm tey lusok botu lemwót bè yóm beng deng gebà.

¹⁵ Yó gónóm mon, tódóe hlós edlem ebè Datal Kidron bè yóm igou hménég yóm beng botu hmilol. Ominu bud mulék ebè yóm sana lan lolou, muléke elem syudad bud lanu bè Bak Tikeb Datal.

¹⁶ Yóm kógówu yó, là kô tngón le du yó kem genlal bè yó ne là se tngón le du yóm nmou. Laen dù tau deng tnulónu, balù yó kem dumuhu Ju duhen ke yó kem tau gel blóng ebè Dwata ne yó kem tuha gel malak ne yó kem dumu genlal, duhen ke bè yó kem dumu angat gbót mò nmò, là kô tnulónu kul.

¹⁷ Okóm bè yóm kkólu yó, yó monu mò kul, “Deng hónô tngón ye se nim gfà tekuy ni lemwót bè yó sem tolo kegbà Jirusalim ne deng gotu mlób yó kem bak tikeben. Bud hdà tekuy dé yóm beng botu hmilol yóm syudad tekuy anì laen dù bud gónó tekuy myak.”

¹⁸ Ne tulónu kul yóm deng knô Dwata béléu ne yóm tey któbóngen do. Bud tulónu kul snéen yóm udélen ebéléu yóm tau hol geta. Yó balà le do, mon le, “Hyu se yó, nbut tekuy ne bud hdà du.” Tahu se, nbut le mò du yóm nmò yó.

¹⁹ Tikóng gungol le Sanbalat ne Tubiya ne yóm sotu tau Arab boluyen Gésém yóm atul me yó tey kuli le kum, mon le, “Tedum tô nmò ye ni du? Ilóem tô natù ye kô yóm tau hol geta?”

²⁰ Okóm yó balau kul, monu, “Yóm Dwata nô bè longit fen tmóbóng kum anì wen gendeng me. Mi se yó kem kun tóbóng lówó ne nbut me ne ni bud hdà du yóm beng botu. Okóm kuy, laen dù kuy du yóm tonok bè Jirusalim ne laen se dù kuy ólól du.” Là gomongen bè nili yóm tsaptér 3. Yó tulónen yóm kmò kehdà le du yóm tey beng botu geta lelen lamang hmilol Jirusalim. Yó kmò le du, nólól le bè kdéen tau nô bè Jirusalim anì yó, tódô kdê le gotu semtóbóng mò du. Bud tulónen bè ni snéen yóm boluy yóm kdéen tau bud hemdà du ne yóm gónó le seblà fi bè yóm kmò le nmò bè yóm beng botu yó. Wen sotu tau tmóbóng mò yóm beng botu yó boluyen Baruk. Yó tulónen gbak béléen yóm tey khotuhen nawahen tmóbóng mò yóm beng. Ne bud wen se tulónen gbak bè yó kem tau gel malak bè benwu Tikwa, okóm yó tulónen gbak bélê le yóm là kóyô le tmóbóng mò yóm beng botu yó.