Mika 5 - Udél Dwata: Gna Kesfasad ne Lomi Kesfasad

Angat lemwót bè Bitlihim yóm tau mogot yóm klamangen

¹ Ó kem tau bè Jirusalim, gotu sentifun ye lu yó kem sendalù ye. Deng snibut le tekuy yó kem hohon tekuy. Wen tuged nogot le mò bogul le lem uyó yóm tau malak bè Israél.

² Okóm kóm Bitlihim Ifrata yóm sotu benwu lemnek snakuf Juda, béléem angat gónón lemwót yóm tau néléku mò mogot yó kem tau Israél. Yóm kun kbut yóm tau néléku ni, tehe kem yu ne ekni.

³ Yó kem tau Israél, angat tódô bayà Dwata lu elem hólól yó kem hohon le efet kól bè yóm kdaw wen libun kmuleng blututen ne mngà logi. Ominen yó lemwót yó kem tau Israél deng negef le mayuk, tódô le bud mulék ebè yóm hol kul benwu lem blóng yóm kul dumu.

⁴ Bè yóm angat ksut yóm tau mogot benwu yó, tódô mdà lem blóng le, gotu nalaken yó kem kun tau mlan bè yóm kgis lemwót bè Dwata ne mung du yóm tey kegeta boluy yóm kun Dwata yó. Ominen yó kem tau nalaken, balù udì ke wen hemen le abay se tódô lenngeben klamang benwu yóm tey kegetahen.

⁵ Ne du gónón lemwót yóm kenek kbenwu le. Ke sok nundug kem sendalù Asirya yóm benwu tekuy ne ke tódô le hlós elemen, angat wen hitu tau malak nélék tekuy mò mit kul sfatay ne wen wolu kem ngà tau hol geta malak tekuy.

⁶ Angat knamal le yóm benwu Asirya yóm tehe kun benwu Nimrod, mlan bè sudeng le. Ne lenwà le tekuy lem tdok yó kem tau Asirya ke sok bud tô nwa le yóm benwu tekuy.

Kkó Dwata du bélê le yóm gónó le gemsalà

⁷ Ominen lemwót yó kem dù mowil bè yó kem tau Israél menwu lem blóng yó kem tólóng benwu, hol lómón kmò le ke amù hwit Dwata ebè yó kem dumu tau, duhen ke kulón mò hméfê bnes. Són Dwata snalig le, là kô le smalig bè tau.

⁸ Yó kem dù mowil bè yó kem tau Israél menwu lem blóng yó kem tólóng benwu tey kekgis le, lómón kgis yóm liyun senta yó kem dumu ógóf nô lem dlag, tódô sut bè yóm gónó le mótób yó kem ubiha tódô kemfô bélê le, ominen msék kul ne laen kô dù gembek semkot du béléen.

⁹ Angat le gotu gemmò yó kem tau Israél bè yó kem hohon le ne gotu le meglà yóm kdê hohon le yó.

¹⁰ “Okóm bè yóm kdaw yó,” yó udél Dwata ebè yó kem kun tau, monen, “angat gotu genlau yó kem kudà gel nwit ye bè gida ne gotu genbau yó kem klitun tók gel dyol le.

¹¹ Angat gotu genbau yó kem beng botu deng hdà ye hilol yó kem syudad ye ne yó kem dumu deng nmò ye mò gónó ye heklung.

¹² Nmou són le yóm kdéen mton bù ne laen dù bud tau hemgawang gónó ye bud smólók.

¹³ Angat gotu genbau yó kem dwata lennged ye ne yó kem hehek botu deng hetfing ye mò gónó ye tmaba ebélê le. Là kô ye bud gtaba ebè yó kem dwata kéng nmò tdok ye.

¹⁴ Angat hnugónu yóm dwata lennged libun bnoluy ye Asira sù ye lem benwu ye ne gotu genbau yó kem syudad gónóhen nô.

¹⁵ Koku eta yó kem benwu là mimón dou yóm sidek alì kebutu kul mò balau kul.”