Mika 4 - Udél Dwata: Gna Kesfasad ne Lomi Kesfasad

Angat kkamal Dwata yóm klamangen

¹ Bè yó kem hol són kdaw, angat tey tótól bè klamangen benwu yóm bulul gónón nô yóm Gónô Dwata. Bè yó gónó le tmaba Dwata yó kem tau bè klamangen benwu.

² Tey dê but tau angat mógów ebè yó, yó udél le, “Lemwót tekuy ne mneged eta yóm bulul Dwata, mógów tekuy etu bè Gónô yóm Dwata yó kem tau Israél. Bè yó gónón tmolok du tekuy yóm kun kóyô anì lolò tekuy yóm kun lan.” Abay se bè yó kem kdaw yó, lemwót bè Jirusalim yóm kun tolok Dwata ne yóm kun udél.

³ Ke wen gónó le seglius yó kem benwu lembang bè klamangen benwu, Dwata se angat kmukum kul. Lemwót bè yóm kkukumen kul, tódô mulék hsól le dadu yó kem sudeng le ne yó kem buyus le, ne kem bangkung le. Laen dù bud benwu sgida ne laen kô dù bud htolok sendalù.

⁴ Tódô sotu kun htinof bè yóm kun gónó hmulu grép ne kun gónó mulu koyu fig ne laen kô dù bud knikò le. Ni se deng fasad yóm sana Dwata laen dù là gbeken du.

⁵ Baluen he ke hemtahu le bè yó kem dwata kéng yó kem benwu hmilol kum, okóm kum són Dwata yóm kum lolò ne laen kô dù tul sónen.

Angat bud kulék yó kem tau Israél ebè benwu le

⁶ Yó udél Dwata, monen, “Bè yóm kdaw yó, angat gotu bud sentifunu lu yó kem dou tau deng tugô, duhen yó kem tau deng tehe negef le lemwót bè yóm ktafaku kul.

⁷ Yó kem tau tugô tehe negef le yó, angat nmou lu kem tau dù tebel. Angat tey kehbólu kul, lelu bud hbegel kbenwu le. Ominen ou yóm angat mogot kul bè Bulul Sayun ne laen kô dù tul sónen yóm kogotu kul.”

⁸ Ne uu Jirusalim, yóm benwu gónó Dwata tendo mentey yó kem kun tau, angat bud mulék ebéléem yóm tehe któtólem ne yóm tehe kfasangem. Ne bud uu se hol yê yó kem syudadem ne béléem gónón nô yóm tau mogot yó kem dou tau.

⁹ Moen de ke alì ye dmumu mkik? Laen dù tau hol geta malak kuy kô? Deng le gotu matay kô yó kem tehe gel hmau kuy? Yó kô but gónón alì sidek kegnóm ye du lómón yóm libun kmuleng blututen?

¹⁰ Ó kem tau bè Jirusalim, hol ye mngawóy dé lómón yóm libun kmuleng blututen, abay se deng bang ktebel ye du ne yóm syudad ni, ditu gónó ye bud kmamfù bè yó kem lan. Angat negef le yu etu bè benwu Babilun. Okóm bè yó gónó Dwata bud lemwà kuy gu lem hólól yó kem hohon ye, ne bè yó bud gónón msok kuy.

¹¹ Tahu se, deng tey dê but tau stifun mundug kuy. Yó udél le, “Hol genbà tekuy Jirusalim. Hyu ke hol mata tekuy mton du yóm deng kegbaen.”

¹² Okóm yó kem tau mon du yó, là kô tngón le du yóm nô lem hendem Dwata. Là tngón le du yóm kun atul, duhen yóm deng gotu kestifunen kul anì tnafaken lu, lómón yóm halay deng eles nwit le ebè yóm gónó le kmusu du.

¹³ Yó udél Dwata, monen, “Ó kem tau bè Jirusalim, htigel ye ne gotu knusu ye lu yó kem hohon ye. Yó nmou bélê ye, hekgisu yu lómón kekgis safì tudu hmanga bala tók ne kmasingen tembaga futì anì gbek ye lemusok mdà kul yó kem benwu hmohon kuy. Omin ye yó mit du ebéléu yóm kdê kendengen deng tehe negef le mò blay ye do, blay ye ebè yóm Dwata kmamal yóm klamangen benwu.”