Nihimaya 1 - Udél Dwata: Gna Kesfasad ne Lomi Kesfasad

¹ Ni se yóm bok gónó Nihimaya yóm ngà Hakaliya, tmulón du yó kem deng gendengen. Bè yóm gewuhen folò halay kogot Artasérksis bè Pérsya, bè yóm bulón bnoluy le Kisléb, ou Nihimaya nóe bè Susa yóm hol yê yó kem syudad bè Pérsya, bè yóm gónóhen nô yóm tau hol geta.

Yóm alì kehedem Nihimaya yóm benwu Jirusalim

² Sotu kdaw, gdek béléu yóm sotu dumuhu sulil-lem boluyen Hanani lemwót bè Juda ne wen kem dumuhen mung du. Snólóku bélê le yóm mò kmoen bè Jirusalim ne mò kmò yó kem dumu me Ju tehe negef deng bud kól bè yó gu bè Babilun.

³ Ne tulón le dou yóm tey keglayam yó kem tau deng bud kól bè Juda, yóm alì kehegnok le kul yó kem tólóng tau hmilol kul. Tulón le dou snéen sana tolo kegbaen yóm beng botu hmilol Jirusalim ne là dengen bud hyu yóm bak tikeben lemwót bè yóm tehe ktem le du.

⁴ Bè yóm kungolu du yóm kdéen ni, tódóe hdung myón ne tey kkiku. Botong hilu kdawu lemangag du yóm deng gungolu yó, là kóe mken. Tódô henlelu mni bè Dwata, monu mò du,

⁵ “Ó Dwata yóm sana kum Dwata hol gónó me mogot nô bè longit. Uu se yóm hol dandónen geta, yóm Dwata knóón bang knikò. Là kóen mkó bè nawahem yóm tehe kesfasad ye yó kem tau kembong nawa kóm, yó kem tau mimón yó kem hlauhem.

⁶ Kudungi do edini, Dwata, hol hnungolem do yóm hnihu. Knoyungu kdaw ne kifu mni bè yó kem tau Israél tóbóng lówóhem. Tódô benkasu béléem, deng me gemsalà béléem mi kem tau Israél. Denge gemsalà béléem dalang se yó kem gónóhu gu semfu.

⁷ Tey sidek yóm nmò me béléem lemwót bè yóm là klolò me du yóm kdê hlauhem. Là kô dog nimón me du yó kem hlauhem kum tehe hlanem bè Musis yóm tau tóbóng lówóhem.

⁸ Hentulónem nawa yóm tehe monem mò ke Musis ekni, ‘Ke monol nawa ye ebéléu yu kem tau Israél, gotu senklahu yu elem blóng yó kem tólóng but tau bè dumu benwu.

⁹ Okóm ke bud ye semfulék ebéléu ne nimón ye yó kem deng hlauhu kuy, bud nwitu yu semfulék ebè yóm benwu deng néléku mò gónó ye tmaba ebéléu. Baluen he ke deng negef le yu ebè tu kem benwu són tonok, kaem bud nwitu yu mulék he.’

¹⁰ Ó Dwata, hono kem tau tóbóng lówóhem se yó kem tau Israél monem yó, hono kem kóm tau. Deng tehe hewaem lu mlan bè yóm tey kfasangem ne bè yóm tey kgisem.

¹¹ Hol hnungolem do yóm hnihu béléem, Dwata. Bud hnungolem snéen yóm kul hni yó kem dumu tau tóbóng lówóhem, yóm wen óyô le madat kóm. Hol tnóbóngem o kemdaw ni ke wen hnihu bè yóm tau hol geta anì knoduhen ou.” Bè yó kem kdaw yó, yó dou nmò, ou fen gel mkay du bè yóm tau hol geta yóm gel ninumen.