Nahum 3 - Udél Dwata: Gna Kesfasad ne Lomi Kesfasad

Ktafak Dwata yóm benwu Ninibi

¹ Hatayen kun yóm syudad Ninibi. Gónó le menwu yó kem tau hono litô lemekes lem hólól le, hono kéng yóm btang bè sumóng le, benwu tódô hnok lemen kimu deng negef ne bud wen angat muku du bélê le snéen yó kem kimu yó.

² Hnungol ye dé uni fes kudà ne legdeg kudà hlóngkóy, uni kliling klitun tók séhék, uni klitun stingkuk.

³ Ngem, tódô temfasù yó kem sendalù smakay kudà, tódô smilà bak sudeng le, bak buyus le kéng dilóf ofi. Nawaw tódô hgasà tau matay, là kô gbekem msó kul hilu luduk hono tau deng matay. Yó kem tau tô mlóy, gotu le tlokob ta le.

⁴ Yó buten yóm gfà Ninibi ni, abay se hol lómón ke libun hdóyón là tmakasen bè yóm gel nmoen. Alì heklóón, hol gónón smala imò mtud. Gotu le ghesek béléen yó kem dumu benwu mlan bè kehdóyónen. Ne mlan bè ktud imoen, gotu le ghesek béléen yó kem dumu tau.

⁵ Yó udélen ebéléen yóm Dwata laen dù là gbeken du, monen, “Tey sidek khohonu kóm, Ninibi. Angat tódô hdau uu là lemwék ne angat tey sidek kyakem bè yóm angat kton le lówóhem yó kem dumu benwu.

⁶ Angat sohulu kóm kê, tey khisiku kóm. Angat nmou uu mò sentngel kem tau.

⁷ Kdéen tau mton kóm, botong le hegsud, mon le, ‘Tey sidek kegbaen yóm Ninibi, laen dù tau kmamà du, ne laen se kô dù hemyu nawahen.’ ”

⁸ Ó Ninibi, ilóen hyuhi senta benwu Tibis kô, yóm hol yê yó kem syudad bè Idyip yóm benwu tódô slibut du Él Nayl, mò seng hilolen?

⁹ Wen tey kfasangen lemwót bè benwu Ityupya ne benwu Idyip, ofo kul yóm kfasang le yó ke laen dù bud sónen. Ne yóm benwu Put ne Libya fen semtóbóng semstud du.

¹⁰ Ewenem sana kegbaen yóm benwu Tibis. Gotu negef le lu mayuk yó kem kdê tauhen. Kem ngà lemnek le gotu bot le lu te botu gu bak lan, hnatay le lu. Kem sendalù hohon le, gotu le mò atù ke mahil du bélê le gemwa du yó kem genlal gel nadat le bè yó kem sendalù Asirya mò hesek le. Kdê yó kem tuha gónó le gel galak yó kem tau Asirya, gotu nfét kem hohon le lu kedina.

¹¹ Ne uu Ninibi, angati glénggé snéen kóm, hol lómón yóm tau lengel. Angat sónmoem hebnos, knikoem yó kem hohonem mundug kóm.

¹² Angat gotu genbà le kdê yó kem gónóhem gel heklung. Hol lómón klahil keglà le kóm lómón ke kningò le yó kem koyu fig deng mélél bunguhen, gotu le btang elem bak yóm tau kmingò du.

¹³ Ngem, angat le gotu lunog yó kem sendaluem, hol lómón klunog kem libun. Yó kem bak tikeb yóm syudadem, deng tódô mngal bè yó kem hohonem, deng ntem le ne gotu le mkekeb.

¹⁴ Elesi htigel, Ninibi, abay se angat senibut le uu yó kem hohonem. Eles hengónem élem mò ninum yó kem tauhem. Hol hbegelem yóm gónó ye gel heklung. Eles tenlobem yó kem beng hmilol kóm. Mógówi elem sol nam e ma tonok miket mò tlob ye yóm beng yó.

¹⁵ Okóm là dengen sóól he yóm nmoem yó deng sana kenen uu ofi, duhen ke matayi bè sudeng. Angat hnatay le u yó kem hohonem. Yóm kmò le kuy, hol le skél bè kem tlangas, gotu hensidek le nô kihu ton le. Laen dù gmoem se kóm baluen ke lómón kwen ye tlangas.

¹⁶ Yó kem tau mò udél swa lem benwu ye, tey kwen le, hol lómón kwen yó kem blotik bè longit na le e hennok kendengen yóm syudadem. Okóm hol lómón ke yóm lumbuk tlangas olo le himot mken yó kem hulu, omin le bud móyóng mayuk.

¹⁷ Yó kem gel mentey bè benwuhem ne yó kem dumu genlalem, hol lómón kmò le tlangas snéen, gotu le setbukù bè yó kem beng botuhem anì là matay le bè tnaw. Okóm ke deng sut yóm mata kdaw mò kminì kul, hol le mkél bè tlangas snéen, gotu le móyóng mayuk, là bud tonem kul ne.

¹⁸ Tey nawaw uu, Tau Geta bè Asirya. Deng le gotu matay yó kem gubérnorem, dalang se yó kem genlalem. Deng le gotu sekla gu lem bulul yó kem tauhem, laen dù bud semtifun kul.

¹⁹ Là gbek bulung du yóm haliem, yó se angat hatayem. Tey kligal le yó kem tau mungol du yóm gfaem. Gotu le mensag abay se laen dù tau bè klamangen benwu ke là deng gnóm le du yóm tey sidek kmò ye ebélê le.