Mika 3 - Udél Dwata: Gna Kesfasad ne Lomi Kesfasad

Kkukum Dwata yó kem tau malak bè Israél

¹ Ó kem tau malak bè Israél, ni mò hol hnungol ye. Igò sem yu du temngón du yóm kukum tedeng bè yóm là tedengen.

² Okóm deng kenbê ye yóm tedeng, mom henlom nawa ye yóm sidek. Hol lómón ke nukét ye matak yó kem dou tau ne hnélé ye yóm unged bè tiol le.

³ Hol lómón ke deng gotu ken ye unged le yó kem dou tau. Gotu nukét ye kulit le ne tenfok ye tiol le ne gotu ntól ye lu lómón utón tnógó lem kuleng.

⁴ Angat kól yóm kdaw ye hkodu mkik ebè Dwata, okóm là kô nan e bnalà kuy. Mom henbnosen yu lemwót bè yó kem sidek deng gel nmò ye.

⁵ Yó udél Dwata ebè yó kem tugod dwata kéng, monen, “Yu se deng mit kul tlas yó kem dou tau. Ke wen ken blay le kuy, fnasad ye lu kenek kbenwu, okóm bè yó kem tau laen dù blay le kuy, deng mom sidek kesbeweg ye kul.

⁶ Yó gónóm mon, kem tau tugod dwata kéng deng kmifu ne bélê ye, laen dù bud htonu kuy. Deng hol mget kkifuhen bélê ye, là bud gtulón nawa ye du yó kem angat sut elem hulin kdaw. Deng sdef ne kdaw bélê ye kem tugod dwata kéng ne móyón gesón yóm kuy kdaw.

⁷ Ke wen tau tô tmulón yóm angat sut, angat tey sidek kyaken bè yóm là kdohò yóm tulónen. Tódô le gotu myak abay se là bnalà Dwata kul.”

⁸ Okóm béléu dou, deng sù Dwata béléu yóm kun Tulus ne yóm kun kfasang. Ne hetngónen do yóm kukum tedeng ne benlayen o là klikò tmulón du bè yó kem tau Israél yó kem salà le.

⁹ Ó kem tau malak bè Israél, ni mò hol hnungol ye. Deng mom kenbê ye yóm kukum tedeng ne henbaling ye sigol yóm tedeng.

¹⁰ Deng mom tgel ye syudad Jirusalim yó kem tau monok ne yóm kukum là tedengen.

¹¹ Yu kem tau gel malak, là kô ye kmukum ke là wen mò wa nawa ye. Yu kem tau gel blóng ebè Dwata, là kô ye tmolok udél Dwata ke là wen bayad le kuy. Yu kem tugod Dwata, laen dù tulón ye ke là bnayad le kuy, igò ye sem gel mon du són bè Dwata yóm gónó ye smalig. Gel mon ye, “Kaem nô bélê tekuy Dwata. Laen dù sidek sut bélê tekuy.”

¹² Duhen yó, lemwót bélê ye angat gónó le dmadu du yóm Bulul Sayun, hol lómón kmò le du ke tonok gónó mò hulu. Ne yóm Jirusalim, sulék genbà le. Ne yóm bulul gónón mdà yóm Gónô Dwata, tódô baling bulul hono dlag.