Mika 6 - Udél Dwata: Gna Kesfasad ne Lomi Kesfasad

Kkukum Dwata yó kem tau Israél

¹ Ni hol hnungol ye yóm udél Dwata ebè yó kem tau Israél, monen, “Yó kun tulón ye yóm tifù ye dou. Hfungol tekuy yó kem bulul lembang ne hfungol tekuy yó kem bulul lemnek yóm udél ye.

² Ne yu kem bulul ne begel tonok lemwót bè hol kbuten ne laen kô dù tul sónen, hnungol ye yóm tifù Dwata yó kem tauhen. Wen tey tifù Dwata kul yó kem kun tau Israél.

³ Ó kem dou tau, tedu se deng nmou bélê ye du ke deng mom knogol ye ou? Bnalà ye o, tedu se deng nmou gónóhu htakas kuy du?

⁴ Igou deng mit kuy hewà gu bè Idyip ne deng lenwau yu gu bè yóm gónó ye ghesek. Deng hógówu tukô gna kuy le Musis ne Aron ne Miryam mò malak kuy.

⁵ Ó kem dou tau, hentulón ye nawa dé yóm tehe tô atul Balak bélê ye yóm tau hol geta bè Muab bè yóm tô kehmulaen kuy, ne yóm tehe kmò kbalà Balaam du yóm ngà Biyur logi bè yóm knihen bélê ye yóm tóbóng Dwata. Là klifót ye du kô yóm yó? Hentulón ye nawa yóm tehe gónóhu tmóbóng kuy lenwóten bè kamfù Akasya efet kól bè Gilgal, yóm tehe kdê nmou bélê ye mò gónó ye gewà.”

⁶ Bè yóm bud ktaba tekuy ebè Dwata yóm Dwata bè longit, tedu se tô nwit tekuy ebéléen du mò blay tekuy du bè yó kem sidek deng gel nmò tekuy? Nwit tekuy ebéléen kô yóm ngà safì hanà sfalayen alì hyu bè kdéen mò hkekeb te ebéléen?

⁷ Hligal du Dwata kô ke mit tekuy ebéléen hilu libu ubiha mung du yóm hnolo ulib là skasen tendo molo? Hligal du kô ke dsù tekuy ebéléen yóm ngà tekuy twogu mò bayad yó kem salà tekuy?

⁸ Là kem tau, là kóen na a hligal du. Deng tulón Dwata tekuy yóm hyu béléen. Yó hol nóyóen bélê tekuy ke nmò tekuy yóm tedeng ne ke hol tekuy hulung kmodu ne ke hol tekuy heglaan béléen. Là gomongen bè nili yóm bérs 9 kól bè bérs 16. Yó tulónen bè ni kem bérs ni yóm gotu bud klista Dwata salà yó kem kun tau. Tey wen kendengen le mlan bè gel ksukat le dumu le tau. Gel le tmimbang lemugì ne là tódóen ke wen bentes le, gel gnaga nwa le kimu kem dumu le ne tey dê he dumu nmò le là hyuhen. Lemwót bè yóm nmò le yó, yó gónó Dwata eles tmulón du kul yóm angat ksulék keglaen kul dalang se yóm benwu le.