Nahum 2 - Udél Dwata: Gna Kesfasad ne Lomi Kesfasad

Kegbà Ninibi

¹ Ó Ninibi, deng senibut le uu ne yó kem hohonem. Deng sut ne yóm angat gemlà kuy. Hol hwenem yó kem sendalù mofin kóm. Hol bnentey ye yóm lan yó kem hohon ye. Gotu ye htigel mit sfatay bélê le. Tnabahem kdê yó kem sendaluem.

² Abay se yóm benwu Israél, deng tódô gotu gbà lemwót bè yóm gel kgidahem du, okóm angat bud hulék Dwata ebéléen yóm kun tehe keklóón ne yóm kun kfasang.

³ Yó kem sendalù yó kem hohon ye hono hulô yó kem klung le, dalang se yó kem nes le, hono hulô. Deng le eles htigel mundug kuy. Tengel ye dé tu kem klitun tók le, tódô le semkyab igò le demyol kul yó kem kudà le. Ya tey kwen yó kem buyus nogot yó kem sendalù le.

⁴ Ya tey kehlóy le kul yó kem kudà le demyol klitun tók bè yó kem lan ne bè yó kem plasa. Hol lómón ke mkal silà yóm tey ketlasik le, tendo kemnit sminang lómón tô solok gel nit mógów.

⁵ Dók yóm tau hol geta yó kem genlal bè yó kem sendaluen anì kenluug le yóm gónô bongen. Botong salà kdà le lemwót bè keheslò le.

⁶ Okóm deng le mom getufì abay se deng le sana nô bè yó, yó kem hohon le ne deng genbà le yó kem seng bè yóm él mlel ne tòdô hesut yóm tey él bong, botong gwiten yóm gònô bong yóm tau hol geta bè Asirya.

⁷ Bè yóm deng kdohò yóm olu Dwata bè benwu Ninibi. Tey sidek kegnóm le du yó kem libun tóbóng lówóhen bè yóm kegef le yó. Ya tey klangag le, sónmò le mtung kfu le botong alì klangag le. Hnungolem dlumu le lómón ke udél obun, sónmò le mtung kfu le botong alì klangag le.

⁸ Yó gónó tekuy hmingón du yóm benwu Ninibi, lómón ke él busung deng tbó, gotu molo yóm él nô lemen. Lómón yó se kmò yó kem tau bè Ninibi, gotu le mlóy. Wen se mon du, “Bê, bê,” okóm mom lenwê le mlóy yó kem tauhen.

⁹ Gotu negef ye yó kem blówón bukay le. Gotu nuku ye yó kem tahu blówón le. Tey kmimu yóm benwu Ninibi là kô gabayem msó du yóm kbong kendengenen.

¹⁰ Deng gotu gbà ne yóm benwu Ninibi ne tódô gbayà ne laen dù bud tonem lemen. Lemwót bè yóm alì klikò le, tey sidek kotuk kfu le. Tódô setbol kkel kem bukol le. Tódô gotu lana kgis le ne gotu le lemusék.

¹¹ Nô se benwu Ninibi du nim kmoen ni? Yóm benwu yó hol lómón ke tehe gónó le nô yó kem liyun, gónó le hemken yó kem ngà le, gónón gel mulék yóm liyun logi ne liyun libun, gónó le gel nô yó kem ngà le gónón laen dù hemen le.

¹² Yó nmò yóm liyun logi, gotu nséken yó kem kenfóen mò hkenen yóm liyun libun ne yó kem ngaen. Yóm gónó le nô, tódô hnok yóm deng nséken. Nô se yóm benwu yó nim kmoen ni?

¹³ Yó udél yóm Dwata laen dù là gbeken du ebè Ninibi, monen, “Ou se deng hnohonem. Angat gotu ntemu yó kem klitun tók gel nit ye bè gida ne yó kem sendaluem angat le gotu matay bè sudeng. Laen dù bud negef ye ne bè dumu benwu. Laen dù bud benwu mungol du ne udél yó kem tau tehe gel dók ye ebélê le.”